Ewian Inyikọ na
3 Vwana, Pita ọrhẹ i Jọn ni riẹ oghwa ẹga na uvwrọke ra nẹrhomo, nọyẹ emrẹ ughwọdjọ esa erhẹrhuvo.* 2 Uvwrọke ọrana, o vwo ọhworhare owu ro rhiẹ ukpolo nẹ ephan rhe. Kẹdẹkẹdẹ ya kpariẹ kẹrẹ anurẹsẹ owu re se Erhumu uvuẹn oghwa ẹga na, nọ rẹ igho* mie ihworho ra ruẹ uvuẹn oghwa ẹga na. 3 Ọke rọ mẹrẹn i Pita ọrhẹ i Jọn ra gwọlọ ruẹ uvuẹn oghwa ẹga na, nọ rẹ igho* mie aye. 4 Ọrẹn, Pita ọrhẹ i Jọn ni tẹnrovie ji ta: “Ni ame.” 5 Omarana, nọ tẹnrovi aye, fọkime o fiẹrorhọ taghene aye ina yẹ ye emru. 6 Ọrẹn, Pita nọ ta riẹn: “Mie vwo idọlọ efuanfon ọrhẹ oro-o, ọrẹn mi ne tiobọnu oborẹ mi vwori ha wẹn. Uvuẹn odẹ i Jesu Kristi onyẹ i Nazarẹt na, mia ta wẹn, nya!” 7 Omarana, nọ mọrọn obọrhen ọhworhare na ji kpariẹ vẹnrẹn. Ogege, aghwẹ ye ọrhẹ ẹrhon aghwẹ ye ni gbanhonron. 8 Ọhworhare na no pho vẹnrẹn, nọ tuẹn onya rhọ ji lele aye ruẹ uvuẹn oghwa ẹga na. Nọ nya ji pho jeghwai jiri Osolobrugwẹ. 9 Ihworho ephian ni mẹrenriẹn ọke rọ nya jeghwai jiri Osolobrugwẹ. 10 Aye ni mẹrẹnvwrurhe taghene ọhworhare na yo siyẹ Anurẹsẹ Erhumu uvuẹn oghwa ẹga na rọ rẹ igho* bi na, no gberẹ aye unu omamọ, oma nọ ji merhen aye fọkiẹ oborẹ ọ phia rẹn ọhworhare na.
11 Ọke ọhworhare na o ji tigban i Pita ọrhẹ i Jọn, ọsoso ihworho na ni zẹ bru aye uvuẹn ekete re se Ivaranda i Solomọn, oborẹ ọ phiare na o gberẹ aye unu omamọ. 12 Ọke i Pita ọ mẹrẹn ọnana, nọ ta rẹn ihworho na: “Ihworho Izrẹl, mesoriẹ ọnana o gbe are unu? Mesoriẹ are e ni ame kamẹriẹn omẹgbanhon omobọ ame yanghene fọkime ame ya mai ga Osolobrugwẹ, yẹ ame e ruẹ ọhworhare na nọ nya? 13 Osolobrugwẹ Ebraham ọrhẹ Aizik kugbe i Jekọb ro rhiẹ Osolobrugwẹ esẹ ọwan ride, o brọghọ rhẹ i Jesu oma ro rhiẹ Odibo ọnẹyen, rẹ are i tiobọnu rẹn ituakpọ ji ten obaro i Pailet, dedevwo ọye o brorhiẹn ro no tiobọnie bi. 14 Itiọrurhomẹmro, are i tiẹn ohworho ọfuanfon ọrhẹ ọvwata ọrana, are ni tare taghene e tiobọnu ozighẹ rẹn are. 15 Ọrẹn, are ni kpe Olori arhọ na hwu. Osolobrugwẹ nọ rhọmeriẹn nuhwu, ame i rhe kpahen ọnana. 16 Nyoma odẹ ye ọrhẹ esegburhomẹmro ame i vwo kpahen odẹ ye, ye ruẹ ọhworhare ọnana rẹ are a mẹrẹn, rẹ are i ji rhe na gbanhon. Esegburhomẹmro ame i vwo kpahiẹn, yọ lẹrhẹ oma ọhworhare ọnana rọ ha obaro are na sasa. 17 Vwana imizu mẹ, mi rheri taghene je rhe te yọ lẹrherẹ are ruẹ omaran, jerẹ oborẹ ere suẹn are i ji ru. 18 Ọrẹn, Osolobrugwẹ nọ nyoma izede ọnana ha oborẹ ọ ta rhotọre nyoma emẹraro enẹyen te orugba, taghene i Kristi ọnẹyen ọnọ rioja.
19 “Omarana, are i gba ghwẹriẹ ji ruẹ ewene, na sabu hionron edandan are nie, neneyo i Jehova ọvo ọ rharhumu yẹ are omẹgbanhon.* 20 No ji dje i Kristi rọ ha mwu na vwe are, nọyẹ i Jesu. 21 Ọrẹn, ọye ọnọ vi daji obẹ odjuwu vwẹre, bọmọke ọke ra na rharhumu kwaphiẹ ekwakwa ephian rhọ ono te, rẹ Osolobrugwẹ ọ nyoma emẹraro efuanfon enẹyen ọke ahwanren ta kpahen. 22 Itiọrurhomẹmro, Mosis ọ tare: ‘Jehova* Osolobrugwẹ are, ọnọ ha ọmẹraro jerẹ omẹmẹ mwu rẹn are nẹ usuẹn imizu are. Are ni na vi kerhọ kemru kemru rọ nọ ta rẹn are. 23 Itiọrurhomẹmro, kohworho kohworho rọ vwọ kerhọ Ọmẹraro ọrana, ene vi kpe yi hwu nẹ uvwre ihworho na.’ 24 Ọsoso emẹraro na, nọyẹ nẹ i Samuẹl ye te eri ha kpahiẹn, i mẹraro ji dje kpahen ẹdẹ enana fiotọre. 25 Are yẹ emọ emẹraro na ọrhẹ emọ ri na ha ọphọ Osolobrugwẹ ọ rere rhẹ esẹ are ride riuku. Nọ ta rẹn Ebraham: ‘Nyoma ọmọ* ọnọ, ọsoso ekrun ri ha otọrakpọ na ine vwo ebrurhọ.’ 26 Ọke Osolobrugwẹ ọ ha Odibo ọnẹyen mwu, no kiki djeyi vwe are nọ ha ebrurhọ rẹn are, nyoma rọ nọ lẹrhẹ are ghwẹriẹ nẹ irueruo ọkon are.”