Ewian Inyikọ na
14 Vwana uvuẹn Aikoniọm, aye ni ruẹ i sinagọg itu i Ju na ji ghwoghwo rẹn aye uvuẹn izede ro mwidjẹn, rọ lẹrhẹ itu i Ju ọrhẹ itu i Grik buebun rhiẹ idibo i Kristi. 2 Ọrẹn, itu i Ju ri vwe vwo imwẹro, ni biomu ẹhẹn ihworho egbamwa na ji lẹrhẹ aye tuekwẹre kpahen imizu na. 3 Omarana, aye ni ghwọghọ ọke buebun avwaye ji ghwoghwo rhẹ ohinmi nyoma omẹgbanhon i Jehova.* Osolobrugwẹ no rurie nẹ inyikọ na i ruẹ eka ọrhẹ igbevwunu, no djephia taghene urhomedje kpahen ẹghẹlẹ esiri rode ọnẹyen urhomẹmro. 4 Ọrẹn, oghalẹ nọ homaphia uvwre ihworho amwa na. Ihworho ezẹko i ha obọrẹ itu i Ju na, ọrẹn awọrọ i ha obọrẹ inyikọ na. 5 Omarana, ihworho egbamwa na, itu i Ju na ọrhẹ ere suẹn aye, ni djiroro rẹ aye ina ha oja riẹ inyikọ na ji fiẹ aye kpe. 6 Ọrẹn, ne je inyikọ na rhe kpahen irorẹdjẹ na. Omarana, aye ni zẹ riẹ emwa i Likonia, Listra ọrhẹ Dẹbi kugbe ekogho ri kinhariẹ avwaye. 7 Aye ne ji ghwoghwo iyẹnrẹn esiri na uvuẹn avwaye.
8 Vwana uvuẹn i Listra, o vwo ọhworhare owu ro siyẹ otọre. Ọye ukpolo nẹ ephan rhe, ọ ji nya dẹ-ẹ. 9 Ọhworhare na nọ kerhọ i Pọl ọke rọ tẹmro. Pọl nọ tẹnrovie ji mẹrẹnvwrurhe taghene o vwo esegburhomẹmro taghene ana sabu simie. 10 Omarana, Pọl nọ tare rhẹ uphele gorigori: “Vẹnrẹn mevi.” Ọhworhare na no pho vẹnrẹn, nọ tuẹn onya rhọ. 11 Ọke ihworho na a mẹrẹn oborẹ i Pọl o ruru, aye ni kperi phia uvuẹn edjadjẹ i Likonia taghene: “Isolobrugwẹ na i dẹrẹrhiẹ ituakpọ ji bru ọwan rhe ne!” 12 Aye ne se i Banabas i Zus, ọrẹn aye ne se i Pọl i Hẹmis, fọkime ọye yọ mai tẹmro. 13 Orherẹn i Zus rẹ oghwa ẹga ye ọ ha uvuẹn anurẹsẹ amwa na, nọ ha erhuẹn ọrhẹ idodo re rhuonrin rhiẹ anurẹsẹ amwa na, ọye ọrhẹ ihworho na na gwọlọ ze izobo rẹn aye.
14 Ọrẹn ọke ọnyikọ Banabas ọrhẹ Pọl e rhon kpahen ọnana, aye ni bẹrẹ ewun aye ji zẹ ruẹ erhẹrhẹ otu na, aye ni kperi phia: 15 “Ihworho mẹ, mesoriẹ are e ruẹ ekwakwa enana? Ame ituakpọ ri ji vwo ovwiẹlẹme sansan jerẹ are. Ame e ghwoghwo iyẹnrẹn esiri rẹn are, neneyo are i tiobọnu ekwakwa ifefe enana. Nẹ are i bru Osolobrugwẹ ro nyerẹn na rọ ma odjuwu ọrhẹ otọrakpọ na kugbe urhie ọduado na ọrhẹ ọsoso ekwakwa ri ha uvuẹn aye. 16 Ọke ahwanren, ọ ha uphẹn rẹn ihworho egbamwa na nẹ aye i ruẹ oborẹ o jeri aye. 17 Ọrẹn, no ji se oseri kpahen omayen nyoma ro ruẹ ekwakwa irhorhomu. O tiobọnu oso rẹn are nẹ odjuwu rhe, ji lẹrhẹ ewawọ are mọ uvuẹn ọke ro fori. Ọ yẹrẹ are emaren ri na vuọn are ephan ji lẹrhẹ ọmudu are vuọn rhẹ aghọghọ.” 18 Udabọ ẹmro enana aye i tare na, ọ ji bẹn rẹ aye ina dobọ otu na ji nẹ aye i je ze izobo rẹn aye.
19 Ọrẹn, itu i Ju ni nẹ Antiọk ọrhẹ Aikoniọm rhe, ji riẹriẹ otu na. Aye ni fiẹ Pọl ji kpolie riẹ otafe amwa na, fọkime aye e roro taghene o hwu ne. 20 Ọrẹn, ọke idibo na e brugba ye, no vẹnrẹn ruẹ uvuẹn amwa na. Ẹdẹ ọreva ye, ọye ọrhẹ i Banabas ni riẹ i Dẹbi. 21 Ọke aye e ghwoghwo iyẹnrẹn esiri na uvuẹn avwaye, ji ha userhumu rẹn ihworho ezẹko rhiẹ idibo i Kristi hin, aye ni ghwẹrioma riẹ i Listra, Aikoniọm ọrhẹ Antiọk. 22 Aye ni bọn idibo na gbanhon avwaye ji ha urhebro rẹn aye nẹ aye i daji uvuẹn esegburhomẹmro na, nyoma aye a ta rẹn aye: “Ene vi rhiẹromẹrẹn ukpokpogho buebun vwẹre, na ki ruẹ Uvie Osolobrugwẹ.” 23 Habaye, aye ni ha ekpako mwu rẹn aye uvuẹn ukoko owuowu. Aye ni nẹrhomo ji zinrin orhọmo jeghwai fiẹ aye rhẹ abọ i Jehova* rẹ aye i vwo imwẹro kpahen na.
24 Ọke oru, aye ni nya i Pisidia vrẹn ye fiẹ Pamfilia. 25 Ọke aye e ghwoghwo ẹmro Osolobrugwẹ hin uvuẹn i Pẹga, aye ni riẹ Atalaya. 26 Aye ni ruẹ ọkuna nẹ avwaye riẹ Antiọk, ro rhiẹ ekete imizu na a nẹrhomo vwe Osolobrugwẹ no dje ẹghẹlẹ esiri rode ọnẹyen rẹn aye fọkiẹ owian aye i wian hin ne na.
27 Ọke aye e te avwaye ji se imizu ri ha ukoko na kugbe, aye ni nẹ iyẹnrẹn rẹn aye kpahen ekwakwa buebun rẹ Osolobrugwẹ o ruru nyoma aye, ọrhẹ oborẹ o ru rhie uphẹn firhọ nẹ ihworho egbamwa na i vwo esegburhomẹmro. 28 Omarana, aye ni lele idibo na rhirhiẹ ye ọke jijiri.