Ileta Ọrukaro ra ya Vwe Itu i Kọrint
4 O fori nẹ ihworho i ni ame rhẹ era wian rẹn i Kristi, ọrhẹ idibo ra hẹrote odjahen ọfuanfon Osolobrugwẹ. 2 Omarana, oborẹ a gwọlọ mie idibo yẹ ọrẹ aye ina fuephan. 3 Vwana, o fiemru mẹ orhianẹ are yanghene oghwa ẹghware ituakpọ yi hare mẹ guẹnzọ-ọn. Itiọrurhomẹmro, mi vwa tobọ ha omamẹ guẹnzọ-ọn. 4 Fọkime mie rhe sẹ mi ruẹ emru owuorowu sọ-ọ. Ọrẹn, ọrana o dje mẹ rhiẹ ọvwata-a, Jehova* yo ni mẹ sua. 5 Omarana, are i vwa ha emru owuorowu guẹnzọn bọmọke ọke re bruru na ono te-e, nọyẹ bọmọke Ọrovwori na ọnọ rhe. Ọye ono ghwolo odjahen re ruru uvuẹn okuku rhiẹ ude, ji ghwolo oborẹ ọ ha uvuẹn ọmudu na phia. Ọke ọrana, owuowọnwan nọ nọ mẹrẹn ujiri mie Osolobrugwẹ.
6 Imizu, mi tẹmro enana kpahen oma mẹ ọrhẹ Apolọs fọkiẹ erhumu are. Neneyo nyoma udje ame, are ni na sabu ru lele ẹmro ọnana: “Are i vwe ru vrẹn oborẹ a ya rhotọre-e,” nẹ are i ja rha kparoma yanghene rhe ni ihworho ruẹ. 7 Fọkime ọrọmo yo ruru are vẹnẹ awọrọ? Itiọrurhomẹmro, me yẹ are i vwori re vwe tiobọnu rẹn are? Orhianẹ e tiobọnie rẹn are, mesoriẹ are a kparoma kamẹriẹn e tiobọnie rẹn are-e?
8 Are i ghwanreriẹn vwo i kemru kemru are i gwọlọre ne? Are i ghwanreriẹn fe ne? Are i rorori taghene are e suẹn ẹrhẹ irodje jẹ ame vwo ne? Manẹ oma ọ merhen mẹ orhianẹ are e suẹn ẹrhẹ irodje ne, neneyo ame i ji lele are sun jerẹ irodje. 9 Ha mẹ, mie nie taghene Osolobrugwẹ ọ harẹ ame ri rhiẹ inyikọ na phia kerhumu jerẹ ihworho re brorhiẹn uhwu kpe. Ame ni họhọ ihworho ra ha ughe phia uvuẹn afiughe, rẹ akpọ na, emakashe ọrhẹ ituakpọ e nẹ. 10 Ame ivwidjigbo fọkiẹ i Kristi, ọrẹn are evwẹghwanren uvuẹn i Kristi na. Ame i vwiẹlẹre, ọrẹn are i gbanhonma. E brọghọ rhẹ are oma, ọrẹn e brọghọ rhẹ ame oma-a. 11 Me te unọke ọnana, orhọmo o kpe ame, uhrun ame ọ ka ame, ewun ọ kanren ame,* e kpe ame,* ame e ji vwo oghwa ame ine rhirhiẹ-ẹ. 12 Ame a ji ha obọ ame wian gbanhan. Erhe phien ame, ame na ha ebrurhọ phia. Arha kparehaso ame, ame ne diẹn rhẹ erhionrin. 13 Arha rhaphiẹ ame, ame na kpahanrhọ bọrọbọrọ.* Ame i me rhiẹ otele* ọrẹ akpọ na ne, ro tuẹn ihworho ephian oma me te i wanana.
14 Mi vwa ya ẹmro enana neneyo ofa ọ ruẹ are-e. Ukpomaran, mia ha urhebro rẹn are jerẹ emọ mi vwo ẹgwọlọ kpahen. 15 Dedevwo are i vwo awan 10,000 ra hẹrote are uvuẹn i Kristi na, are e vwo esẹ buebu-un. Ọrẹn, mi me rhiẹ ọsẹ rẹn are ne uvuẹn i Kristi Jesu nyoma iyẹnrẹn esiri na. 16 Omarana, mia ha urhebro rẹn are nẹ are i hẹrokeli mẹ. 17 Ọnana yọ soriẹ mie dje i Timoti vwe are, fọkime ọye ọmọ mẹ mi vwo ẹgwọlọ kpahen rọ fuephan uvuẹn Ọrovwori na. Ọnọ karorhọ are kpahen ena mia ha wian owian i Kristi Jesu, ri mie ji yono ihworho uvuẹn ikoko ri ha ekete ephian.
18 Ezẹko usuẹn are, a kparoma kamẹriẹn mi vwe bru are sa-a. 19 Ọrẹn, orho rhiẹ ọhọre i Jehova,* mi ne bru are rhe phẹrẹkpẹ. Ọke ọrana, ni mi na mẹrẹn omẹgbanhon rẹ ihworho ra kparoma na i vwori, ukperẹ mi ne rhon ẹmro aye ọvo. 20 Fọkime Uvie Osolobrugwẹ o sekpahen ẹmro ra ta-a, ọrẹn ọ sekpahen omẹgbanhon. 21 Ọgo yọ nọ mai je are? Mi ha uphianphian ba lele oma rhe, gbinẹ mi rhe rhẹ ẹgwọlọ kugbe ẹhẹn bọrọbọrọ?