Ileta Ọrukaro ra ya Vwe Itu i Kọrint
3 Omarana imizu, mia sabu tẹmro rẹn are jerẹ ihworho rẹ ẹhẹn ọfuanfon na o suẹ-ẹn. Ukpomaran, mi tẹmro rẹn are jerẹ ihworho rẹ ojemẹ ugboma na o suẹn, kamẹriẹn are emeboban uvuẹn i Kristi na. 2 Mi ha imiki ghẹrẹ are ukperẹ ono rhiẹ emaren eghwaghwa, fọkime are a ji ghwanren te-e. Itiọrurhomẹmro, are a ji tobọ ghwanren te vwana-a, 3 fọkime are a ji nyalele ojemẹ ugboma na. Ra mẹriẹn taghene omẹriọ ọrhẹ ẹghwọ ọ ha uvwre are, nọyẹ are a nyalele ojemẹ ugboma na ji hẹrokele ihworho akpọ na. 4 Fọkime owuọwan ọrhọ ta taghene, “obọrẹ i Pọl yi mi havwọ,” ọwọrọ nọ ta taghene, “obọrẹ Apolọs yi mi havwọ,” rhẹ ihworho akpọ na yẹ are a hẹrokele na?
5 Ọrọmo yẹ Apolọs? Ọrọmo yi Pọl? Ame idibo ri ha userhumu rẹn are rhiẹ idibo i Kristi. Ame a ghwai wian owian Ọrovwori na o tiobọnu rẹn ame. 6 Mẹmẹ yi wọ ewawọ na, Apolọs nọ yọ balẹ ame ghwuie, ọrẹn Osolobrugwẹ yọ lẹrhiẹ dua. 7 Omarana, rhẹ ohworho rọ wọ ewawọ na yanghene ọrọ balẹ ame ghwu aye yọ lẹrherẹ aye do-o, ukpomaran Osolobrugwẹ yọ lẹrhiẹ dua. 8 Vwana, ọrọ wọ ewawọ na ọrhẹ ọrọ balẹ ame ghwu aye, a wian ọrẹ okugbe.* Ọrẹn, owuowọnwan ọnọ mẹrẹn osẹkwa ye lele owian yen. 9 Fọkime ame e leli Osolobrugwẹ wian kugbe. Are yẹ ikebi Osolobrugwẹ ọ hẹrote, ọrhẹ oghwa Osolobrugwẹ ọ bọn.
10 Lele ẹghẹlẹ esiri rode Osolobrugwẹ re tiobọnu mẹ, ni mi tọn usimo fọkime mẹmẹ ọwena ebanbọn rọ tẹn ona.* Ọrẹn, ọwọrọ nọ bọn rhẹ oberun usimo na. Omarana, jenẹ owuowọnwan orho ni omayen sua kpahen oborẹ ọ bọn rhẹ oberun usimo na lele. 11 Fọkime o vwo ohworho ọrọrọ rọ nọ sabu tọn usimo ọrọrọ ghwẹ ọrẹ a ghwanreriẹn tọn na-a, nọyẹ i Jesu Kristi. 12 Vwana, ohworho ọnọ sabu ha oro, idọlọ efuanfon, itita eghoghanren, erhan, odin yanghene eyareya bọn rhọ oberun usimo na. 13 Ọrẹn, ẹdẹ owu ono te re ne rhe oborẹ owian owuowọnwan ọ ghini havwọ, fọkime erhanren na ono dje aruẹ owian owuowọnwan ọ wianren phia. 14 Orhianẹ oborẹ ohworho ọ bọn rhẹ oberun usimo na, ọ torhẹ-ẹ, na na kwosa rẹn ọravwọ. 15 Ọrẹn, orhianẹ oborẹ ohworho na ọ bọnren ọ torhẹre, ọravwọ nọ nọ rioja ye. Dedevwo ọravwọ ono simirhọ, ọrẹn ọnọ họhọ ohworho re simi nẹ erhanren.
16 Are e rhe taghene are yẹ oghwa ẹga Osolobrugwẹ? Are e ji rhe taghene ẹhẹn ọfuanfon Osolobrugwẹ ọ ha uvuẹn oma are? 17 Ohworho ọrhọ ghwọghọ oghwa ẹga Osolobrugwẹ, Osolobrugwẹ ọnọ ghwọghọ ọravwọ. Fọkime oghwa ẹga Osolobrugwẹ ọfuanfon, are yẹ oghwa ẹga ọrana.
18 E vwe jenẹ ohworho owuorowu ọ phiẹ omayen rhọ-ọ: Owuọwan usuẹn are na orho roro taghene ọye o vwo ẹghwanren uvuẹn enyerakpọ ọnana,* jeno rhiẹ ọvwidjigbo neneyo ọ sabu ghwanren. 19 Fọkime ẹghwanren akpọ ọnana, emru idjigbo rẹn Osolobrugwẹ, jerẹ oborẹ a ya rhotọre: “O mwu evwẹghwanren na ọke aye e kporo ena aye.” 20 A ji ya ye rhotọre taghene: “Jehova o rheri taghene iroro evwẹghwanren na emru ofefe.” 21 Omarana, e vwe jẹ ohworho owuorowu ọ ha ituakpọ yenya-an, fọkime are yi vwo ekwakwa ephian. 22 Sẹ i Pọl, yanghene Apolọs yanghene i Sifas,* yanghene akpọ na, yanghene arhọ, yanghene uhwu, yanghene ekwakwa ri havwiẹ vwana, yanghene ekwakwa ra sa obaro na, are yi vwo ekwakwa ephian. 23 Habaye, Kristi yo vwori are, Osolobrugwẹ nọ yo vwo i Kristi na.