Ewian Inyikọ na
22 “Imizu mẹ ọrhẹ esẹ mẹ, vwana are i gbe rhon ọrẹ unu mẹ.” 2 Ọke aye e rhon taghene ọ tẹmro rẹn aye uvuẹn edjadjẹ i Hibru, aye ephian ni fọre gbien, nọ tare: 3 “Mẹmẹ onyẹ i Ju re vwiẹre uvuẹn i Tasọs ọrẹ i Silisha, amwa ọnana yi mie riẹ isukuru, Gamaliẹl yo yonirin mẹ. E yonirin mẹ ni mi dabu mọren Urhi esẹ ọwan ride kokoroko, mi ji vwo oruru kpahen ẹga Osolobrugwẹ, jerẹ oborẹ are ephian i ji vwo oruru inyenana. 4 Mi kparehaso ihworho ra nyalele Izede Ọrovwori na ji kpe aye hwu, mi ji mwu ehworhare ọrhẹ emẹse rhẹ ekanron. 5 Orherẹn ọduado na ọrhẹ ọsoso ekpako na ina sabu se oseri kpahen ọnana. Aye yi tobọ yẹ mẹ ileta mi ha vwe imizu ọwan ri rhiẹ itu i Ju ri ha i Damaskọs. Ọke oru, ni mi ruẹ izede ye mwu ihworho ri ha avwaye rhiẹ i Jerusalẹm, neneyo a ha oja riẹ aye.
6 “Ọrẹn, ọke mia joma te i Damaskọs emrẹ erhẹrhuvo, ogege ukpẹ ro lo omamọ no lo nẹ odjuwu rhe kinhariẹ mẹ. 7 Ni mi se bruotọre ji rhon uphele owu rọ nọren mẹ: ‘Sọl, Sọl, mesoriẹ wa kparahaso mẹ?’ 8 Ni mi nọriẹn: ‘Wẹwẹ ọrọmo, Ọrovwori?’ Nọ kpahenrhọ mẹ: ‘Mẹmẹ i Jesu onyẹ i Nazarẹt wa kparahasua na.’ 9 Ehworhare ri leliri mẹ na i mẹrẹn ukpẹ na, ọrẹn, aye e vwẹruọ oborẹ ohworho na ọ ta mẹ-ẹ. 10 Omarana, ni mi nọriẹn: ‘Ọrovwori, me mi ne ruo?’ Ọrovwori na nọ kpahenrhọ mẹ: ‘Vẹnrẹn riẹ i Damaskọs, na na ta wẹn kpahen ọsoso ekwakwa re brorhiẹn yen wu ne ruo.’ 11 Ọrẹn, fọkiẹ ukpẹ ro lori omamọ na, mia rha sabu mẹrẹn emru owuorowu-u. Omarana, ehworhare ri leliri mẹ na ni mọrẹn obọ mẹ ji sun mẹ riẹ i Damaskọs.
12 “Ọhworhare owu re se Ananayas ro mwuọghọ okokodo rẹn Osolobrugwẹ ji mọren Urhi na, no bruru mẹ rhe. Ọsoso itu i Ju re rhirhiẹ i Damaskọs a nẹ omamọ iyẹnrẹn kpahiẹn. 13 No mevi kẹre mẹ ji ta mẹ: ‘Sọl, omizu mẹ, rharhumu mẹrude!’ Uvuẹn unọke ọrana, ni mi kparughwaro rierun ji mẹriẹn. 14 Ananayas nọ ta mẹ: ‘Osolobrugwẹ esẹ ọwan ride ọ djẹruọ ha neneyo wu rhe ọhọriẹ, ji mẹrẹn ohworho ọvwata na jeghwai rhon ẹmro ugbunuie. 15 Fọkime wu ne se oseri kpahiẹn rẹn ihworho ephian fọkiẹ ekwakwa wu mẹrẹnren ji rhon na. 16 Vwana, mesoriẹ we kpọke? Vẹnrẹn ne wu bromarhame, ne wu ji ghwe edandan enọ nẹ oma nyoma wu ne se odẹ ye.’
17 “Ọke oru, ni mi ghwẹrioma riẹ i Jerusalẹm. Ọke mia nẹrhomo uvuẹn oghwa ẹga na, ni mi mẹrẹn emena arudo. 18 Ni mi mẹrẹn i Jesu rọ ta mẹ: ‘Jọphẹrẹ, brokpakpa nẹ i Jerusalẹm, fọkime aye i kwe rhiabọ dede oborẹ wu ne ghwoghwo kpahen mẹ-ẹ.’ 19 Ni mi tare: ‘Ọrovwori, aye i rheri taghene nẹ i sinagọg owu riẹ ọrọrọ, mie mwu ihworho ri vwo esegburhomẹmro kpahuọn rhẹ ekanron ji kpe aye omamọ ekpe. 20 Mi mevi avwaye ọke re kpe i Stivin ro rhiẹ odibo ọnọ hwu, mi ji vwo ekwerhọ ye. Mẹmẹ yi hẹrote ewun otafe ihworho na ọke aye e kpe yi.’ 21 Udabọ ọrana, nọ ta mẹ: ‘Nyarhẹn, fọkime mi ne djo riẹ egbamwa ri serabọ omamọ.’”
22 Ọke ihworho ra kerhọ ye e rhon ẹmro enana hin, aye ni korunu phia taghene: “E kpe aruẹ ohworho ọnana hwu, fọkime o fo ohworho ro no nyerẹ-ẹn!” 23 Aye ne korunu ji donron ewun otafe aye rierun, jeghwai kwruọ eyẹn donron rierun. 24 Omarana, ọduado isodja na no jurhi taghene a ha i Pọl rhiẹ ekete isodja na e rhirhiẹ. Neneyo a fa ye bọmọke ọnọ ki ta oborẹ o ruru, nọ sabu rhe oborẹ ọsoriẹ ihworho na e korunu haso i Pọl omana. 25 Ọrẹn, ọke aye a riẹn yen rhotọre nẹ aye i fa ye, Pọl nọ nọ olotu isodja ro mevi avwaye taghene: “O fori* ne wu fa ọmotọre i Rom re vwe ji brorhiẹn kpe?” 26 Ọrẹn, ọke olotu isodja na o rhon ẹmro ọnana, no bru ọduado isodja na ya ta riẹn taghene: “Me wa gwọlọ ruẹ ọhworhare ọnana? Ọye onyẹ i Rom.” 27 Omarana, ọduado isodja na no bru i Pọl rhe ma nọ yen: “Ta mẹ, wẹwẹ onyẹ i Rom?” Nọ kpahenrhọ riẹn: “Ee.” 28 Ọduado isodja na nọ ta riẹn: “Mi kwa igho buebun mi ki rhiẹ ọmotọre i Rom.” Pọl nọ ta riẹn: “Ọrẹn, mẹmẹ ọmotọre i Rom nyoma uvwiẹ.”
29 Omarana, ehworhare ra gwọlọ fa ye ji nọ yen enọ bi na, ni tirierhumu ogege. Ọke ọduado isodja na o rhe taghene i Pọl ọmotọre i Rom, ofẹn no mwurien fọkime ọ ha ejọrọ gba ye bi.
30 Omarana, uvuẹn ẹdẹ ọreva ye, fọkime ọ ghini gwọlọ rhe oborẹ itu i Ju na i tare taghene i Pọl o ruru, no tiobọnie ji ta rẹn olori irherẹn na ọrhẹ ọsoso i Sanhẹdrin na nẹ aye i koko. Nọ ha i Pọl rhe ji haye mevi uvwre aye.