Ileta Ọrukaro ra ya Vwe Itu i Kọrint
7 Vwana, sekpahen oborẹ are i ya vwe mẹ bi, mie nie taghene o fo nẹ ọhworhare ọ hobọte ọmase-e.* 2 Ọrẹn, fọkiẹ irueruo ọfanrhiẹn* rọ vuọn ekete ephian, jenẹ ọhworhare owuowu o vwo ane ọnẹyen, nẹ ọmase owuowu o vwo esa ọnẹyen. 3 Jenẹ esa ọ hẹrote edamẹ aniẹ, nẹ ọmase na o ji ruẹ omaran rẹn esa ye. 4 Ane o vwo omẹgbanhon ro no suẹn ugboma ye-en, ọrẹn esa ye yo vworie. Omaran ọ ji havwọ, esa na o vwo omẹgbanhon ro no suẹn ugboma ye-en, ukpomaran aniẹ yo vworie. 5 Esa ọrhẹ ane i vwa tiẹn omerhẹn rẹn owuowọnwa-an, jokpanẹ are awanva i kwerhọ ye uvwrọke, neneyo are i sabu fiomarhọ ẹrhomo ẹnẹ. Orho ru, are i gba rharhumu vwoma, neneyo Echu ọ jọ rhọ damu are ni fọkime are e vwo omerhesu-un. 6 Ọrẹn, mia tẹmro enana nẹ are i rhe oborẹ o fori nẹ are i ru, mi vwe je akama rẹn are-e. 7 Manẹ ihworho ephian ina sabu havwọ jerẹ omẹmẹ. Ọrẹn, Osolobrugwẹ o tiobọnu ẹghẹlẹ rẹn owuowọnwan, ọ yẹ owu ẹghẹlẹ ọnana, ọ yẹ ọreva ye ẹghẹlẹ ọrọrọ.
8 Vwana, mia ta rẹn eri vwa ji rọnmọ ọrhẹ emẹse uku na taghene ono rhomu rẹn aye orhianẹ aye i havwọ jerẹ omẹmẹ. 9 Ọrẹn, orhianẹ aye e vwo omerhesu-un, aye ina sabu rọnmọ, fọkime ono rhomu aye i rha rọnmọ ghwẹ ọrẹ aye ine vwo oruru ehware ọgbogbanhon.
10 Mia ha ọkpọvi rẹn ihworho ri rọnmọ ne taghene ane ọ vwọ hẹriẹ oma nẹ esa ye-e. Ọkpọvi ọnana o nẹ obẹ Ọrovwori na rhe. 11 Ọrẹn, ọmase na ọrhọ tobọ kwa rie dede, ọ vwọ rọnmọ ọwọrọ-ọ, ukpomaran ọ kwaphiẹrhọ rhẹ esa ye. Habaye, o fo nẹ esa ọ nyajẹ aniẹ vwo-o.
12 Ọrẹn, mẹmẹ ya tẹmro rẹn ihworho ri hẹrhẹre na, rhẹ Ọrovwori na-a, taghene: Omizu ọhworhare orho vwo ane ro vwo rhiẹ odibo i Kristi ro kweri taghene ono lelie rhirhiẹ, ọ vwọ nyajẹ aniẹ na vwo-o. 13 Omizu ọmase orho vwo esa ro vwo rhiẹ odibo i Kristi ro kweri taghene ono lelie rhirhiẹ, ọ vwọ nyajẹ esa ye vwo-o. 14 Fọkime e ruẹ esa ro vwo rhiẹ odibo i Kristi na fon ne fọkiẹ aniẹ, e ji ruẹ ane ro vwo rhiẹ odibo i Kristi na fon ne fọkiẹ esa ye. Orhiomara-an, emọ are ni ne rhiẹ ihworho ri vwa fon, ọrẹn vwana aye i fonron. 15 Ọrẹn, orhianẹ ọro vwo rhiẹ odibo i Kristi na no brorhiẹn rọ nọ kwa nẹ orọnmo na, e je vwo nọ kwa. O vwo urhi rọ mọrẹn omizu ọhworhare na yanghene omizu ọmase na uvuẹn aruẹ erhirhiẹ enana-a. Ukpomaran, Osolobrugwẹ o tiobọnu ufuoma rẹn are ne. 16 Ane, wu rheri sẹ wu na sabu simi esa? Gbinẹ esa, wu rheri sẹ wu na sabu simi anuọ?
17 Omarana, jenẹ owuowọnwan orho nyerẹn lele erhirhiẹ rọ havwọ ọke i Jehova* Osolobrugwẹ o seyi. Ọnana yẹ ọkpọvi mie tiobọnẹ rẹn ikoko na ephian. 18 O vwo ohworho re seri ọke rọ samo? Jenọ daji uvuẹn erhirhiẹ ọrana. O vwo ohworho re seri ọke rọ vwọ ji samo? Ọ vwọ samo ghwomara-an. 19 Sẹ ohworho ọ samoron yanghene ọ samo-o, ọrana o fiemru-u. Oborẹ o fiemru yẹ ọrẹ ana nyalele ekama Osolobrugwẹ. 20 Jenẹ owuowọnwan ọ daji erhirhiẹ rọ havwọ ọke re seyi. 21 E seruo ọke we rhiẹ ọvrẹn? Wu vwe jẹ ọrana kpokpuo ẹhẹ-ẹn. Ọrẹn, wu rhe vwo uphẹn wu ne vwo ugbomọphẹ, gbe rhiabọ dedie. 22 Kohworho kohworho ro rhiẹ ọvrẹn ọke Ọrovwori na o seyi, no rhiẹ odibo Ọrovwori na ro vwo ugbomọphẹ. Kohworho kohworho ro vwo ugbomọphẹ ọke re seyi, no rhiẹ ọvrẹn i Kristi. 23 A kwosa ha dẹ are, omarana are i vwe rhiẹ evrẹn ituakpọ ghwomara-an. 24 Imizu, jenẹ owuowọnwan ọ daji erhirhiẹ rọ havwọ ọke re seyi uvuẹn obaro Osolobrugwẹ.
25 Vwana, sekpahen eri vwe ji chiọghọ,* Ọrovwori na o tiobọnu akama owuorowu ha mẹ-ẹ, ọrẹn ri mie rhiẹ ohworho rọ fuephan rẹ Ọrovwori na o ji gbe arodọmẹ riẹn na, mi na ha irorẹdjẹ mẹ phia. 26 Omarana, fọkiẹ oborẹ ekwakwa i gbanhon lele vwana, mie nie taghene ono rhomu orhianẹ ọhworhare ọ daji erhirhiẹ rọ havwọ na. 27 Wu vwo ane ne? Wu vwa gwọlọ izede wu na nyajevwo-o. Wẹwẹ ohworho ro vwo vwo ane? Wu vwa gwọlọ ọmase wu na rọnmọ-ọ. 28 Ọrẹn wu rha tobọ rọnmọ dede, we ruẹ ọdanda-an. Ohworho ro vwo ji chiọghọ ọrhọ rọnmọ, o ruẹ ọdanda-an. Ọrẹn eri rọnmọren, ine vwo ukpokpogho uvuẹn ugboma aye. Mia gwọlọ nẹ ọrana ọ phia rẹn are-e.
29 Habaye imizu, mia ta rẹn are taghene ọke rọ hẹrhẹre orho bu-un. Nẹ ọke ọnana nyarhẹn, jenẹ ihworho ri vwo ane, i ru kamẹriẹn aye e vwo-o. 30 Jenẹ ihworho ra viẹ i ru kamẹriẹn aye i vwa viẹ-ẹ, jenẹ ihworho ra ghọghọ i ru kamẹriẹn aye i vwa ghọghọ-ọ, jenẹ ihworho ra dẹ ekwakwa, i ru kamẹriẹn aye e vwo emru owuorowu-u. 31 Jenẹ ihworho ra ha akpọ na ruiruo, i ru kamẹriẹn aye i vwa haye ruiruo vuọnvuọ-ọn. Fọkime erhirhiẹ akpọ ọnana o wene. 32 Itiọrurhomẹmro, mia gwọlọ nẹ are i vwo ọfiamu-u. Ọhworhare rọ vwọ ji rọnmọ o vwo ọfiamu kpahen ekwakwa Ọrovwori na, ọrhẹ oborẹ ono ru vwo ekwerhọ Ọrovwori na. 33 Ọrẹn, ọhworhare rọ rọnmọ ne o vwo ọfiamu kpahen ekwakwa akpọ na ọrhẹ oborẹ ono ru vwo ekwerhọ aniẹ. 34 Omarana, ẹhẹn yen nọ ghalẹ. Habaye, ọmase rọ vwọ ji rọnmọ ọrhẹ ọro vwo ji chiọghọ, o vwo ọfiamu kpahen ekwakwa Ọrovwori na, neneyo ọ sabu fon uvuẹn ugboma ọrhẹ uvuẹn ẹhẹn yen. Ọrẹn, ọmase rọ rọnmọ ne, o vwo ọfiamu kpahen ekwakwa akpọ na ọrhẹ oborẹ ono ru vwo ekwerhọ esa ye. 35 Mia tẹmro enana fọkiẹ erhumu are, rhẹ ọrẹ mi ne jurhi rẹn* are-e. Ukpomaran, no mwu are ruẹ oborẹ o serhọ, nẹ are i ji rha ga Ọrovwori na ọke ephian vabọ ẹhẹn rọ ghalẹre.
36 Orhianẹ ohworho o roro taghene ọ vwọ sabu suẹn oruru ehware ọnẹyen fọkime ọ ji rọnmọ-ọ,* ọrhọ ji vrẹn ọke oruru ehware uphuphẹn ne, ọnana yẹ oborẹ ono ruo: Jeno ru oborẹ ọ gwọlọre, o ruẹ ọdanda-an. Jenẹ aye i rọnmọ. 37 Ọrẹn, orhianẹ o mwu ohworho ẹro ne uvuẹn ọmuduie taghene o vwo oborẹ ọsoriẹ ọnọ rọnmọ-ọ, orho ji vwo omẹgbanhon ro no sun oruru ọnẹyen, orho ji brorhiẹn ne taghene ọ rọnmọ-ọ,* ọravwọ ono rhe ru. 38 Omaran ọ ji havwọ, kohworho kohworho rọ rọnmọren,* ono ru rhomu, ọrẹn ohworho rọ vwọ rọnmọ yọ nọ mai ru rhomu.
39 Ane ọ ha otọre esa ye, uvwrọke esa na o ji nyerẹn. Ọrẹn, esa ye orho hwu, ọnọ sabu rọnmọ kohworho kohworho rọ gwọlọre uvuẹn Ọrovwori na ọvo. 40 Ọrẹn, mie nie taghene oma ọnọ merhiẹn orhianẹ ọ rharhumu rọnmọ-ọ. O ji mwu mẹ ẹro taghene ẹhẹn ọfuanfon Osolobrugwẹ yo mwu mẹ tẹmro enana.