Ileta Ọrukaro ra ya Vwe Itu i Kọrint
5 Itiọrurhomẹmro, a nẹ iyẹnrẹn mẹ kpahen irueruo ọfanrhiẹn* rọ ha uvwre are, a ji tobọ mẹrẹn aruẹ ọfanrhiẹn* ọnana dẹ uvwre egbamwa na-a. Mi rhonrin taghene ọhworhare owu o lele aniẹ ọsẹ ye rhirhiẹ. 2 Are na haye kparoma? O fo nẹ are i mwuomarhọ, neneyo e tiẹ ohworho ro ruẹ ọdandan ọnana nẹ uvwre are? 3 Dedevwo mia ha avwaye rhẹ are-e, ọrẹn mẹmẹ ọrhẹ are i havwiẹ ọrẹ ẹhẹn. Mi ji ghwanriẹn ha ọhworhare ro ruẹ ọdandan ọnana guẹnzọn ne, kamẹriẹn mi ha avwaye. 4 Are i rhe koko uvuẹn odẹ Ọrovwori ọwan Jesu, are i rhe taghene mẹmẹ ọrhẹ are i havwiẹ ọrẹ ẹhẹn, kugbe omẹgbanhon Ọrovwori ọwan Jesu. 5 Are ine vi tiobọnu aruẹ ọhworhare ọrana rẹn Echu, na sabu fiobarhọ ọdandan ro ruru na, neneyo a sẹrorẹ ukoko na uvuẹn ẹdẹ Ọrovwori na.
6 Omẹkpare are o serhọ-ọ. Are e rhe taghene ibiẹ iyisti* yọ lẹrhẹ ọsoso iflawa re gbe kugbe na phie? 7 Are i tiẹ iyisti* ahwanren na nie, neneyo are i sabu rhiẹ iflawa ọkpokpọ re gbe kugbe ro vwo vwo oborẹ ọ lẹrhiẹ phie.* Itiọrurhomẹmro, a ha i Kristi ro rhiẹ Ọmogegede Orẹ Ọnyavrẹn na ze izobo ne. 8 Omarana, jena rha riorẹ Ọnyavrẹn na, ọrẹn a vwa riẹ rhẹ iyisti* ahwanren na-a, yanghene iyisti obiobiomu ọrhẹ irueruo ọko-on. Ukpomaran, jena riẹ rhẹ ibrẹdi ro vwo vwo iyisti,* nọyẹ ibrẹdi ephẹnfuọn ọrhẹ urhomẹmro.
9 Uvuẹn ileta mi ya vwe are, mi ta rẹn are taghene are i vwe kwomakugbe ihworho re vwobọrhọ irueruo ọfanrhiẹ-ẹn.* 10 Mi vwa ta taghene are i hẹriẹ oma phẹlẹphẹlẹ rẹn evwọfanrhiẹn,* yanghene evwuphele, yanghene ere ken ekwakwa awan ha, yanghene egehọ erẹ akpọ ọnana-a. Orho rhiomaran, nọyẹ are ina kwa nẹ akpọ na. 11 Ọrẹn vwana, mia ya vwe are taghene are i vwe kwomakugbe ohworho owuorowu re se omizu ro rhiẹ ọvwọfanrhiẹn,* yanghene ọvwuphele yanghene ọgehọ yanghene ọro phien awan, yanghene ọdinyo, yanghene ọro ken ekwakwa awan ha-a. Are i vwa tobọ lele aruẹ ohworho ọrana riẹ emaren kugbe-e. 12 Me yo teri mẹ te ẹzenguon ihworho otafe na? O fori nẹ are i ha ihworho ri ha uvuien guẹnzọn. 13 Osolobrugwẹ nọ nọ ha ihworho ri ha otafe na guẹnzọn. “Are i tiẹ ọvwọkon na nẹ uvwre are.”