Ewian Inyikọ na
4 Vwana irherẹn na, ọlọkpa oghwa ẹga na ọrhẹ itu i Sadusi na ni mọ vwa i Pita ọrhẹ i Jọn, ọke aye a ji tẹmro rẹn ihworho na. 2 Ephan no biomu aye fọkime inyikọ na e yono ihworho ji ghwoghwo uvuẹn afiede kpahen ẹrhọmọnuhwu i Jesu. 3 Aye ni mwurun aye ye fi rhẹ ekanron ye te ẹdẹ ọreva ye, fọkime owuọwọn o te ne. 4 Ọrẹn, ihworho buebun ri kerhọ ẹmro aye ni me rhiẹ idibo i Kristi, uchunu ehworhare ri rhiẹ idibo ni bun te emrẹ 5,000.
5 Uvuẹn ẹdẹ ọreva ye, ere suẹn na, ekpako na, ọrhẹ eyẹbe na ni kokori uvuẹn i Jerusalẹm. 6 Omaran ji te Anas ro rhiẹ olori irherẹn na, Keyafas, Jọn, Alẹzẹnda kugbe ọsoso ekrun olori irherẹn na. 7 Aye ni ha i Pita ọrhẹ i Jọn mevi erhẹrhẹ aye ji nọ aye: “Nyoma omẹgbanhon ọrọmo yanghene odẹ ọrọmo yẹ are e ruẹ emru ọnana?” 8 Ọke ẹhẹn ọfuanfon na ọ vuọn oma i Pita, nọ ta rẹn aye:
“Are re suẹn ihworho na kugbe ekpako na, 9 orhianẹ are a nọ ame enọ inyenana fọkime ame i ruẹ oborẹ orhomurun rẹn ukpolo na, are i rha ji gwọlọ rhe ohworho ro simirien, 10 jenẹ are ephian ọrhẹ ọsoso ihworho Izrẹl i rhe taghene uvuẹn odẹ i Jesu Kristi ro rhiẹ onyẹ i Nazarẹt na, yẹ ọhworhare ọnana o mevi obaro are rhẹ omọkpokpọ. Jesu ọnana yẹ are i kpe mwu orhan hwu na, ọrẹn Osolobrugwẹ nọ rhọmeriẹn. 11 Ọye yẹ ‘atita rẹ are ra bọn ebanbọn i nirin sakamu, ọrẹn ọ ghwẹriẹ rhiẹ atita rọ mai ghanren* ne.’ 12 Habaye, o vwo ohworho ọrọrọ rọ nọ sabu simi ọwa-an, jokpanẹ ọye ọvo. O ji vwo odẹ ọrọrọ uvuẹn otọre odjuwu na re mwu rẹn ituakpọ ra na nyoma yen vwo usimi-i.”
13 Vwana, ọke aye a mẹrẹn uduefigbere* i Pita ọrhẹ i Jọn, ji mẹrẹnvwrurhe taghene aye ihworho ri vwe riẹ isukuru* ọrhẹ ehworhare kpekpa, no gberẹ aye unu omamọ. Aye ni mẹrẹnvwrurhe taghene aye ọrhẹ i Jesu i havwiẹ bi. 14 Ọke aye a mẹrẹn ọhworhare rẹ idibo awanva na i simirin na ro lelirẹ aye mevi avwaye, aye arha sabu tẹmro owuorowu-u. 15 Omarana, aye ni ta rẹn idibo na nẹ aye i ruẹ otafe nẹ i Sanhẹdrin na, aye na djiroro uvwre oma aye. 16 Aye na ta: “Me ye ne ruẹ ehworhare enana? Fọkime itiọrurhomẹmro, aye i ruẹ emru igbevwunu. Ọsoso ihworho ri ha i Jerusalẹm i ji rhe kpahiẹn, ọwan i sabu tiẹ-ẹn. 17 Ọrẹn, nẹ iyẹnrẹn ọnana o jo rho kerabọ uvwre ihworho na ghwẹ omana, jena djofẹn mwu aye ji ta rẹn aye taghene aye i vwa ta rẹn ohworho owuorowu kpahen odẹ ọnana ghwomara-an.”
18 Omarana, aye ni serẹ aye ji jurhi rẹn aye taghene aye i vwa tẹmro owuorowu yanghene yono ihworho kpahen odẹ i Jesu-u. 19 Ọrẹn, Pita ọrhẹ i Jọn ni kpahenrhọ rẹn aye taghene: “Sẹ o fori uvuẹn obaro Osolobrugwẹ rẹ ame ina kerhọ are ukperẹ ono rhiẹ Osolobrugwẹ, are ọvo i gbe brorhiẹn yen. 20 Ọrẹn harẹn ame, ame i sabu dunujẹ taghene ame i ta kpahen ekwakwa ame i mẹrẹnren ji rhon ne-e.” 21 Omarana, ọke aye a rharhumu djofẹn mwu aye hin, aye ni tiobọnu aye, fọkime aye a mẹrẹn emru owuorowu aye i ruru ra na fọkiẹ ha oja riẹ aye-e. Habaye, aye a zofẹn ihworho na, fọkime aye ephian e jiri Osolobrugwẹ fọkiẹ oborẹ ọ phiare na. 22 Habaye, ọhworhare re simirin izede igbevwunu* na ọ vrẹn ẹgbukpe 40 ne.
23 Ọke re tiobọnu inyikọ na, aye ni bru idibo ri hẹrhẹre na ji nẹ iyẹnrẹn rẹn aye kpahen oborẹ ilori irherẹn na ọrhẹ ekpako na i ta rẹn aye. 24 Ọke aye e rhon ọnana, aye ephian ni kwunu kugbe kperi se Osolobrugwẹ, ji ta:
“Ọrovwori Rọmai Rierun, wẹwẹ yi ma odjuwu ọrhẹ otọrakpọ na kugbe urhie ọduado na ọrhẹ ọsoso ekwakwa ri ha uvuẹn aye. 25 Nyoma ẹhẹn ọfuanfon na, ne wu tare nyoma unu i Devid ro rhiẹ ọsẹ ame rode ọrhẹ odibo ọnọ taghene: ‘Mesoriẹ ephan o biomu egbamwa na? Mesoriẹ ihworho e roro kodo kpahen ekwakwa ifefe? 26 Irodje otọrakpọ na i mwuegbe aye ina wọnrọn, ere suẹn na i kwomakugbe haso i Jehova* ọrhẹ ohworho rọ djẹha na.’* 27 Itiọrurhomẹmro, Hẹrọd, Pọntiọs Pailet ọrhẹ ehworhare egbamwa na, kugbe ihworho Izrẹl i kwomakugbe uvuẹn amwa ọnana haso i Jesu ro rhiẹ odibo ọfuanfon ọnọ, re wu djẹha na, 28 neneyo aye i ruẹ oborẹ wu* mẹraro rhotọre. Ọnana ọ phiare fọkiẹ omẹgbanhuọn ọrhẹ ọhọruọ. 29 Vwana Jehova,* gba kpomavi rẹn oborẹ aye a djofẹn mwu ame, ne wu ha userhumu rẹn evrẹn enọ rha tẹmro ọnọ rhẹ ohinmi, 30 jeghwai rionbọ ọnọ ha simi ihworho, ne wu ruẹ eka ọrhẹ igbevwunu nyoma odẹ i Jesu ro rhiẹ odibo ọfuanfon ọnọ.”
31 Ọke aye a rẹ* Osolobrugwẹ hin, ekete aye i koko rhọ na no kpoghori, ẹhẹn ọfuanfon na nọ vuọn oma aye ephian, aye na tẹmro Osolobrugwẹ rhẹ ohinmi.
32 Habaye, otu buebun ri rhiẹ idibo i Kristi ni vwo ẹhẹn owu,* o vwo owuọwan usuẹn aye rọ tare taghene ọye ọvo yo vwo enyerẹn ye-en. Ukpomaran, aye na ghalẹ ekwakwa ephian kuẹgbe. 33 Inyikọ na ne ghwoghwo kpahen ẹrhọmọnuhwu Ọrovwori Jesu, rhẹ omẹgbanhon rode ọke ephian. Aye ephian ni vwo ẹghẹlẹ esiri rode. 34 Itiọrurhomẹmro, o vwo owuọwan usuẹn aye re emru owuorowu ọ kanranre-en. Fọkime ọsoso ihworho na, na rhẹ ikebi yanghene eghwa aye, aye na ha igho na sa. 35 Aye na ha aye kpahontọre rẹn inyikọ na. Orho ru, na ghaliẹ rẹn owuowọnwan lele edamẹ aye. 36 Josẹf rẹ inyikọ na e ji se i Banabas (ro mevirhọ “Ọmọ Urhebro”), ro rhiẹ onyẹ i Livai ọrhẹ ọmotọre i Saiprọs, 37 nọ rhẹ otọre owu ro vwori. Omarana, nọ ha igho na rhe ji haye kpahontọre rẹn inyikọ na.