Ileta Ọrukaro ra ya Vwe Itu i Kọrint

8 Vwana, sekpahen emaren ra ha ze izobo rẹn ema: Ọwan ephian i vwo irherhe kpahen ẹmro ọnana. Irherhe ọ lẹrhẹ ohworho kparoma, ọrẹn ẹgwọlọ ọ bọn awan gbanhan. 2 Ohworho orho roro taghene o rhe emru, nọyẹ o ji rhe yi te oborẹ o fori no rhe yi te-e. 3 Ọrẹn, kohworho kohworho ro vwo ẹgwọlọ kpahen Osolobrugwẹ, Osolobrugwẹ no no rhe ọravwọ.

4 Vwana, sekpahen ọrẹ ana riẹ emaren ra ha ze izobo rẹn ema, ọwan i rheri taghene oma o fiemru owuorowu uvuẹn akpọ na-a, e ji rhe taghene Osolobrugwẹ owu ọvo yọ havwiẹ. 5 O vwo ekwakwa sansan re se isolobrugwẹ, sẹ obẹ odjuwu yanghene uvuẹn otọrakpọ na, o ji vwo “isolobrugwẹ” buebun ọrhẹ “erivwori” buebun. 6 Ọrẹn, Osolobrugwẹ owu ọvo yẹ ọwan i vwori ro rhiẹ Ọsẹ na, ọye yọ ma ekwakwa ephian, ọwan ephian e ji nyerẹn hariẹn. Ọrovwori owu ọvo yẹ ọwan i ji vwo, nọyẹ Jesu Kristi, ra nyoma yen ma ekwakwa ephian, e ji vwo arhọ nyoma yen.

7 Ọrẹn, rhẹ ihworho ephian yi vwo irherhe ọnana-a. Fọkime ihworho ezẹko a ga ema bi. Ọke aye a riẹ aruẹ emaren ọnana, aye ne nie jerẹ oborẹ a ha ze izobo rẹn ema. Omarana, ẹhẹn obrorhiẹn aye rọ vwiẹlẹre no kpokpo aye. 8 Ọrẹn, rhẹ emaren yọ nọ lẹrhẹ ọwan tikẹrẹ Osolobrugwẹ rhọ-ọ. Sẹ ọwan i rere yanghene a re-e, rhẹ ọrana yọ nọ lẹrhẹ ọwan rhiẹ erharhere ihworho yanghene omamọ ihworho-o. 9 Ọrẹn, are i rhe ni oma are sua, neneyo ugbomọphẹ are i vwori rẹ are ina djẹ odjẹ, o jo rho rhiẹ ọgbanrhọ rẹn ihworho ri vwiẹlẹre. 10 Orhianẹ ohworho ọ mẹrenrẹn are ri vwo irherhe ra riẹ emaren uvuẹn oghwa ra ga ema, ẹhẹn obrorhiẹn ọravwọ rọ vwiẹlẹre na, o mwuien vwo udu rọ nọ riẹ emaren ra ha ze izobo rẹn ema? 11 Omarana, are i fọkiẹ irherhe are suẹ ẹkuọn rẹn ohworho rọ vwiẹlẹre na ne, nọyẹ omizu are ri Kristi o hwu riẹn. 12 Are i rhe ruẹ ọdandan haso imizu are izede omana ji suẹ ẹkuọn rẹn ẹhẹn obrorhiẹn aye rọ vwiẹlẹre, nọyẹ are e ruẹ ọdandan haso i Kristi. 13 Omarana, orhianẹ emaren ono rhiẹ ọgbanrhọ rẹn omizu mẹ, mi rha riẹ aranmo ghwomara-an, neneyo mi je rhe rhiẹ ọgbanrhọ rẹn omizu mẹ.