Ewian Inyikọ na
23 Ọke i Pọl ọ dabu ni ihworho ri ha i Sanhẹdrin na, nọ tare: “Imizu mẹ, mi sẹrorẹ ẹhẹn obrorhiẹn rọ fonron obaro Osolobrugwẹ me te inyenana.” 2 Ọke Ananayas ro rhiẹ orherẹn ọduado na o rhon ẹmro ọnana, nọ ta rẹn ihworho ri mevi kẹrẹ i Pọl nẹ aye i ghwiẹ ugbunuie. 3 Ọrẹn, Pọl nọ ta riẹn: “Osolobrugwẹ ọnọ ghwiọ, wẹwẹ ra gemai ruẹ na.* Wu siyẹ avwaye wa ha mẹ guẹnzọn lele Urhi na, ọrẹn we gbe urhi na ghwẹ nyoma wa ta taghene a ghwiẹ mẹ?” 4 Eri mevi avwaye ni nọriẹn: “We hinmaro kpahen orherẹn ọduado Osolobrugwẹ?” 5 Pọl nọ tare: “Imizu mẹ, mie rhe taghene ọye orherẹn ọduado-o. Fọkime a yariẹ rhotọre taghene, ‘Wu vwa ta erharhere ẹmro kpahen ọro suẹn ihworho enọ-ọ.’”
6 Ọke i Pọl o rhe taghene owuobọ i Sanhẹdrin na itu i Sadusi, ọrẹn obọreva ye itu i Farisi, no kperi phia: “Imizu mẹ, mẹmẹ onyẹ i Farisi, mẹmẹ jẹ ọmọ itu i Farisi na. Fọkiẹ ifiẹrorhọ ẹrhọmọnuhwu na ya ha mẹ guẹnzọn.” 7 Ọke rọ tẹmro enana, ẹfro nọ homaphia uvwre itu i Farisi na ọrhẹ itu i Sadusi na, ẹghware na nọ ghalẹre. 8 Fọkime itu i Sadusi na a ta taghene o vwo ẹrhọmọnuhwu yanghene ọmakashe yanghene ẹhẹ-ẹn, ọrẹn itu i Farisi na i vwo ekwerhọ kpahen aye ephian.* 9 Omarana, ọyanghan ọgbogbanhon nọ homaphia, eyẹbe ezẹko ri ha ẹko itu i Farisi na ni vẹnrẹnren, aye na frẹfro gbangbanhon taghene: “Ame a mẹrẹn orusọ owuorowu uvuẹn oma ọhworhare ọnana-a, ọrẹn orhianẹ ohworho ẹhẹn yanghene ọmakashe yọ tẹmro riẹn—.” 10 Ọke ẹfro na ọ gbanhanrhọ, ofẹn no mwu ọduado isodja na taghene ihworho na ina sabu kpe i Pọl hwu. Omarana, no dje isodja ye simi Pọl nẹ uvwre aye ji haye riẹ ekete isodja na e rhirhiẹ.
11 Ọrẹn uvuẹn ason ọrana, Ọrovwori na nọ homaphia rẹn i Pọl ji ta riẹn: “Fiudugbere! Fọkime jerẹ oborẹ we se oseri ro fiotọre kpahen mẹ uvuẹn i Jerusalẹm, omaran wu ne ji se oseri kpahen mẹ uvuẹn i Rom.”
12 Ọke urhiọke o te, itu i Ju na ni djiroro ji dumirhonrin taghene aye i riẹ emaren yanghene da emru owuorowu-u, jokpanẹ aye i kpe i Pọl hwu. 13 Ehworhare ri vrẹn awan 40 yi djiroro ji dumirhonrin ọnana. 14 Ehworhare enana ni bru ilori irherẹn na ọrhẹ ekpako na ji ta rẹn aye taghene: “Ame i dumirhonrin ne taghene ame i riẹ emru owuorowu-u, jokpanẹ ame i kpe i Pọl hwu. 15 Omarana, wẹwẹ ọrhẹ ọsoso i Sanhẹdrin na i gba ta rẹn ọduado isodja na taghene ọ haye bru are rhe, kamẹriẹn are a gwọlọ dabu ni ẹzọn yen na fiotọre. Ọrẹn, bọmọke ono ki tikẹrẹ obonẹ, ame i soma ame ine kpe yi hwu ne.”
16 Ọrẹn, idama owu ro rhiẹ ọmọ omizu i Pọl ọmase, no rhon kpahen irorẹdjẹ rẹ ihworho na ine tiomanu hẹrhẹ i Pọl uvuẹn izede. Omarana, nọ ruẹ ekete isodja na e rhirhiẹ ya ta rẹn i Pọl kpahiẹn. 17 Ọke oru, Pọl no se owuọwan usuẹn olotu isodja na ji ta riẹn: “Ha idama ọnana vwe ọduado isodja na, fọkime o vwo oborẹ ọ gwọlọ ta riẹn.” 18 Omarana, nọ ha idama na vwe ọduado isodja na ji ta riẹn: “Pọl rọ ha ekanron na, yo seri mẹ ji ta mẹ taghene mi ha idama ọnana bruo rhe, fọkime o vwo oborẹ ọ gwọlọ ta wẹn.” 19 Ọduado isodja na nọ mọrọn obọ idama na ji haye riẹ okokọ, nọ nọriẹn: “Me wa gwọlọ ta mẹ?” 20 Idama na nọ ta riẹn: “Itu i Ju na i djiroro taghene aye ina ta wẹn ne wu ha i Pọl riẹ i Sanhẹdrin na odẹrọsa na, kamẹriẹn aye a gwọlọ dabu ni ẹzọn yen na fiotọre. 21 Ọrẹn, wu vwe kwerhọ oborẹ aye i tare na-a, fọkime ehworhare ri vrẹn awan 40 usuẹn aye, i tiomanu rẹ aye ina hẹrhiẹ uvuẹn izede. Aye i ji dumirhonrin ne taghene aye i riẹ emaren yanghene da emru owuorowu-u, jokpanẹ aye i kperie hwu. Vwana aye i soma ne, aye a hẹrhẹ ekwerhọ ọnọ.” 22 Omarana, ọduado isodja na no jurhi rẹn idama na taghene: “Wu vwa ta rẹn ohworho owuorowu taghene wu tẹmro enana mẹ-ẹ.” Ọke oru, nọ ta riẹn nọ nyarhẹn.
23 Omarana, no se ilotu isodja awanva ji ta rẹn aye: “Are i mwuegbe isodja 200, kugbe awan 70 ra zẹ esi ọrhẹ isodja awan 200 ra kpare akarhẹ, ri ne riẹ i Sẹseria emrẹ ughwọdjọ irhinrin ason.* 24 Habaye, are i ji mwuegbe esi ri na kpare i Pọl dẹndẹn bru i Fẹlis ro rhiẹ igọvunọ na.” 25 Nọ ji ya ẹmro enana rhẹ ileta vwe yi taghene:
26 “Mẹmẹ ri rhiẹ i Klọdiọs Lisias i farẹ ọwo ẹmroma vwo Ọremwuọghọ Riẹn na, Igọvunọ Fẹlis! 27 Itu i Ju na i mwu ọhworhare ọnana, aye na ji gwọlọ kpe yi hwuẹ. Ọrẹn, mẹmẹ ọrhẹ isodja mẹ ni brokpakpa te avwaye ji simie nẹ abọ aye, fọkime mi rhonrin taghene ọye ọmotọre i Rom. 28 Fọkime mi gwọlọ rhe oborẹ aye i tare taghene o rusọ, ni mi hariẹ riẹ i Sanhẹdrin aye. 29 Ni mi mẹrẹnvwrurhe taghene oborẹ aye i ta hasuiẹ i sekpahen Urhi aye. Ọrẹn, o ruẹ emru owuorowu sọ ra na fọkiẹ kpe yi hwu yanghene mwuien rhẹ ekanro-on. 30 Omarana, mia kpare ọhworhare ọnana bruo sa ogege, fọkime mi rhonrin taghene ihworho i djiroro aye ine kpe yi hwu. Mi ji ta rẹn era kparahasuiẹ na, nẹ aye i me guẹnzọn na obaruọ.”
31 Omarana, isodja na ni kpare i Pọl riẹ Antipetris uvuẹn ason, lele urhi re je rẹn aye na. 32 Ẹdẹ rọ ha kpahiẹn, isodja ra zẹ esi na ni leli Pọl nyarhẹn. Ọrẹn, isodja ri hẹrhẹre na ni ghwẹrioma riẹ ekete aye e rhirhiẹ. 33 Ọke isodja ra zẹ esi na e te i Sẹseria, aye ni ha ileta na rẹn igọvunọ na ji tiobọnu i Pọl riẹn. 34 Omarana, igọvunọ na no se ileta na. Ọke oru, nọ nọ i Pọl kpahen ekete ro nurhe, Pọl nọ ta riẹn taghene o nẹ i Silisha rhe. 35 Igọvunọ na nọ ta riẹn: “Era kparahasuọ i rha rhe, mi na dabu rhon ẹzọn na fiotọre.” No jurhi taghene e fiẹ i Pọl rhẹ egodo i Hẹrọd ji dẹriẹ.