Ileta Ọreva ra ya Vwe Itu i Kọrint
10 Vwana, mẹmẹ ro rhiẹ i Pọl, a rẹ are nyoma uruemru dẹndẹn ọrhẹ uruemru esiri Kristi na. Dedevwo mi havwọ bọrọbọrọ ọke omẹmẹ ọrhẹ are a havwiẹ, ọrẹn mia tẹmro rẹn are rhẹ ohinmi ọke omẹmẹ ọrhẹ are i vwa havwiẹ. 2 Mie fiẹrorhọ taghene mi rhe bru are rhe, mi dje ohinmi phia ji ha ọghwọghwu ọgbogbanhon rẹn ihworho ezẹko re roro taghene ame a nyalele izede ọrẹ akpọ na-a. 3 Dedevwo ame e nyerẹn jerẹ ituakpọ erọrọ, ame i vwa ha iroro akpọ na fiupheri-i. 4 Fọkime ekwakwa upheri ame, e nẹ akpọ na rhe-e, ọrẹn aye i nẹ obẹ Osolobrugwẹ rhe. O ji ruẹ aye gbanhon na sabu ha aye ghwie ekwakwa ri vi kanronma rhotọre. 5 Fọkime ame a ghwọghọ iroro sansan ọrhẹ ekwakwa ri rierun ephian ri kparehaso irherhe Osolobrugwẹ, ame e ji suẹn iroro ephian jerẹ ọvrẹn, neneyo aye i huphele i Kristi na. 6 Ogege are i rha huphele hin, ame i mwuegbe rẹ ame ina ha oja riẹ ihworho ephian ri vwe kwe huphele.
7 Oborẹ ekwakwa i havwọ otafe yẹ are e nẹ ha brorhiẹn. Ohworho ọrhọ hobọ fiudu taghene ọye odibo i Kristi, jenọ rharhumu roro kpahen ẹmro ọnana: Jerẹ oborẹ ọye o rhiẹ odibo i Kristi na, omaran ame i ji rhiẹ idibo i Kristi. 8 Orhianẹ mi tobọ yenyan phan kpahen omẹgbanhon Ọrovwori na ọ yẹrẹ ame, nẹ ame i ha bọn are gbanhon ukperẹ ame ina suẹ ẹkuọn rẹn are, ofa ọ ro mẹ-ẹ. 9 Mia gwọlọ nọ họhọ taghene mia djofẹn mwu are nyoma ileta mẹ-ẹ. 10 Fọkime ihworho ezẹko a ta: “Ileta ye o vwo ọhiẹn ọrhẹ omẹgbanhon. Ọrẹn ọrhọ rhe, ọ họhọ ọvwiẹlẹ, ẹmriẹn e ji tuonma.” 11 Jenẹ aruẹ ihworho erana i karorhọ taghene oborẹ ame i ya* rhẹ uvuẹn ileta ọke ame i vwa ha avwaye, yẹ ame ine ruo* ame i rha rhe. 12 Fọkime ame i vwe hinmi kele oma ame ba ihworho rẹ aye ọvo e jiri oma aye-e, yanghene ha oma ame vwanvwọn aye-e. Ọrẹn, ọke aye a ha oma aye vwanvwọn awọrọ yanghene ha oma aye dje awọrọ, ọrana no djephia taghene aye e rhe emru owuorowu-u.
13 Ọrẹn, ame i yenyan vrẹn ughwru ra ghalẹ te ame-e, ukpomaran ame ina yenyan uvuẹn okogho rẹ Osolobrugwẹ ọ ghalẹ te ame,* are i tobọ ha uvuẹn okogho ọrana. 14 Itiọrurhomẹmro, ame a nyavrẹn ughwru bru are rhe kamẹriẹn are a ha uvuẹn ekogho ame-e, fọkime ame yẹ ihworho erukaro ri ghwoghwo iyẹnrẹn esiri ro sekpahen i Kristi na rẹn are. 15 Ẹjo, ame i vwa yenyan vrẹn ughwru ra ghalẹ te ame yanghene yenyan kpahen ewian ohworho ọrọrọ-ọ. Ọrẹn, ame i fiẹrorhọ taghene rẹ esegburhomẹmro are ọ gbanhanrhọ na, ewian ame i wianren uvuẹn okogho ame ono ji rhe buẹnrhọ. Ọke ọrana, owian ame no no ji bunrhọ, 16 neneyo ame i ji ye ghwoghwo iyẹnrẹn esiri na uvuẹn ẹkwotọre erọrọ ri seri vrẹn ọrẹ are, nẹ ame i ja rha yenyan kpahen ewian rẹ awọrọ i wianren uvuẹn okogho ọrẹ aye. 17 “Ọrẹn, jenẹ ohworho rọ yenyan, ọ ha i Jehova* yenyan.” 18 Fọkime rhẹ ohworho ro jiri omayen ya djẹha-a, ọrẹn ohworho ri Jehova* o jiriri ya djẹha.