Iyẹnrẹn Esiri Luk
8 Ọke oru ibiesuọn, Jesu no kiẹn amwa owu riẹ ọrọrọ, ọrhẹ ọko owu riẹ ọrọrọ, ji ghwoghwo iyẹnrẹn esiri Uvie Osolobrugwẹ. Awan Ikpereva na i ji lelie, 2 omaran ji te emẹse ezẹko ri Jesu o le ikpodje evwiavwia nẹ oma aye ji simi emiamo aye: Edẹ aye yẹ Meri re ji se i Magdalin, ri Jesu o le ikpodje irhiruẹ nẹ omayen. 3 Joana ro rhiẹ ane i Kuza rọ wian rẹn i Hẹrọd, Suzana ọrhẹ emẹse erọrọ buebun ra ha enyerẹn aye gbodibo rẹn aye.
4 Vwana, ọke otu buebun ọrhẹ ihworho ri ghwiẹ nẹ amwa sansan rhe e koko kugbe, Jesu nọ ha udje owu yono aye: 5 “Ọghwẹrẹ owu nọ yọ wọ ikeri ewawọ enẹyen. Ọke rọ wọ ikeri na, ezẹko usuẹn aye ni se rhẹ okokọ izede, ne sinhin rẹ aye botọre, efen ri ha ivwrevwrede na ni rerẹ aye. 6 Ikeri ezẹko ni se rhẹ oberun atita, ọke aye e mwu hin, aye ni kare fọkime otọre na o vwo ame-e. 7 Ikeri erọrọ ni se rhẹ uvwre idjigbẹn, idjigbẹn na ni mwurun ji dumu aye kpe. 8 Ọrẹn, ikeri erọrọ ni se rhẹ omamọ otọre, ọke aye e mwu, aye ni mọ emamọ rọ ha akwa 100 bun ghwẹ oborẹ a wọre.” Ọke rọ tẹmro enana, nọ tare: “Jenẹ ọro vwo erhọ rọ nọ kerhọ, ọ kerhọ.”
9 Ọrẹn, idibo yi ni nọriẹn oborẹ udje ọnana o mevirhọ. 10 Nọ ta rẹn aye: “E kwenu rẹn are nẹ are i vwẹruọ odjahen ọfuanfon ọrẹ Uvie Osolobrugwẹ, ọrẹn harẹn eri hẹrhẹre na, ekwakwa ephian ghwai idje rẹn aye. Dedevwo aye e nughe, aye i vwa mẹrẹn emru owuorowu-u, dedevwo aye e rhon, aye i vwe vwẹruọ ye-e. 11 Vwana, ọnana yẹ oborẹ udje na o mevirhọ: Ukeri na yẹ ẹmro Osolobrugwẹ. 12 Harẹn ikeri ri se rhẹ okokọ izede na, enana yẹ ihworho ri rhon ẹmro na. Ọrẹn, Dẹbolo nọ mọ ha ẹmro na nẹ uvuẹn ọmudu aye, neneyo aye i je rhe vwo imwẹro ọrhẹ usimirhọ. 13 Harẹn ikeri ri mwu rhẹ oberun atita na, enana yẹ ihworho ri rhon ẹmro na ji rhiabọ dedie rhẹ aghọghọ, ọrẹn aye e vwo esiri-i. Aye i vwo imwẹro uvwrọke, ọrẹn ọke ọdamuni ọ homaphia, aye ni seri. 14 Harẹn ikeri ri se rhẹ uvwre idjigbẹn na, enana yẹ ihworho ri rhon ẹmro na, ọrẹn ọfiamu, efe ọrhẹ akpẹriọ ọrẹ enyerẹn akpọ ọnana, no mwurun aye ha ji kenken ẹmro na. Omarana, aye arha sabu mọ emamọ irhorhomu owuorowu-u. 15 Harẹn ikeri ri mwu rhẹ otọre orhorhomu na, enana yẹ ihworho ri rhon ẹmro na rhẹ omamọ ẹhẹn, aye ni sẹroriẹ ji mọ emamọ rhẹ edirin.
16 “O vwo ohworho rọ ha ukpẹ tuẹ ji ha eriẹ rhurhie yanghene kparẹ ukpẹ na rhẹ obotọre ekpa-a. Ukpomaran, nọ haye kpahen oborẹ ọ mọrẹn ukpẹ, neneyo ihworho ri ruẹ oghwa na i sabu mẹrude. 17 Fọkime o vwo emru owuorowu re tinu re ne je ghwolo phia-a. O vwo emru owuorowu ra dabu rhurhu re ne je rhe kpahen yanghene ghwolo phia-a. 18 Omarana, are i dabu ni oma so sẹ are a dabu kerhọ, fọkime kohworho kohworho ro vwo emru, ana haba oborẹ o vwori na. Ọrẹn ohworho ro vwo vwo, oborẹ ọ tobọ roro taghene o vwori dede, ana haye mie yi.”
19 Vwana, izu i Jesu ọrhẹ imizie ni brurie rhe, ọrẹn aye a sabu tikẹriẹ-ẹ, fọkiẹ otu na. 20 Omarana, na ta riẹn taghene: “Izuo ọrhẹ imizuo i mevi otafe, aye a gwọlọ mẹruọn.” 21 Jesu nọ ta rẹn aye: “Izu mẹ ọrhẹ imizu mẹ yẹ ihworho enana re rhon ẹmro Osolobrugwẹ ji haye ruiruo.”
22 Ẹdẹ owu, Jesu ọrhẹ idibo yi ni ruẹ owọ owu, nọ ta rẹn aye: “Jena danvrẹn riẹ obọreva urhie na.” Omarana, aye ne bi owọ na nyarhẹn. 23 Ọrẹn, ọke aye e bi owọ na nyarhẹn, Jesu no se bru omerhẹn. Ogiribo ọgbogbanhon no zuẹ uvuẹn urhie na. Owọ aye nọ vuọnren rhẹ ame te erhirhiẹ rọ joma rhue. 24 Omarana, aye ni nyarhẹn ya rhọmiẹ ji ta: “Oyono, Oyono, uhwu yẹ ame i havwọ na!” Omarana, no vẹnrẹnren ji vanghwu ogiribo na ọrhẹ ame rọ wọnrọn na, aye ni zienrin, ekete ephian ni fọre. 25 Omarana, nọ nọren aye: “Esegburhomẹmro are ne?” Ọrẹn, ofẹn no mwurun aye, no ji gbe aye unu omamọ, aye na ta rẹn owuowọnwan: “Ọnana aruẹ ohworho ọgo? Ọ tobọ vanghwu ogiribo ọrhẹ ame na, aye na huphele yi.”
26 Aye ni te akpa uvuẹn uvwrotọre itu i Gẹrasa, rọ ha obọrẹ ọ dẹrughwaroghwu i Galili. 27 Ọke i Jesu ọ ruotọre nẹ owọ na, ọhworhare owu ro rhiẹ onyẹ amwa na rẹ okpodje ọ ha omayen, nọ vwariẹ. Uvwrọke ezẹko rhe na, o ji kuẹ ewun owuorowu rhọ-ọ, no ji rhirhiẹ uvwre isin* na ukperẹ ono rhirhiẹ uvuẹn oghwa. 28 Ọke rọ kparughwaro mẹrẹn i Jesu, nọ viẹ phia ji sighwẹ rhẹ obaruiẹ, nọ tare rhẹ uphele gorigori taghene: “Me yẹ omẹmẹ ọrhẹ owẹwẹ i gbe vwo kugbe, Jesu ro rhiẹ Ọmọ Osolobrugwẹ rọ Mai Rierun na? Biko, wu vwa ha oja re mẹ-ẹ.” 29 (Fọkime i Jesu ọ havwẹ ta rẹn okpodje na no nẹ oma ọhworhare na. Ọ ruẹ oma ọhworhare na uvuẹn erhirhiẹ sansan ne.* Omarana, na ha ejọrọ sansan gba aghwẹ ọrhẹ abọ ọhworhare na, ji ha ohworho mwuẹ nọ rhọ dẹriẹ. Ọrẹn, no vwere ejọrọ na, okpodje na no ji mwuie riẹ ekete kologho.) 30 Jesu nọ nọriẹn: “Me yẹ odọ?” Nọ kpahenrhọ ye: “Lijọn,” fọkime ikpodje buebun yi ha omayen. 31 Aye na rẹ i Jesu taghene o vwo le aye ruẹ ukpotọ ro vwo vwoba na-a. 32 Vwana, iti buebun a riẹ emaren avwaye uvuẹn oberun ugbenu na. Omarana, aye na rẹ i Jesu no kwenu rẹn aye nẹ aye i ruẹ uvuẹn oma iti na, Jesu no kwenu rẹn aye. 33 Ogege, ikpodje na ni nẹ oma ọhworhare na, aye ni ruẹ oma iti na. Iti na ni họrhọ nẹ okokọ ugbenu na* ya ruẹ uvuẹn urhie na, aye ni hwu rhẹ uvuẹn ame na. 34 Ọrẹn, ọke ihworho ra hẹrote iti na, a mẹrẹn oborẹ ọ phiare, aye ni zẹ ya nẹ iyẹnrẹn rẹn ihworho ri ha uvuẹn amwa na ọrhẹ eri kẹrẹ avwaye.
35 Omarana, ihworho ni ghwiẹ ya mẹrẹn oborẹ ọ phiare na. Aye ni bru i Jesu, ji mẹrẹn ọhworhare rẹ ikpodje i nẹ omayen na. Ọhworhare na o kuẹ ewun rhọ ne, iroro yi ọ ji gba ne, o ji siyẹ kẹrẹ aghwẹ i Jesu. Omarana, ofẹn no mwurun aye. 36 Habaye, ihworho ri rhiẹromẹrẹn oborẹ ọ phiare na, ni nẹ iyẹnrẹn rẹn aye kpahen oborẹ ikpodje na i ru nẹ oma ọhworhare na. 37 Omarana, otu buebun re rhirhiẹ uvwrotọre itu i Gẹrasa, ni ta rẹn i Jesu no nẹ ekete aye, fọkime ofẹn o mwu aye omamọ. Omarana, Jesu nọ yọ ruẹ owọ ro no nẹ avwaye. 38 Ọrẹn, ọhworhare rẹ ikpodje i nẹ omayen na, nọ rẹ i Jesu taghene ono lelie, ọrẹn no djerie ghwẹrioma ji ta riẹn taghene: 39 “Ghwẹrioma riẹ oboghwa, ne wu rha ta rẹn ihworho kpahen oborẹ Osolobrugwẹ o ru ha wẹn.” Omarana, ọhworhare na nọ nyarhẹn, no ghwoghwo uvuẹn ọsoso amwa na kpahen oborẹ i Jesu o ru hariẹn.
40 Ọke i Jesu ọ ghwẹrioma rhe, otu na ni dabu rhiabọ dedie fọkime aye ephian a hẹrhiẹ. 41 Ọrẹn nughe! ọhworhare owu re se i Jairọs no brurie rhe. Ọhworhare ọnana ọ ha usuẹn ere suẹn uvuẹn i sinagọg na. No sighwẹ rhẹ obaro i Jesu, ji rẹ ye taghene ọ rhiẹ oghwa ye, 42 fọkime ọmọyen ọgbọtọ owu ọvo rọ ha ẹgbukpe 12 o hwuẹ.
Ọke i Jesu ọ nyarhẹn, otu na ne kenkien. 43 Vwana, o vwo ọmase owu ro kpomu emiamo rẹ ọbara ọ zẹ nẹ omayen sa ẹgbukpe 12 ne, ọ ji sabu mẹrẹn ohworho owuorowu ro simirie-en. 44 Ọmase na nọ nya oberhumu hobọte ejẹnjẹn ewun otafe i Jesu. Ogege, ọbara rọ zẹ nẹ omayen sa bi na nọ dobọji. 45 Omarana, Jesu nọ nọren: “Ọrọmo yọ hobọte mẹ?” Ọke ihworho ephian a tian taghene rhẹ aye-e, Pita nọ tare: “Oyono, otu na ye giduo jeghwai kenkuon.” 46 Ọrẹn, Jesu nọ tare: “Ohworho ọ hobọte mẹ, fọkime mi rheri taghene omẹgbanhon o nẹ oma mẹ.” 47 Ọke ọmase na ọ mẹrẹnvwrurhe taghene i Jesu o rhe kpahen oborẹ ọ phiare na, nọ phariẹ ji sighwẹ rhẹ obaro i Jesu. Uvuẹn udaro ihworho ephian, ọmase na nọ ta oborẹ ọsoriẹ ọ hobọte i Jesu ọrhẹ oborẹ omayen o ru gbanhon ogege. 48 Ọrẹn, Jesu nọ ta riẹn: “Ọgbọtọ mẹ, esegburhomẹmro ọnọ o simiruon ne. Gba nyarhẹn ọrẹ ufuoma.”
49 Ọke rọ ji tẹmro, ọhworhare owu no nẹ oghwa i Jairọs rhe ji ta riẹn taghene: “Ọmọ ọgbọtọ o hwu ne, wu vwa laha Oyono na ghwomara-an.” 50 Ọke i Jesu o rhon ẹmro ọnana, nọ ta rẹn i Jairọs: “Wu vwa zofẹ-ẹn, ghwai vwo esegburhomẹmro, ọmọ no no nyerẹn.” 51 Ọke i Jesu o te oghwa na, o kwe nẹ ohworho owuorowu o lelie-e, jokpanẹ i Pita, Jọn, Jems kugbe ọsẹ ọrhẹ izu ọmọ na. 52 Ọrẹn, ọsoso ihworho na na viẹ ji vwerhoma fọkiẹ ọmọ na. Omarana, Jesu nọ ta rẹn aye: “Are i vwa viẹ-ẹ, fọkime ọmọ na o hwu-u, ọrẹn ọ merhẹn.” 53 Ọke aye e rhon ẹmro ọnana, aye na haye djechẹẹ, fọkime aye i rheri taghene ọmọ na o hwu ne. 54 Ọrẹn, Jesu nọ mọrẹn obọ ọgbọtọ na ji ta riẹn: “Ibiẹ ọgbọtọ na, vẹnrẹn!” 55 Ọgbọtọ na nọ rharhumu mwuẹhẹn, no vẹnrẹnren ogege, Jesu nọ tare taghene a yẹ ye emaren re. 56 Itiọrurhomẹmro, oma ọ merhen eri vwiẹ ọmọ na omamọ. Ọrẹn, Jesu nọ ta rẹn aye taghene aye i vwa ta rẹn ohworho owuorowu kpahen oborẹ ọ phiare na-a.