Ewian Inyikọ na
12 Uvwrọke ọrana, Hẹrọd ro rhiẹ orodje na nọ kparahasuẹ imizu ezẹko uvuẹn ukoko na. 2 Nọ ha odan ọlọkọ kpe i Jems hwu ro rhiẹ omizu i Jọn. 3 Ọke rọ mẹriẹn taghene ọnana ọ lẹrhẹ oma merhen itu i Ju na, no ji ye mwu i Pita. (Ọnana ọ phiare uvwrọke ra riorẹ Ibrẹdi ro Vwo Phie na.) 4 No mwurien firhẹ ekanron nẹ ẹko isodja ẹne i rha dẹriẹ ọke sansan, isodja ẹne yi ha ẹko owuowu. Hẹrọd o vwo ẹhẹn rọ nọ ha i Pita phia* uvuẹn obaro ihworho na, arha riorẹ Ọnyavrẹn na hin. 5 Omarana, ọke i Pita ọ ha uvuẹn ekanron, ukoko na nọ dabu fiomarhọ ẹrhomo ẹnẹ vwe Osolobrugwẹ fọkiẹ ọye.
6 Uvuẹn ason ana ki mẹrẹn ẹdẹ i Hẹrọd ọnọ ha i Pita ruẹ afen, Pita nọ merhẹn rhẹ ejọrọ eva ra ha kanriẹn uvwre isodja eva. Edẹrotọre i ji ha obaro ighwe na, ra dẹrẹ ekanron na. 7 Ọrẹn nughe! ọmakashe i Jehova* no mevi avwaye, ukpẹ no lo uvuẹn ekanron na. Nọ rhọmọ i Pita nyoma rọ hobọte okokọ efẹn yen, nọ ta riẹn: “Vẹnrẹn jọphẹrẹ!” Omarana, ejọrọ na ni se nẹ abọ ye. 8 Ọmakashe na nọ ta riẹn: “Kuẹ ewuon ọrhẹ isabatuọ rhọ.” No ruẹ omaran. Ọke oru, nọ ta riẹn: “Kuẹ ewun otafe ọnọ rhọ, ne wu rhe leli mẹ.” 9 Pita nọ ruẹ otafe ji ha kpahiẹn, ọrẹn o rhe taghene ọmakashe na yo ghini ruẹ ekwakwa enana-a. Itiọrurhomẹmro, o roro taghene ọ menemena arudo. 10 Ọke aye a nyavrẹn ẹko isodja ọrukaro ra dẹrẹ ọrhẹ ọreva ye hin, aye ni te anurẹsẹ uteru ra nya ruẹ amwa na, ighwe na ọvo no jeri. Ọke aye a ruẹ otafe, aye ni vwẹriẹ udumu owu, ogege ọmakashe na nọ nyajevwo. 11 Ọke i Pita o vwẹruọ oborẹ ọ phia, nọ tare: “Vwana, ọ dabu mwu mẹ ẹro ne taghene i Jehova* yo dje ọmakashe ọnẹyen me simi mẹ nẹ abọ i Hẹrọd ọrhẹ kemru kemru rẹ itu i Ju na e fiẹrorhọ taghene ọnọ phia.”
12 Ọke i Pita ọ mẹrẹn ọnana vwrurhe, no riẹ oghwa i Meri ro rhiẹ izu i Jọn re ji se i Mak. Imizu ezẹko i kokori avwaye ra nẹrhomo. 13 Ọke rọ ha obọ fomu ighwe anurẹsẹ na, ọvrẹn ọgbọtọ owu re se i Roda nọ mọ kpahenrhọ riẹn. 14 Ọke ro rhon uphele i Pita, nọ ghọghọren omamọ te erhirhiẹ ro vwo kwe je ighwe na, ọrẹn nọ zẹ ghwẹrioma ya nẹ iyẹnrẹn taghene i Pita o mevi anurẹsẹ na. 15 Aye ni ta riẹn: “We kpomorhuẹ.” Ọrẹn, no tie taghene i Pita yọ ha avwaye. Aye ni ta riẹn: “Ọmakashe ọnẹyen.” 16 Ọrẹn, Pita no mevi avwaye ji ha obọ fomu ighwe na. Ọke aye e je ighwe na, aye ni mẹrẹn i Pita, ọnana no gberẹ aye unu omamọ. 17 Ọrẹn, nọ ha obọ ta rẹn aye nẹ aye i fọdu. Nọ dabu gbikun rẹn aye kpahen oborẹ i Jehova* o ru tie nẹ ekanron na, nọ ta rẹn aye: “Are i ya nẹ iyẹnrẹn ekwakwa enana rẹn i Jems ọrhẹ imizu na.” Ọke oru, nọ ruẹ otafe ji riẹ ekete ọrọrọ.
18 Vwana ọke urhiọke o te, ọyanghan nọ homaphia uvwre isodja na, fọkime aye e rhe oborẹ ọ phia rẹn i Pita-a. 19 Hẹrọd nọ dabu gbẹro rhotọre gwọlọ i Pita, ọrẹn ọ mẹriẹ-ẹn. Omarana, nọ yọ nọ isodja ri dẹrotọre uvuẹn ason ọrana enọ, no jurhi taghene a ha oja riẹ aye. Ọke oru, Hẹrọd no nẹ i Judia riẹ i Sẹseria, no rhirhiẹ oboran ibiọke.
20 Vwana, Orodje Hẹrọd ọ tuekwẹre kpahen* ihworho i Taya ọrhẹ i Saidọn. Omarana, ihworho na ni kwomakugbe bruie rhe. Aye ni leli Blastọs rọ hẹrote oghwa i Hẹrọd* tẹmro nọ ha userhumu rẹn aye. Ọke oru, aye ni bru orodje na nya ye lelie kwaphiẹrhọ, fọkime otọre orodje na yẹ emaren ihworho ẹkwotọre erana e nẹ sa. 21 Ẹdẹ owu, Hẹrọd no kuẹ ewun orodje ọnẹyen rhọ ji siyẹ aga ẹzenguon na, nọ tẹmro rẹn ihworho na. 22 Omarana, ihworho ri kokori avwaye ne korunu phia taghene: “Ọnana uphele osolobrugwẹ, rhẹ ọrẹ onyakpọ-ọ!” 23 Ogege, ọmakashe i Jehova* nọ ghwiẹriẹ, fọkime ọ ha ujiri na rẹn Osolobrugwẹ-ẹ. Ikelewọre ni reriẹ, no hwuru.
24 Ọrẹn, ẹmro i Jehova* no kerabọ rhọ, ihworho buebun ni me vwo imwẹro.
25 Ọke i Banabas ọrhẹ i Sọl a dabu wian owian userhumu na hin uvuẹn i Jerusalẹm, aye ni ghwẹrioma ji ha i Jọn re se i Mak lele oma.