Ewian Inyikọ na

2 Vwana, uvuẹn ẹdẹ ra riorẹ i Pẹntikọst na, idibo na ephian ni kokori uvuẹn ekete owu. 2 Ogege, edon owu no nẹ odjuwu rhe, rọ họhọ edon aphẹrẹ ọgbogbanhon, nọ vuọn ọsoso oghwa aye i siyẹ na. 3 Aye ni mẹrẹn erhanren rọ họhọ ẹrẹnmo ri ghalẹ oma rhẹ oberun aye owuowọnwan. 4 Ẹhẹn ọfuanfon na nọ mọ vuọn oma aye ephian, aye na djẹ edjadjẹ* sansan, lele oborẹ ẹhẹn ọfuanfon na o mwurun aye nẹ aye i djẹ.

5 Uvwrọke ọrana, itu i Ju re mwuọghọ okokodo rẹn Osolobrugwẹ, ri nẹ agbamwa ephian ri ha otọre odjuwu na rhe, e rhirhiẹ i Jerusalẹm. 6 Omarana, ọke edon na ọ homaphia, otu buebun ni kokori, no gberẹ aye unu fọkime aye owuowọnwan e rhon idibo na ra djẹ edjadjẹ aye. 7 Itiọrurhomẹmro, no gberẹ aye unu omamọ, aye na ta: “Nughe, ọsoso ihworho ra tẹmro na itu i Galili, rhomaran? 8 Ni marhẹ ọwan e ru rhon ọke aye a djẹ dawandẹ edjadjẹ ọwan?* 9 Eri ha aran itu i Patia, itu i Midia, itu Ilam, ere rhirhiẹ i Mẹsopotemia, Judia kugbe i Kapadosha, Pọntọs ọrhẹ uvwrotọre Esha, 10 itu i Frija ọrhẹ Pamfilia, Ijipt ọrhẹ ekogho i Libia rọ kẹrẹ i Sairini, epha ri nẹ i Rom rhe, omaran ji te itu i Ju ọrhẹ eri ghwẹriẹ rhiẹ ogame itu i Ju, 11 itu i Krit ọrhẹ itu Arebia, ame i rhonrin aye ọke aye a ta kpahen ewian igbevwunu Osolobrugwẹ uvuẹn edjadjẹ ọwan.” 12 Itiọrurhomẹmro, ọnana o gberẹ aye ephian unu omamọ, aye na nọ owuowọnwan: “Me yẹ ọnana o mevirhọ?” 13 Ọrẹn, awọrọ na ha aye djechẹẹ taghene: “Aye i da iwaini ọmemerhen* vuọn ephan ne.”

14 Ọrẹn, Pita kugbe inyikọ awan Ikperọvo ri hẹrhẹre na ni mevi, nọ tẹmro rẹn aye rhẹ uphele gorigori taghene: “Ehworhare i Judia ọrhẹ ọsoso are re rhirhiẹ i Jerusalẹm, are i dabu kerhọ ẹmro mẹ ji vwẹruọ ye. 15 Itiọrurhomẹmro, ihworho enana a da inyo jerẹ oborẹ are e roro-o, fọkime ọke ọ ha ughwọdjọ irhinrin urhiọke* obọ. 16 Ọrẹ ovẹnẹ, ọnana yẹ oborẹ a tare nyoma ọmẹraro Joẹl: 17 ‘Osolobrugwẹ ọ tare taghene, “Uvuẹn ẹdẹ ri koba na, mi ne rhie ẹhẹn ọfuanfon mẹ ezẹko ghwu aruẹ ihworho ephian, emọ are ehworhare ọrhẹ emọ are egbọtọ ni na mẹraro. Idama are ina menemena arudo, ekpako are ni na menemena. 18 Uvuẹn ẹdẹ erana, mi na tobọ rhie ẹhẹn ọfuanfon mẹ ezẹko ghwu evrẹn mẹ ehworhare ọrhẹ evrẹn mẹ egbọtọ, aye ni na mẹraro. 19 Ni mi ne ruẹ ekwakwa igbevwunu obẹ odjuwu ji ha eka phia uvuẹn otọrakpọ na, nọyẹ ọbara, erhanren kugbe ukoli iphirhi. 20 Ọren na no no mwuokuku, ubiamo na nọ nọ dẹrẹrhiẹ ọbara bọmọke ẹdẹ rode i Jehova* rọ vuọnren rhẹ odidi ọnọ ki rhe. 21 Kohworho kohworho ro se odẹ i Jehova,* ono simirhọ.”’

22 “Ihworho Izrẹl, are i kerhọ ẹmro enana: Osolobrugwẹ ọ dabu djeyi fiotọre rẹn are taghene ọye yo dje i Jesu onyẹ i Nazarẹt na rhe. Osolobrugwẹ nọ nyoma yen wian ewian eduado ọrhẹ ewian igbevwunu kugbe eka uvwre are, jerẹ oborẹ are i dabu rhe fiotọre. 23 Are i fiẹ ọhworhare ọnana rhẹ abọ ihworho ri vwa mọrẹn urhi, nẹ aye i kanriẹn mwu orhan ji kpe yi hwu. Ọnana ọ phiare lele ọhọre* Osolobrugwẹ ọrhẹ oborẹ o rhe notọre rhe. 24 Ọrẹn, Osolobrugwẹ nọ rhọmeriẹn nyoma ro tie nẹ abọ uhwu,* fọkime uhwu ọ sabu gba ye rhotọre-e. 25 Fọkime i Devid ọ ta kpahiẹn taghene: ‘Jehova* ọ ha obaro mẹ ọke ephian, fọkime ọ ha obọrhen mẹ, mi kpogho dẹ-ẹ. 26 Fọkiẹ ọnana, ọmudu mẹ nọ vuọnren rhẹ omamerhomẹ, ẹrẹnmo mẹ nọ ghọghọren omamọ. Mi ne* nyerẹn rhẹ ifiẹrorhọ. 27 Fọkime wu nyaji mẹ vwo rhẹ uvuẹn Usi-in,* wu ji kwe nẹ ugboma ohworho ro vwo atamwu kpahuọn no gbo-on. 28 Wu dje izede arhọ mẹ ne, wu na lẹrhe mẹ vwo aghọghọ rode uvuẹn obaruọ.’

29 “Imizu mẹ, o rhiẹ oborẹ o serhọ mi na tẹmro rẹn are rhẹ ugbomọphẹ kpahen i Devid ro rhiẹ urhomu ekrun na. O hwuru, ne ji sien. Usin ọnẹyen ọ ha uvwre ọwan me te inyenana. 30 Fọkime ọye ọmẹraro, o ji rhe taghene Osolobrugwẹ o dumirhonrin jeghwai vive riẹn taghene owuọwan usuẹn emọyen* ono siyẹ aga usun ọnẹyen. 31 Omarana, nọ kpararo mẹrẹn ẹrhọmọnuhwu i Kristi na ji ta kpahiẹn. Nọ tare taghene a nyajevwo rhẹ uvuẹn Usi-in,* ugboma yen o ji gbo-on. 32 Jesu ọnana yẹ Osolobrugwẹ ọ rhọmọ nuhwu, ame ephian i ji mẹriẹn. 33 Omarana, fọkime a kpareriẹ riẹ obọrhen Osolobrugwẹ ne, Ọsẹ na o ji tiobọnu ẹhẹn ọfuanfon ro vive kpahen na riẹn ne, ọnana yọ soriẹ o rhie ẹhẹn ọfuanfon na ghwu ame, jerẹ oborẹ are a mẹrẹn ji rhon na. 34 Devid o riẹ odjuwu-u, ọrẹn ọye ọvo yọ tare taghene, ‘Jehova* nọ ta rẹn Ọrovwori mẹ: “Siyẹ obọrhen mẹ 35 bọmọke mi na ha evwreghrẹn enọ ruẹ akaba wu na kwruọ aghwẹ kpahen.”’ 36 Omarana, jeno mwu ọsoso oghwa Izrẹl ẹro taghene i Jesu ọnana rẹ are i kpe mwu orhan hwu na, yẹ Osolobrugwẹ ọ ha ru Ọrovwori ọrhẹ i Kristi.”

37 Omarana, ọke ihworho na e rhon ẹmro enana, nọ darẹ aye te ọmudu, aye ni nọ i Pita ọrhẹ inyikọ ri hẹrhẹre na: “Imizu, me yẹ ame ine ruo?” 38 Pita nọ ta rẹn aye: “Are i ghwẹriẹ, nẹ are owuowọnwan i bromarhame uvuẹn odẹ i Jesu Kristi, na sabu harhomu edandan are. Are ni ne vwo ẹghẹlẹ ọphẹ ọrẹ ẹhẹn ọfuanfon na. 39 Fọkime are ọrhẹ emọ are ye vive ọnana riẹn, omaran ji te ihworho ri ha ekete iseseri ọrhẹ ọsoso ihworho ri Jehova* Osolobrugwẹ ọwan ono se kẹroma.” 40 Nọ nyoma ẹmro buebun erọrọ se oseri ro fiotọre rẹn aye, ji ha urhebro rẹn aye taghene: “Are i tiomanẹ uvwiẹ ọkon ọnana, nẹ are i sabu simirhọ.” 41 Omarana, ihworho ri rhiabọ ha ẹmro ọnẹyen rhẹ omamerhomẹ ni bromarhame. Uvuẹn ẹdẹ ọrana, emrẹ awan 3,000 ni kwomakugbe aye. 42 Aye na dabu kpomaviẹ rẹn iyono inyikọ na ọke ephian, aye na vwoma kugbe,* riẹ emaren kugbe ji nẹrhomo kugbe.

43 Itiọrurhomẹmro, ofẹn no mwu ihworho ephian, inyikọ na ne ruẹ ekwakwa igbevwunu buebun ọrhẹ eka sansan. 44 Ọsoso ihworho ri rhiẹ idibo i Kristi, na vwoma ji ruẹ ekwakwa ephian kuẹgbe. 45 Aye na rhẹ ekwakwa aye ọrhẹ enyerẹn aye, ji ghalẹ igho na rẹn ihworho ephian, lele ọdamẹ owuowọnwan. 46 Aye ne riẹ oghwa ẹga na kẹdẹkẹdẹ rhẹ ẹhẹn owu. Aye a riẹ emaren kugbe uvuẹn eghwa sansan ji ghalẹ emaren aye nẹ ẹhẹn sa rẹn awọrọ rhẹ aghọghọ rode. 47 Aye ne jiri Osolobrugwẹ ji mẹrẹn ekwerhọ ihworho ephian. Uvwrọke owu na, Jehova* no ruie nẹ ihworho ri ne vwo usimirhọ i rha homaba aye kẹdẹkẹdẹ.