Ewian Inyikọ na

20 Ọke ọyanghan na o zien ne, Pọl no dje urhomu ye se idibo na rhe, ọke rọ ha urhebro rẹn aye ji mroma aye hin, no riẹ i Masidonia. 2 Ọke ro kiẹn ekogho erana ji ha ẹmro urhebro buebun rẹn imizu ri ha avwaye hin, no riẹ i Gris. 3 No rhirhiẹ avwaye ibiamo esa, ọrẹn ọke rọ gwọlọ ruẹ ọkuna riẹ i Siria, no mo rhe taghene itu i Ju na i djiroro rẹ aye ine kpe yi hwu. Omarana, no brorhiẹn rọ nọ nya i Masidonia ghwẹrioma. 4 Ihworho ri lelirie yẹ, Sọpata ro rhiẹ ọmọ i Pirọs, ro rhiẹ onyẹ i Beria, Aristakọs ọrhẹ Sẹkundọs ri nẹ i Tẹsalonaika rhe, Geyọs ro rhiẹ onyẹ i Dẹbi ọrhẹ Timoti. Omaran ji te Tikikọs kugbe Trọfimọs ri nẹ uvwrotọre Esha rhe. 5 Imizu enana ni kobaro rẹn ame ya hẹrhẹ ame obẹ i Troas. 6 Ọrẹn, ọke ra riorẹ Ibrẹdi ro Vwo Phie na hin, ame ni ruẹ ọkuna nẹ i Filipai. Ẹdọke isionrin o ki te, ame ni mọ vwa aye uvuẹn i Troas ji rhirhiẹ avwaye ẹdẹ irhiruẹ.

7 Uvuẹn ẹdẹ ọrukaro uvuẹn ọkprughwre na, ọke ame e koko rẹ ame ina riẹ emaren, Pọl nọ ha ẹmro phia fọkime ono nẹ avwaye ẹdẹ ọreva ye. Ọrẹn, nọ tẹmro na ye te erhẹrhẹ ason. 8 Ikpẹ ezẹko i ha uvuẹn obuvun ogedege rẹ ame i koko rhọ na. 9 O vwo idama owu re se Yutikọs ro siyẹ ivakpo na, no se bru omerhẹn okokodo ọke i Pọl ọ tẹmro. Fọkime omerhẹn o sunrien nyarhẹn, no se nẹ otọroghwa ọresa ye rhe. Ọke aye e te ekete rọ havwọ, o hwu ne. 10 Ọrẹn, Pọl no rhenren ruotọre ji sighwẹ kẹrẹ orinmi na, nọ gbaleriẹ ji ta: “Are i vwe do-on, fọkime o nyerẹn.”* 11 Ọke oru, Pọl nọ ghwẹrioma riẹ oberun ya riẹ emaren.* Nọ ji tẹmro na riobaro rhọ ye te urhiọke. Ọke oru, no nẹ avwaye. 12 Aye ni ha idama rọ rhọmọ nuhwu na lele oma rie, oma nọ merhenren aye omamọ.

13 Ame ni nyarhẹn ya ruẹ ọkuna riẹ Asọs, ọrẹn Pọl nọ ha oghwẹ nya riẹ oboran. Avwaye yẹ ame i vwo rhẹ ẹhẹn rẹ ame ina kpare Pọl boma bi, jerẹ oborẹ ọ ta rẹn ame. 14 Omarana, ọke rọ mọ vwa ame uvuẹn Asọs, ame ni kpareriẹ ruẹ ọkuna na ji riẹ i Mitilini. 15 Ọke ọkuna na o nẹ avwaye ẹdẹ rọ ha kpahiẹn, ame ni te i Kiọs. Ẹdẹ ọreva ye, ame ni te i Semọs. Ọrẹn uvuẹn ẹdẹ ọresa ye, ame ni te i Mailitọs. 16 Pọl ọ ghwanreriẹn brorhiẹn ne taghene ọ domajẹ uvuẹn Ẹfisọsu-u, nọ jọ rhọ ghwọghọ ọke owuorowu uvuẹn uvwrotọre Esha. Fọkime o brokpakpa sẹ ọnọ sabu te i Jerusalẹm uvuẹn ẹdẹ Orẹ i Pẹntikọst na.

17 Ọrẹn, ọke rọ ha i Mailitọs, no dje urhomu riẹ Ẹfisọs ne se ekpako ukoko na vwe yi. 18 Ọke aye e bruie rhe, nọ ta rẹn aye: “Are i dabu rhe oborẹ mi rhua omamẹ lele uvwre are, nẹ ẹdẹ ọrukaro mie te uvwrotọre Esha. 19 Mi homariotọre* gbodibo rẹn Ọrovwori na, mi viẹre ji dẹrughwaroghwu ebẹnbẹn fọkiẹ irorẹdjẹ ọkon sansan erẹ itu i Ju na. 20 Udabọ ọrana, mi ta rẹn are kpahen kemru kemru ri na yẹ are erere.* Mi ji yono are ọrẹ afiede ọrhẹ nẹ oghwa riẹ oghwa. 21 Ọrẹn, mi dabu se oseri rẹn itu i Ju ọrhẹ itu i Grik taghene aye i ghwẹriẹ bru Osolobrugwẹ rhe, ji vwo esegburhomẹmro kpahen Ọrovwori ọwan Jesu. 22 Nughe! ẹhẹn ọfuanfon na o sun mẹ riẹ i Jerusalẹm, dedevwo mie rhe oborẹ ọnọ phia mẹ obora-an. 23 Ọrẹn, ẹhẹn ọfuanfon na o se oseri mẹ ọgbọ buebun ne taghene ekanron ọrhẹ ikpokpogho a hẹrhe mẹ uvuẹn amwa owu riẹ ọrọrọ. 24 Ọrẹn, mie ni arhọ mẹ fiemru owuorowu-u,* takpu mi sabu zorhẹ mẹ toba ji wian owian Uvie rẹ Ọrovwori Jesu o tiobọnu ha mẹ hin, nọyẹ ọrẹ mi ne se oseri ro fiotọre kpahen iyẹnrẹn esiri ọrẹ ẹghẹlẹ esiri rode Osolobrugwẹ.

25 “Nughe! mi rheri taghene o vwo owuọwan usuẹn are na, ri mi ghwoghwo riẹn kpahen Uvie na rọ nọ rharhumu mẹrẹn ughwaro mẹ-ẹ. 26 Omarana, mi gwọlọre nẹ are i me se oserie inyenana taghene abọ mẹ ọ fon nẹ ọbara ihworho ephian ne. 27 Fọkime mie tirierhumu mi na ta rẹn are kpahen ọsoso urhebro* Osolobrugwẹ-ẹ. 28 Are i kpomavi rẹn oma are ọrhẹ ọsoso isurhe na, rẹ ẹhẹn ọfuanfon na ọ harẹ are mwu nẹ are i rhiẹ iniruo aye. Nẹ are i ji hẹrote ukoko Osolobrugwẹ rọ dẹre rhẹ ọbara Ọmọyen. 29 Mi rheri taghene mi rha nyarhẹn ne, erimwamwa egbo ra djoma ni na ruẹ uvwre are, aye i ji ruẹ usurhe na dẹndẹ-ẹn. 30 Ihworho ezẹko ni na homaphia uvwre are, ji tẹmro ri na chanhen urhomẹmro na neneyo aye i lọrọ idibo na lele oma.

31 “Omarana, are i rha dẹrẹ, are i ji karorhọ taghene te ason te uvo uvwre ẹgbukpe esa, mi ha urhebro rẹn are owuowọnwan rhẹ amioviẹ. 32 Vwana, mi firi are rhẹ abọ Osolobrugwẹ ọrhẹ ẹmro ẹghẹlẹ esiri rode ọnẹyen ne. Ẹmro ọnana ọnọ sabu bọn are gbanhon ji lẹrhẹ are ghalẹ uku rhẹ ọsoso ihworho re ru fon ne na. 33 Mie vwo ufiuphele kpahen idọlọ efuanfon yanghene oro yanghene ewun ohworho owuorowu-u. 34 Are i rheri taghene mi ha abọ mẹ enana wian, ni mi sabu hẹrote edamẹ enẹmẹ ọrhẹ edamẹ ihworho re leli mẹ. 35 Ọrẹ kizede kizede, mi djerie rẹn are ne taghene are i rha wian gbanhon omana, are ni na sabu hobọtua eri gwọlọ userhumu. Are i vi karorhọ ẹmro Ọrovwori ọwan Jesu ọ tare: ‘Omamerhomẹ ọ havwiẹ erhe tiobọnẹ ghwẹ ọrẹ arha yẹ ọwan.’”

36 Ọke i Pọl ọ tẹmro enana hin, no leliri aye ephian sighwẹ ji nẹrhomo. 37 Itiọrurhomẹmro, aye ephian ni viẹre omamọ, aye ni gbalẹ i Pọl* ji fiọnfiẹn rhẹ ẹgwọlọ. 38 Fọkime ọ darẹ aye omamọ ọke rọ ta rẹn aye taghene aye i rha mẹrẹn ughwaruiẹ ghwomara-an. Ọke oru, aye ni sunrien riẹ ekete ọkuna na ọ havwọ.