Ewian Inyikọ na
13 Vwana uvuẹn Antiọk, o vwo emẹraro ọrhẹ iyono ri ha ukoko na: edẹ aye yẹ Banabas, Simiọn re ji se i Naija, Lushọs ro rhiẹ onyẹ i Sairini, Maniẹn rẹ ọye ọrhẹ i Hẹrọd ro suẹn uvwrotọre ọrana i gbe riẹ isukuru kugbe, kugbe i Sọl. 2 Ọke aye e gbodibo* rẹn i Jehova* ji zinrin orhọmo, ẹhẹn ọfuanfon na nọ tare: “Are i sanọ i Banabas ọrhẹ i Sọl ha mẹ, fọkiẹ owian rọ lẹrhere mẹ se aye na.” 3 Omarana, ọke aye e zinrin orhọmo ji nẹrhomo hin, aye ni ha abọ kpahen aye ji dje aye nyarhẹn.
4 Omarana, ehworhare enana rẹ ẹhẹn ọfuanfon na o dje nyarhẹn na ni riẹ i Selusha, aye ni ruẹ ọkuna uvuẹn avwaye riẹ i Saiprọs. 5 Ọke aye e te i Salamis, aye ne ghwoghwo ẹmro Osolobrugwẹ uvuẹn i sinagọg itu i Ju na. Jọn ro lelirẹ aye, no gbodibo rẹn aye.*
6 Ọke aye e kiẹn ọsoso otọre rẹ ame o kinhariẹ na ye te i Pafọs, aye ni mẹrẹn onyẹ i Ju owu re se i Ba-Jesu ro ruẹ imajiki. Ọhworhare na ọmẹraro efian. 7 Ọye ọrhẹ igọvunọ* re se i Sẹjiọs Pọlọs ro rhiẹ ọgbirherhe, yi gba havwiẹ. Igọvunọ na no se i Banabas ọrhẹ i Sọl, fọkime o vwo omwemẹ ro no rhon ẹmro Osolobrugwẹ. 8 Ọrẹn, Ba-Jesu re ji se Ẹlimas (ro mevirhọ ọro ruẹ imajiki) nọ kparahasuẹ aye. Nọ damoma rọ nọ dobọ igọvunọ na ji, no jo rho vwo esegburhomẹmro kpahen Ọrovwori na. 9 Ọrẹn, Sọl re ji se i Pọl rẹ ẹhẹn ọfuanfon na ọ vuọn omayen, nọ tẹnrovi Ẹlimas. 10 Nọ ta riẹn: “Wẹwẹ ri rhiẹ ọmọ i Dẹbolo na, rẹ ọmuduo ọ vuọnren rhẹ aruẹ ọghware ọrhẹ aruẹ obiobiomu ephian, wẹwẹ ri rhiẹ ọvwreghrẹn irueruo ọsoso ephian, mesoriẹ wa damoma wu na chanhen izede egbagba i Jehova?* 11 Nughe! obọ i Jehova* ọ hasuọ ne. Omarana, wu ne tuẹro, wu ji mẹrẹn ọren na uvwrọke-e.” Ogege, ikẹruiẹ ni mwu avwre ji mwuokuku, nọ nya sa nya rie ji gwọlọ ohworho rọ nọ mọrẹn obọ ye. 12 Ọke igọvunọ na ọ mẹrẹn oborẹ ọ phiare, no mo rhiẹ odibo i Kristi, fọkime oborẹ o yono kpahen i Jehova* o gberie unu omamọ.
13 Vwana Pọl ọrhẹ ihworho re lelie, ni ruẹ owọ nẹ i Pafọs riẹ i Pẹga rọ ha uvuẹn i Pamfilia. Ọrẹn, Jọn nọ nyaji aye vwo ji ghwẹrioma riẹ i Jerusalẹm. 14 Ọrẹn, aye ni nẹ i Pẹga riẹ Antiọk rọ ha uvuẹn i Pisidia. Ọke aye a ruẹ uvuẹn i sinagọg owu uvuẹn Ẹdẹ Omeronmo na, aye ni siyẹ avwaye. 15 Ọke re se Urhi na ọrhẹ eyaya Emẹraro na hin uvuẹn afiede, era hẹrote i sinagọg na ni ta rẹn aye taghene: “Imizu, orhianẹ are i vwo ẹmro urhebro owuorowu rẹn ihworho na, are i haye phia.” 16 Omarana, Pọl no mevi ji rionbọ ye phia, nọ tare:
“Imizu, ihworho Izrẹl, ọrhẹ are ra zofẹn Osolobrugwẹ, are i kerhọ. 17 Osolobrugwẹ ihworho Izrẹl yọ djẹ esẹ ọwan ride ji ruẹ aye bunrhọ ọke aye e rhiẹ epha uvuẹn otọre Ijipt, no tiri aye nẹ avwaye rhẹ abọ ọgbogbanhon ọnẹyen. 18 No ji vwo erhionrin kpahen aye uvuẹn ato na uvwre ẹgbukpe 40. 19 Ọke rọ ghwọghọ egbamwa irhiruẹ uvuẹn otọre i Kenan hin, nọ ha otọre aye rẹn esẹ ọwan ride nẹ aye i haye riuku. 20 Ọsoso ekwakwa enana i phiare uvwre ẹgbukpe 450.
“Ọke oru, nọ ha iguẹnzọn mwu rẹn aye ye te ọke ọmẹraro Samuẹl. 21 Ọrana ọ vrẹn, aye ni tare taghene aye i gwọlọ orodje, Osolobrugwẹ nọ ha i Sọl ro rhiẹ ọmọ i Kish mwu no suẹn aye uvwre ẹgbukpe 40, ọye o nẹ uvwiẹ i Bẹnjamin rhe. 22 Ọke ro tiẹ i Sọl nẹ ẹrhẹ hin, nọ ha i Devid mwu no rhiẹ orodje. No se oseri kpahiẹn taghene: ‘Devid ro rhiẹ ọmọ i Jẹsi, ohworho ọmudu mẹ o vwo ekwerhọ kpahen; ono ruẹ ọsoso oborẹ mi gwọlọre.’ 23 Jerẹ oborẹ Osolobrugwẹ o veri, nọ ha i Jesu ro rhiẹ ọmọ* i Devid mwu, no rhiẹ osimi rẹn Izrẹl. 24 Bọmọke i Jesu ọ ki rhe, Jọn no ghwoghwo rẹn ihworho Izrẹl ephian uvuẹn afiede taghene aye i bromarhame no rhiẹ oka ẹghwẹriẹ. 25 Ọrẹn, ọke i Jọn ọ joma wian owian yen hiẹn ne, nọ tare: ‘Ọrọmo yẹ are e rori mẹ rhọ? Rhẹ omẹmẹ yẹ ohworho na-a. Ọrẹn nughe! Ohworho owu ọ sa ri mi vwe mwuovwan mi na rhan ufi isabatu ọnẹyen.’
26 “Imizu mẹ, are ri nẹ ekrun Ebraham rhe, ọrhẹ otu are ra zofẹn Osolobrugwẹ, e dje ẹmro usimirhọ ọnana vwe ọwan ne. 27 Ọrẹn, ihworho re rhirhiẹ i Jerusalẹm ọrhẹ ere suẹn aye, e rhiabọ dede usimi ọnana-a. Ọrẹn, ọke aye a haye guẹnzọn, aye ni ha ẹmro Emẹraro na te orugba, re se phia gorigori uvuẹn ẹdẹ omeronmo ephian. 28 Dedevwo aye a mẹrẹn oborẹ ọsoriẹ ana fọkiẹ kpe yi hwu-u, ọrẹn, aye ni ta rẹn i Pailet no kpe yi hwu. 29 Ọke aye a ha ọsoso oborẹ a ya kpahiẹn te orugba hin, aye ni kpareriẹ ruotọre nẹ orhan na ji kpariẹ rhẹ uvuẹn usin.* 30 Ọrẹn, Osolobrugwẹ nọ rhọmeriẹn nuhwu. 31 Uvwre ẹdẹ buebun, nọ homaphia rẹn ihworho ri lelirie nẹ i Galili riẹ i Jerusalẹm. Ihworho enana ye se oseri kpahiẹn rẹn awọrọ vwana.
32 “Omarana, ame e ghwoghwo iyẹnrẹn esiri rẹn are kpahen ive re ve rẹn esẹ ọwan ride. 33 Osolobrugwẹ ọ ha ọsoso ive na te orugba rẹn ọwan ne ri rhiẹ emọ aye, nyoma rọ rhọmọ i Jesu nuhwu, jerẹ oborẹ a ya rhẹ ọbe ijoro ọreva ye taghene: ‘Wẹwẹ ọmọ mẹ, inyenana mi rhiẹ ọsọ ne.’ 34 Itiọrurhomẹmro, Osolobrugwẹ nọ rhọmọ i Jesu nuhwu, ji yẹ ye ugboma ro no jo gbon. No dje ọnana rhiẹ urhomẹmro nyoma rọ ta: ‘Mi na fuephan dje ẹgwọlọ atamwu rẹn are jerẹ oborẹ mi ve rẹn i Devid.’ 35 Omaran ya ji ta uvuẹn ọbe ijoro ọrọrọ taghene: ‘Wu kwe nẹ ugboma ohworho ro vwo atamwu kpahuọn no gbo-on.’ 36 Ọrẹn, Devid ọ ga Osolobrugwẹ* uvuẹn ọke ọnẹyen. Ọke ro hwu, ne sinrien ba esẹ yi ride, ugboma yen no ji gbon. 37 Ọrẹn, ugboma i Jesu rẹ Osolobrugwẹ ọ rhọmọ nuhwu, o gbo-on.
38 “Omarana imizu, are i gbe rhe taghene ame e ghwoghwo rẹn are taghene ana sabu harhomu edandan are nyoma ohworho ọnana. 39 Urhi Mosis ọ sabu ruẹ are rhiẹ evwata-a. Ọrẹn fọkiẹ ọhworhare ọnana, Osolobrugwẹ ono se i kohworho kohworho ro vwo esegburhomẹmro kpahiẹn ọvwata. 40 Omarana, are i jomarhotọre neneyo oborẹ a tare uvuẹn eyaya Emẹraro na, i ja rha phia rẹn are: 41 ‘Are ra ha awan djechẹẹ na, are i ni owian mia wian uvuẹn ẹdẹ are. Ohworho ọrhọ tobọ gbikuien fiotọre rẹn are, o mwu are ẹro taghene mẹmẹ yi wian owian ọnana-a. Ọrẹn, ono gbe are unu, are ni na ji ghwọghọ.’”
42 Vwana, ọke inyikọ na a nyarhẹn, ihworho na na rẹ aye taghene aye i ma tẹmro enana riobarorhọ uvuẹn Ẹdẹ Omeronmo rọ ha kpahiẹn. 43 Omarana, ọke esiyẹ i sinagọg na o fuen, itu i Ju buebun ọrhẹ eri ghwẹriẹ rhiẹ ogame itu i Ju, ra ga Osolobrugwẹ, ni leli Pọl ọrhẹ i Banabas. Inyikọ na ni ha urhebro rẹn aye taghene aye i daji uvuẹn ẹghẹlẹ esiri rode Osolobrugwẹ.
44 Uvuẹn Ẹdẹ Omeronmo rọ ha kpahiẹn, joma ọsoso amwa na ni koko kugbe nẹ aye i rhon ẹmro i Jehova.* 45 Ọke itu i Ju na a mẹrẹn otu na, aye na rioma. Omarana, aye na kparahasuẹ oborẹ i Pọl ọ ta ji rhaphiẹ Osolobrugwẹ. 46 Omarana, Pọl ọrhẹ i Banabas ni fiudugbere ta rẹn aye: “O fori ne kiki ghwoghwo ẹmro Osolobrugwẹ rẹn are vwẹre. Nughe! ame e bru ihworho egbamwa na fọkime are i tiẹn ẹmro na ji brorhiẹn kpe oma are taghene are e mwuovwan arhọ i bẹmẹdẹ-ẹ. 47 Fọkime Jehova* o jurhi rẹn ame rhẹ ẹmro enana: ‘Mi haruọ mwu ne wu rhiẹ ukpẹ rẹn egbamwa na, ne wu ji rhiẹ usimi rẹn eri ha obẹta otọrakpọ na.’”
48 Ọke ihworho egbamwa na e rhon ẹmro enana, aye ni ghọghọren omamọ ji jiri ẹmro i Jehova.* Ọsoso ihworho ri vwo omwemẹ rẹ aye ina daji izede ro suẹn riẹ arhọ i bẹmẹdẹ, ni rhiẹ idibo i Kristi. 49 Habaye, ẹmro i Jehova* no kerabọ lele ọsoso ẹkwotọre na. 50 Ọrẹn, itu i Ju na ni riẹriẹ emẹse ezẹko ri titiri omamọ ra zofẹn Osolobrugwẹ, ọrhẹ ihworho eduado uvuẹn amwa na, aye ni kparehaso i Pọl ọrhẹ i Banabas ji le aye ruẹ otafe amwa aye. 51 Omarana, Pọl ọrhẹ i Banabas ni tue eyẹn nẹ aghwẹ aye no rhiẹ oseri hasuẹ aye. Ọke oru, aye ni riẹ Aikoniọm. 52 Idibo na ni vwo aghọghọ rhọ ji vuọn rhẹ ẹhẹn ọfuanfon na.