Ileta Ọrukaro ra ya Vwe Itu i Kọrint
9 Mie vwo ugbomọphẹ? Mẹmẹ rhẹ ọnyikọ? Mia ji mẹrẹn i Jesu ro rhiẹ Ọrovwori ọwan? Rhẹ are yẹ ewian mẹ uvuẹn Ọrovwori na? 2 Ọrhọ tobọ rhianẹ awọrọ i vwe ni mẹ jerẹ ọnyikọ-ọ, are i rheri taghene mẹmẹ ọnyikọ! Fọkime are yẹ oka ro djerie phia taghene mẹmẹ ọnyikọ uvuẹn Ọrovwori na.
3 Ọnana yẹ ẹmro mi vwori mi na ta rẹn ihworho ra ha mẹ guẹnzọn: 4 Ame i vwo ugbomọphẹ* rẹ ame ina re ji da, gbinẹ rhomaran? 5 Ame i vwo ugbomọphẹ rẹ ame ina kpare ane ame ro rhiẹ odibo i Kristi lele oma jerẹ oborẹ inyikọ ri hẹrhẹre na ọrhẹ imizu Ọrovwori na kugbe i Sifas* e ruẹ, gbinẹ rhomaran? 6 Gbinẹ mẹmẹ ọrhẹ i Banabas ọvo yi na wian vwẹre nẹ ame i ki riẹ emaren? 7 Isodja ọgo yọ ha igho omobọ ye hẹrote omayen? Ọrọmo yọ wọ ogba ivaini rọ vwọ riẹ emamọ ye? Gbinẹ osuingegede ọgo yọ vwọ da nẹ imiki ro nẹ usurhe yi rhe?
8 Mia tẹmro enana fọkiẹ oborẹ ihworho e roro? Urhi na ọ ji ta kpahen ẹmro enana? 9 Fọkime a yariẹ rhẹ uvuẹn Urhi Mosis taghene: “Wu vwa gba unu erhuẹn ọke ro sinhin ikeri ewawọ-ọ.” Erhuẹn na yẹ Osolobrugwẹ o roro kpahan? 10 Gbinẹ fọkiẹ ọwan yọ tẹmro erana? Fọkiẹ ọwan ya ya ẹmro erana rhotọre, fọkime ohworho ro voro otọre ọrhẹ ohworho rọ fa ikeri ewawọ, e fiẹrorhọ taghene aye ina mẹrẹn emru ghalẹ.
11 Orhianẹ ame i tiobọnu urhomedje Osolobrugwẹ* rẹn are, orho fo nẹ are i hobọtua ame izede ugboma? 12 Orhianẹ ihworho erọrọ i vwo ugbomọphẹ aye ina nekpẹn userhumu mie are, rhẹ ame yi mai vwo yi? Ọrẹn, ame i vwa ha ugbomọphẹ* ọnana ruiruo-o, ukpomaran ame ne diẹn ekwakwa ephian neneyo ame i ja rha jaghwẹrhọ iyẹnrẹn esiri ro sekpahen i Kristi na. 13 Itiọrurhomẹmro, are i rheri taghene ihworho ra wian ewian efuanfon uvuẹn oghwa ẹga na, a riẹ ekwakwa ra kpare rhiẹ oghwa ẹga na. Habaye, ihworho ra wian uvuẹn ekete agbarha izobo na, a ji riẹ oborẹ a ha ze izobo rhẹ oberun agbarha na. 14 Omaran ọ ji havwọ, Ọrovwori na o jurhi taghene ere ghwoghwo iyẹnrẹn esiri na, i riẹ emru nyoma iyẹnrẹn esiri na.
15 Ọrẹn, mia ji ha ugbomọphẹ erana owuorowu ruiruo-o. Itiọrurhomẹmro, mi vwa ya ẹmro enana vwe are nẹ are i ruẹ ekwakwa enana ha mẹ-ẹ, fọkime ọnọ ghwai rhomu mi rhe hwu. O vwo ohworho owuorowu rọ nọ sabu ha ugbomọphẹ mia yenyan mie mẹ-ẹ! 16 O fo ni mi yenyan fọkime mie ghwoghwo iyẹnrẹn esiri na-a, fọkime ọnana owian ro rhenrhen vi mẹ. Itiọrurhomẹmro, ukpokpogho o rhirhiẹ mẹ orhianẹ mi vwe ghwoghwo iyẹnrẹn esiri na-a! 17 Mi rha wian owian ọnana nẹ ẹhẹn rhe, ana kwosa ha mẹ. Ọrẹn, ọrhọ tobọ nẹ ẹhẹn mẹ rhe-e, mi ne ji ruie ghele, fọkime ọnana owian Osolobrugwẹ o tiobọnu ha mẹ. 18 Me nọ yẹ osẹkwa mẹ? Ọrẹ mi ne ghwoghwo iyẹnrẹn esiri na rẹn ihworho ọphẹ, ni mi ja rha ha ugbomọphẹ* mẹ ruiruo izede rọ sọre ọke mie ghwoghwo iyẹnrẹn esiri na.
19 Dedevwo mẹmẹ rhẹ ọvrẹn rẹn ohworho owuorowu-u, ọrẹn mi ha oma mẹ ruẹ ọvrẹn rẹn ihworho ephian, neneyo mi sabu ha userhumu rẹn ihworho buebun. 20 Harẹn itu i Ju, ni mi rhiẹ onyẹ i Ju, neneyo mi sabu ha userhumu rẹn itu i Ju. Harẹn ihworho ri ha otọre urhi, ni mi rhiẹ ohworho rọ ha otọre urhi, neneyo mi sabu ha userhumu rẹn eri ha otọre urhi, dedevwo mia ha otọre urhi-i. 21 Harẹn eri vwe vwo urhi, ni mi rhiẹ ohworho ro vwo vwo urhi, neneyo mi sabu ha userhumu rẹn eri vwe vwo urhi, dedevwo mia nyalele urhi Osolobrugwẹ, mi ji ha otọre urhi Kristi na. 22 Harẹn eri vwiẹlẹre, ni mi rhiẹ ọvwiẹlẹ neneyo mi sabu ha userhumu rẹn eri vwiẹlẹre. Mi rhiẹ i kemru kemru rẹn aruẹ ihworho ephian ne, neneyo mi sabu damoma simi ezẹko usuẹn aye. 23 Ọrẹn, mie ruẹ i kemru kemru fọkiẹ iyẹnrẹn esiri na, neneyo mi sabu ghwoghwie rẹn awọrọ.
24 Are e rhe taghene uvuẹn orhẹ ihworho buebun a zẹ, owuọwan ọvo yọ ha osa na? Are i gba zorhẹ na izede are ine vwo osa na. 25 Vwana, kohworho kohworho ro vwobọrhọ orhẹzẹ, o suẹn omayen uvuẹn ekwakwa ephian. Itiọrurhomẹmro, aye e ruẹ omaran nẹ aye i vwo erhu ọghọ rọ nọ sabu ghwọghọ. Ọrẹn, ọwan e ruie ne vwo erhu ọghọ rọ vwọ ghwọghọ. 26 Omarana, mi vwa kpare orhẹ zẹ-ẹ. Mi vwa ji bọmọ ọchẹn mẹ jerẹ ohworho rọ bọmọ aphẹrẹ-ẹ. 27 Ọrẹn, mia ghwọghwu* ugboma mẹ ji suien jerẹ ọvrẹn, neneyo mi rhe ghwoghwo rẹn awọrọ hin, nẹ emru owuorowu ọ jọ rhọ lẹrhẹ Osolobrugwẹ ten* mẹ.