Ewian Inyikọ na
5 Ọrẹn, ọhworhare owu re se Ananayas kugbe aniẹ re se Safaira, ni rhẹ otọre. 2 Nọ bẹbẹ tiẹ igho otọre na ezẹko nu, nọ ha ọrọ hẹrhẹre na rhe, ji haye kpahontọre rẹn inyikọ na, aniẹ o rhe kpahen ọnana. 3 Ọrẹn, Pita nọ nọriẹn: “Ananayas, mesoriẹ Echu ọ lẹrhuọ vwo udu ne wu mọrenfian rẹn ẹhẹn ọfuanfon na, ji bẹbẹ tiẹ igho otọre na ezẹko nu? 4 Ọke wu vwa ji rhẹ otọre na, rhẹ owẹwẹ yi vworie? Ọke wa ji rhẹ ye hin, rhẹ owẹwẹ yi ne brorhiẹn oborẹ wu na haye ru? Mesoriẹ we vwo iroro ọkon ọnana uvuẹn ọmuduo? Rhẹ ituakpọ ye wu mọrenfian riẹ-ẹn. Ukpomaran wu mọrenfian rẹn Osolobrugwẹ.” 5 Ọke Ananayas o rhon ẹmro enana, no se bruotọre ji hwu. Ofẹn no mwu ọsoso ihworho ri rhon kpahen iyẹnrẹn na. 6 Idama ezẹko ri ha avwaye, ni vẹnrẹnren ji ha ewẹn fariẹ, aye ni kpareriẹ riẹ otafe ye sion.
7 Vwana, ọke emrẹ unọke esa a vrẹn, aniẹ nọ rhere. Ọrẹn, o rhe oborẹ ọ phiare-e. 8 Pita nọ nọriẹn: “Ta mẹ, ọnana yẹ ọsoso igho are awanva i rhẹ otọre na?” Nọ kpahenrhọ ye: “Ee, ọrana yẹ ọsosuiẹ.” 9 Omarana, Pita nọ ta riẹn: “Mesoriẹ are awanva a djiroro rẹ are ina damu ẹhẹn i Jehova* ni? Nughe! Ihworho ri kparẹ esa ye sion, i te anurẹsẹ na ne, aye ina ji kparuọ nyarhẹn.” 10 Ogege, no se kẹrẹ aghwẹ i Pita ji hwu. Ọke idama na a ghwẹrioma rhe, aye ni mẹrenriẹn taghene o hwu ne. Aye ni kpareriẹ ye sion kẹrẹ esa ye. 11 Omarana, ofẹn no mwu ọsoso ukoko na ọrhẹ ihworho ephian ri rhon iyẹnrẹn enana.
12 Habaye, inyikọ na ne ruẹ eka ọrhẹ ekwakwa igbevwunu buebun uvwre ihworho na. Aye ephian na vwoma uvuẹn Ivaranda i Solomọn. 13 Itiọrurhomẹmro, awọrọ e hinmi kwomakugbe idibo na-a. Ọrẹn ihworho na, na dabu ta omamọ ẹmro kpahen aye. 14 Haba ọrana, ehworhare ọrhẹ emẹse buebun ni vwo imwẹro kpahen Ọrovwori na, aye ni rhiẹ idibo i Kristi. 15 Ihworho na tobọ kpare ere kpomẹ ruẹ idumu eduado na, ji ha aye semerhẹn ekpa ekokamu ọrhẹ ibiba, neneyo uhoho i Pita ọ sabu te ezẹko usuẹn aye ọrhọ nyavrẹn. 16 Habaye, otu buebun ri nẹ emwa ri kinhariẹ i Jerusalẹm, na ji ghwiẹ sa. Aye na kpare ihworho re kpomẹ ọrhẹ erẹ ikpodje e kpokpo bru inyikọ na, ne simirin aye ephian.
17 Ọrẹn, orherẹn ọduado na ọrhẹ ọsoso ihworho re lelie ni vẹnrẹn mevi, nọyẹ eri ha usuẹn ẹko itu i Sadusi na, aye na rioma kpahen aye. 18 Aye ni mwu inyikọ na ye firhẹ ekanron rọ ha amwa na. 19 Ọrẹn ọke ason o te, ọmakashe i Jehova* no je ighwe ekanron na ji ha inyikọ na phia, nọ ta rẹn aye: 20 “Are i nyarhẹn ye mevi oghwa ẹga na, nẹ are i rha ta rẹn ihworho kpahen ọsoso iyẹnrẹn ro sekpahen akpọ rọ sa na.” 21 Ọke aye e rhon ẹmro ọnana, aye ni ruẹ oghwa ẹga na urhiọke ye yono ihworho.
Ọke orherẹn ọduado na ọrhẹ ihworho re lelie a rhe, aye ni se ọsoso i Sanhẹdrin na ọrhẹ ekpako emọ Izrẹl na koko, aye ni dje elọkpa ya ha inyikọ na nẹ ekanron na rhe. 22 Ọrẹn ọke elọkpa na e te ekanron na, aye a mẹrẹn aye uvuie-en. Omarana, aye ni ghwẹrioma ya nẹ iyẹnrẹn 23 taghene: “Ame i mẹrenriẹn taghene a dabu kanren ighwe ekanron na, edẹrotọre na i ji mevi ekete ighwe na. Ọrẹn ọke ame e je ighwe na, ame a mẹrẹn ohworho owuorowu uvuie-en.” 24 Omarana, ọke olotu oghwa ẹga na ọrhẹ ilori irherẹn na e rhon ẹmro enana, aye ne roro kpahen oborẹ ọnọ sabu nerhumie rhe. 25 Ọrẹn, ohworho owu nọ rhe mọ nẹ iyẹnrẹn rẹn aye taghene: “Nughe! Ehworhare rẹ are i mwu rhẹ ekanron na, i ha uvuẹn oghwa ẹga na, aye i mevi avwaye re yono ihworho.” 26 Omarana, olotu na kugbe elọkpa enẹyen ezẹko ni nyarhẹn ya ha aye rhe, ọrẹn aye e gbozighi-i, fọkime aye a zofẹn nẹ ihworho na i je rhe fiẹ aye.
27 Omarana, aye ni harẹ aye mevi obaro i Sanhẹdrin na. Orherẹn ọduado na nọ ta rẹn aye 28 taghene: “Ame i jurhi rẹn are taghene are i vwe ghwoghwo kpahen odẹ ọnana ghwomara-an, ọrẹn nughe! are i ha iyono are vuọn ọsoso i Jerusalẹm ne, are i ji gwọlọ nẹ ọbara ọhworhare ọnana ọ daji urhomu ame.” 29 Pita ọrhẹ inyikọ ri hẹrhẹre na ni kpahenrhọ rẹn aye taghene: “Osolobrugwẹ yẹ osun rẹ ame ina vi huphele yi, ukperẹ ono rhiẹ ituakpọ. 30 Osolobrugwẹ esẹ ame ride, ọ rhọmọ i Jesu rẹ are i kpe mwu orhan hwu na. 31 Osolobrugwẹ nọ kpareriẹ riẹ obọrhen ọnẹyen, ji haye mwu ẹrhẹ Olori Arhọ ọrhẹ Osimi, neneyo emọ Izrẹl i sabu ghwẹriẹ, na ji harhomu edandan aye. 32 Ame e se oseri kpahen ekwakwa enana, omaran ji te ẹhẹn ọfuanfon na rẹ Osolobrugwẹ ro rhiẹ Osun, o tiobọnẹ rẹn ihworho ra huphele yi.”
33 Ọke aye e rhon ọnana, aye na tuekwẹre gbangbanhon, aye na gwọlọ kpe inyikọ na hwuẹ. 34 Ọrẹn, onyẹ i Farisi owu re se i Gamaliẹl no vẹnrẹn mevi uvuẹn i Sanhẹdrin na. Gamaliẹl oyono ọrẹ Urhi na rẹ ihworho ephian e mwuọghọ riẹn. Nọ tare taghene a ha inyikọ na riẹ otafe ibiọke. 35 Nọ ta rẹn aye: “Ihworho Izrẹl, are i jomarhotọre fọkiẹ oborẹ are a gwọlọ ruẹ ehworhare enana. 36 Jerẹ udje, bọmọke ọke ọnana o ki te, Tiudas ọ homaphia ji ta taghene ọye ohworho ọduado, ihworho ri te emrẹ 400 ni kwomakugbe ẹko ọnẹyen. Ọrẹn ne kperie hwu, ọsoso ihworho ri kwomakugbe yi ni hrabọ, erhe rhon mie aye ghwomara-an. 37 Ọrana o nie, Judas ro rhiẹ onyẹ i Galili nọ ji homaphia uvwrọke ihworho a ya edẹ rhotọre, ihworho buebun ni ji ghwiẹ lelie. Ọrẹn, ọke ọhworhare ọrana o hwu, ọsoso ihworho ra nyalelie ni hrabọ. 38 Omarana, lele ẹmro rọ ha otọre na, mia ta rẹn are taghene are i vwe gbe ọyanghan rhẹ owian ihworho enana-a, ọrẹn are i nyaji aye vwo. Orhianẹ irorẹdjẹ yanghene owian ọnana o nẹ obẹ ituakpọ rhe, ono sefughwẹ. 39 Ọrẹn, orho nẹ obẹ Osolobrugwẹ rhe, are i sabu fiẹ aye kparobọ-ọ. Are i jomarhotọre nẹ are i je rhe rhiẹ ihworho ra wọnrọn hasuẹ Osolobrugwẹ.” 40 Omarana, aye ni ha urhebro yi ji se inyikọ na, ọke aye a fa aye hin, aye ni jurhi rẹn aye taghene aye i vwa tẹmro kpahen odẹ i Jesu ghwomara-an, aye ni tiobọnu aye.
41 Omarana, inyikọ na ni nẹ uvuẹn i Sanhẹdrin na rhẹ aghọghọ, fọkime e kelirẹ aye ba ihworho ri mwuovwan ra na ha oja re fọkiẹ odẹ i Jesu. 42 Kẹdẹkẹdẹ uvuẹn oghwa ẹga na ọrhẹ nẹ oghwa riẹ oghwa, aye ne yono ihworho ji ghwoghwo iyẹnrẹn esiri na ọke ephian kpahen i Kristi Jesu.