Ewian Inyikọ na
21 Ọke ame a vabu nyaji imizu na vwo, ame ni ruẹ ọkuna riẹ i Kọs, ame a domaji-i. Ẹdẹ ọreva ye, ame ni te i Rods, ame ni ji nẹ avwaye riẹ i Patara. 2 Ọke ame a mẹrẹn ọkuna ro riẹ i Fonisha, ame ni ruoriẹ nyarhẹn. 3 Ọke ame a kparughwaro mẹrẹn otọre i Saiprọs rẹ ame o kinhariẹ rọ ha obohwẹre ame, ame ni ghwa vrẹn yen riẹ i Siria ji domaji uvuẹn i Taya ro rhiẹ ekete ọkuna na ọnọ kpare ehwan rhotọre. 4 Ame ni gwọlọ idibo na ji mẹrẹn aye, ame ni lelire aye rhirhiẹ ẹdọke irhiruẹ. Ọrẹn, nyoma ọkpọvi ẹhẹn ọfuanfon na, aye na ta rẹn i Pọl ọgbọ buebun taghene o vwo fi oghwẹ rhẹ i Jerusalẹmu-u. 5 Omarana, ọke ẹdẹ rẹ ame ine rhirhiẹ avwaye a gba, ame ni nẹ avwaye ji tuẹn onya ame rhọ. Ọrẹn aye ephian, te emẹse kugbe emọvwerhe ni sunrun ame ye te otafe amwa na. Ame ephian ni sighwẹ kẹrẹ okokọ urhie na ji nẹrhomo. 6 Ame ni mroma owuowọnwan. Ọke oru, ame ni ruẹ ọkuna na nyarhẹn, ọrẹn aye ni ghwẹrioma riẹ eghwa aye.
7 Ọkuna ame no nẹ i Taya riẹ i Tọlemeyas. Ọke oru, ame ni mroma imizu na ji lele aye rhirhiẹ ye ẹdẹ owu. 8 Ẹdẹ ọreva ye, ame ni nẹ avwaye riẹ i Sẹseria. Ame ni riẹ oghwa i Filip ro rhiẹ oghwoghwẹmro na, rọ ha usuẹn ehworhare awan irhiruẹ na, ame ni rhirhiẹ oghwa ye. 9 Ọhworhare ọnana o vwo emọ egbọtọ awan ẹne ri vwa ji rọnmọ* ra mẹraro. 10 Ọrẹn, ọke ame e rhirhiẹ avwaye ẹdẹ buebun ne, ọmẹraro owu re se Agabọs no nẹ i Judia rhe. 11 No bruru ame rhe ji ha umwaya i Pọl, nọ hariẹ gba aghwẹ ọrhẹ abọ ọnẹyen, nọ tare: “Ẹhẹn ọfuanfon na aghene, ‘Omana yẹ itu i Ju ri ha i Jerusalẹm ina gba ohworho ro vwo umwaya ọnana, aye ni ne fie rhẹ abọ ihworho egbamwa na.’” 12 Ọke ame e rhon ẹmro ọnana, ame ọrhẹ ihworho ri ha avwaye, na rẹ i Pọl taghene o vwo riẹ i Jerusalẹmu-u. 13 Ọrẹn, Pọl nọ tare: “Mesoriẹ are a viẹ ji damoma rẹ are ine wene ẹhẹn mẹ?* Jeno mwu are ẹro taghene mi mwuegbe ra na gba mẹ, mi ji tobọ mwuegbe mi ne hwu uvuẹn i Jerusalẹm fọkiẹ odẹ Ọrovwori na Jesu.” 14 Ọke ame a mẹriẹn taghene ame a sabu wene ẹhẹn ye-en, ame arha rẹ* ye ghwomara-an. Ame ni tare: “Jenẹ ọhọre i Jehova* o rugba.”
15 Ẹdẹ ezẹko a vrẹn, ame ni mwuegbe ji riẹ i Jerusalẹm. 16 Idibo na ezẹko ri nẹ i Sẹseria rhe, ni ji lele ame. Aye ni harẹ ame riẹ oghwa i Manesin ro rhiẹ onyẹ i Saiprọs ye rhirhiẹ. Ọye owuọwan usuẹn idibo ri tu ghwẹriẹ. 17 Ọke ame e te i Jerusalẹm, imizu na ni rhiabọ dede ame sasasa. 18 Ẹdẹ rọ ha kpahiẹn, Pọl ọrhẹ ame ni bru i Jems, ọsoso ekpako na i ha avwaye. 19 Pọl nọ mromirẹ aye, ji dabu gbikun kpahen ọsoso ekwakwa Osolobrugwẹ o ruru uvwre ihworho egbamwa na nyoma owian aghwoghwo yi.
20 Ọke aye e rhon ẹmro enana, aye ne jiri Osolobrugwẹ. Ọrẹn aye ni ta riẹn: “Omizu, itiọrurhomẹmro itu i Ju buebun i me rhiẹ idibo i Kristi ne, aye ephian a ji nyalele Urhi na rhẹ ọsoso ọmudu aye. 21 Ọrẹn, aye i rhon iyẹnrẹn kpahuọn ne taghene we yono ọsoso itu i Ju ri ha uvwre egbamwa na taghene aye i kparehaso Urhi Mosis. Wa ji ta rẹn aye taghene aye i vwa samo emọ aye yanghene nyalele irueruo aye i ru notọre rhe-e. 22 Ni me ye ne ru vwana? Fọkime aye ine vi rhon taghene wu rhe ne. 23 Omarana, gbe ruẹ oborẹ ame ina ta wẹn na: Ame i vwo ehworhare awan ẹne ri vive. 24 Gba ha ehworhare enana lele oma, nẹ are i ruẹ oma are fon lele urhi. Ne wu ji kwosa oborẹ aye i gwọlọre, neneyo aye i sabu hwanren ẹton urhomu aye. Ọke ọrana, ihworho ephian ni ne rhe taghene iyẹnrẹn aye i rhon kpahuọn na, rhẹ urhomẹmro-o. Ukpomaran, we ruẹ dẹndẹn ji nyalele Urhi na. 25 Ọrẹn, harẹn eri rhiẹ idibo i Kristi uvwre egbamwa na, ame i ya ileta vwe aye ne kpahen orhienbro ame taghene aye i kẹnoma rẹn oborẹ a ha ze izobo rẹn ema, ọbara, eranmo ra chanhen owọre aye* ọrhẹ irueruo ọfanrhiẹn.”*
26 Ẹdẹ ọreva ye, Pọl ọrhẹ ehworhare na ni nyarhẹn ye ruẹ oma aye fon lele urhi. Nọ ruẹ uvuẹn oghwa ẹga na ye je aye rhe kpahen ọke erufon na ono hin, neneyo orherẹn na ọ sabu ze izobo fọkiẹ aye owuowọnwan.
27 Vwana ọke ẹdẹ irhiruẹ na a joma gba ne, itu i Ju ri nẹ Esha rhe ni mẹren i Pọl uvuẹn oghwa ẹga na, aye ni lẹrhẹ ọsoso otu na tuẹn ozighi rhọ, aye ni sanbọmwu i Pọl. 28 Aye ne kperẹ phia: “Ihworho Izrẹl, are i mọ! Ọnana yẹ ọhworhare ro yono ọsoso ihworho na uvuẹn ekete ephian, nẹ aye i kparehaso ihworho ọwan ọrhẹ Urhi ọwan kugbe ekete ọnana. Ọrọ mai biomu, ọ tobọ kparẹ itu i Grik ruẹ oghwa ẹga na ji gbe ekete ọfuanfon ọnana aghwa.” 29 Fọkime aye i mẹrẹn i Pọl ọrhẹ i Trọfimọs ro rhiẹ onyẹ Ẹfisọs uvuẹn amwa na bi ne, aye ne roro taghene i Pọl ọ hariẹ ruẹ uvuẹn oghwa ẹga na. 30 Ọyanghan nọ homaphia uvuẹn ọsoso amwa na, ihworho na ni họrhọ rhe ji sanbọmwu i Pọl, aye ni lọririẹ nẹ oghwa ẹga na ji kwurhu ighwe na ogege. 31 Ọke aye a damoma aye ine kpe yi hwu, ọduado isodja ẹko owu no rhonrin taghene ọyanghan ọ ha uvuẹn ọsoso i Jerusalẹm. 32 Ogege, nọ ha isodja ọrhẹ ilotu isodja lele oma ji zẹ bru aye. Ọke ihworho na a mẹrẹn ọduado isodja na ọrhẹ isodja na, aye ni dobọ i Pọl e kpe ji.
33 Ọke ọduado isodja na o tikẹrẹ aye, no mwu i Pọl, no jurhi taghene a ha ejọrọ eva gba ye. Ọke oru, nọ nọ kpahen aruẹ ohworho i Pọl ọ havwọ ọrhẹ oborẹ o ruru. 34 Ọrẹn, ihworho ezẹko ne kperẹ emru owu phia, awọrọ ne kperẹ emru ọrọrọ phia. Omarana, fọkime ọ sabu vwẹruọ emru owuorowu fọkiẹ ọyanghan na-a, nọ tare taghene a kpare i Pọl riẹ ekete isodja na e rhirhiẹ. 35 Ọrẹn, ọke i Pọl o te ekete re rhenren ruẹ egodo na, isodja na ni kpareriẹ fọkiẹ ozighi otu na, 36 fọkime otu buebun e lele aye ji kperẹ phia taghene: “E kpe yi hwu!”
37 Ọke ra gwọlọ suien ruẹ uvuẹn ekete isodja na e rhirhiẹ, Pọl nọ ta rẹn ọduado isodja na: “Mi na sabu tẹmro wẹn?” Nọ nọriẹn: “Nọyẹ wa sabu djẹ edjadjẹ i Grik? 38 Rhẹ owẹwẹ yẹ onyẹ Ijipt rọ lẹrhẹ ihworho kparehaso usun uvwrọke ezẹko ri vrẹnren na, ro ji suẹn ehworhare awan 4,000 ri kpare ekwakwa owọnren* ruẹ uvuẹn ato na?” 39 Pọl nọ ta riẹn: “Itiọrurhomẹmro, mẹmẹ onyẹ i Ju ro nẹ i Tasọs rọ ha i Silisha rhe, mẹmẹ ọmotọre amwa ra dabu rhe. Omarana, biko kwenu mẹ ni mi tẹmro rẹn ihworho na.” 40 Ọke ro kwenu riẹn hin, Pọl ro mevi ekete re rhenren ruẹ egodo na, nọ rionbọ ye rẹn ihworho na. Ọke ekete ephian ọ fọ, nọ tẹmro rẹn aye uvuẹn edjadjẹ i Hibru taghene: