Iyẹnrẹn Esiri Luk

7 Ọke i Jesu ọ tẹmro rẹn ihworho na hin, no riẹ i Kapaniọm. 2 Vwana, o vwo olotu isodja owu ro vwo ọvrẹn rọ ghanren hariẹn omamọ, ọvrẹn na o kpomẹ gbangbanhon te erhirhiẹ rọ joma hwuẹ ne. 3 Ọke ro rhon kpahen i Jesu, no dje ekpako itu i Ju ezẹko bruie, nẹ aye i rẹ ye no mo simi ọvrẹn yen. 4 Aye ni bru i Jesu. Aye na rẹ ye gbangbanhon taghene: “O fo ohworho wu na ha userhumu riẹn, 5 fọkime o vwo ẹgwọlọ kpahen agbamwa ọwan, ọye yọ tobọ bọn i sinagọg ọwan.” 6 Omarana, Jesu no lelirẹ aye nyarhẹn. Ọrẹn, ọke rọ joma te oghwa na, olotu isodja na no dje ihworho bruie nya, nẹ aye i ta riẹn taghene: “Ọga, wu vwe kpokpoma-a, fọkime mie mwuovwan wu na rhiẹ oghwa mẹ-ẹ. 7 Ọrana yọ soriẹ mi vwe bruo rhe. Ọrẹn, ghwai ta taghene omayen ọ gbanhon, oma odibo mẹ na nọ nọ gbanhon. 8 Fọkime mi ha otọre omẹgbanhon usun, mi ji vwo isodja ri ha otọre usun mẹ. Mi rha ta rẹn ọnana, ‘Nyarhẹn!’ nọ nyarhẹn. Mi rha ta rẹn ọrọrọ, ‘Mọ!’ nọ sa, mi rha ji ta rẹn ọvrẹn mẹ, ‘Ruẹ omana!’ no ruie.” 9 Ọke i Jesu o rhon ẹmro enana, no gberie unu, nọ dẹrughwaroghwu otu re lelie na ji ta rẹn aye: “Mia ta rẹn are taghene, mia ji mẹrẹn aruẹ esegburhomẹmro ọgbogbanhon ọnana uvuẹn Izrẹl dede-e.” 10 Ọke ihworho re djeri urhomu na a ghwẹrioma rhiẹ oghwa olotu isodja na, aye ni mẹrenriẹn taghene oma ọvrẹn na ọ gbanhon ne.

11 O jiri-i, Jesu no riẹ amwa owu re se i Nein, idibo yi ọrhẹ otu buebun ni ji lelie. 12 Ọke rọ joma te anurẹsẹ amwa na, nughe! ihworho ezẹko a kpare orinmi ọhworhare owu nẹ amwa na, ọye ọvo yẹ izie o vwiẹre. Habaye, izu ọhworhare na, ọmase uku. Otu buebun ri nẹ amwa na rhe, e ji lele ọmase na. 13 Ọke Ọrovwori na ọ mẹrẹn ọmase na, aruiẹ nọ dọnriẹn, nọ ta riẹn: “Wu vwa viẹ ghwomara-an.” 14 Omarana, nọ nyarhẹn ya hobọte ekpa orinmi na, eri kpare orinmi na ni mevi. Jesu nọ tare: “Idama na, mia ta wẹn, vẹnrẹn!” 15 Ọhworhare ro hwuru na, no vẹnrẹn siyẹ ji tẹmro, Jesu nọ hariẹ rẹn izie. 16 Omarana, ofẹn no mwurun aye ephian, aye ne jiri Osolobrugwẹ taghene: “A ha ọmẹraro ọduado mwu uvwre ame ne.” Aye na ji ta, “Osolobrugwẹ ọ kpomavi rẹn ihworho enẹyen ne.” 17 Iyẹnrẹn ọnana kpahen oborẹ i Jesu o ruru na, no kperusi lele ọsoso i Judia ọrhẹ emwa ri kinhariẹ avwaye.

18 Vwana, idibo i Jọn ni nẹ iyẹnrẹn ekwakwa enana ephian rẹn i Jọn. 19 Omarana, Jọn no se idibo yi awanva ji dje aye ya nọ Ọrovwori na taghene: “Wẹwẹ yẹ Ohworho rọ sa na, gbinẹ ame i fiẹrorhọ ohworho ọrọrọ?” 20 Ọke ehworhare na e bru i Jesu rhe, aye ni ta riẹn: “Jọn ro Brawanrhame na o djerẹ ame mọ nọ taghene, ‘Wẹwẹ yẹ Ohworho rọ sa na, gbinẹ ame i fiẹrorhọ ohworho ọrọrọ?’” 21 Uvuẹn unọke ọrana, Jesu no simi emiamo ihworho buebun, tobọ te emiamo ri gbanhonron omamọ. No ji le ikpodje nẹ oma ihworho, ji rhie ikẹro ituẹro buebun. 22 Nọ ta rẹn ehworhare na: “Are i nyarhẹn ya nẹ iyẹnrẹn rẹn i Jọn kpahen oborẹ are i mẹrẹnren ji rhon ne: Ituẹro a mẹrude ne, ikpolo a nya ne, e ruẹ ere kpomẹ emiamo oti fuan ne, idienrhọ e rhon ẹmro ne, a rhọmọ eri hwuru nuhwu ne. E ji ghwoghwo iyẹnrẹn esiri na rẹn ivwiegbere ne. 23 Omamerhomẹ ọ havwiẹ rẹn ohworho rọ vwọ mẹrẹn emru rọ nọ suẹ ọgbanrhọ riẹn uvuẹn omamẹ.”

24 Ọke idibo i Jọn a nyarhẹn hin, Jesu nọ tẹmro rẹn otu na kpahen i Jọn: “Me yẹ are i nyarhẹn ye ni uvuẹn ato na? Odin rẹ aphẹrẹ o zuẹ sa zuẹ rie? 25 Me yẹ are i tobọ ye ni? Ọhworhare ro kuẹ obọdẹn ewun rhọ? Itiọrurhomẹmro, ihworho ri ha eghwa irodje ye kuẹ obọdẹn ewun rhọ, ji riakpọ. 26 Omarana, ni me yẹ are i ghini ye ni? Ọmẹraro? Itiọrurhomẹmro mia ta rẹn are, ọ tobọ ghwẹ ọmẹraro dede. 27 Ohworho ọnana ya ya kpahen taghene: ‘Nughe! Mie dje ọnyikọ mẹ kobaro wẹn,* ro no mwuegbe izede enọ hẹrhuọ.’ 28 Itiọrurhomẹmro mia ta rẹn are, usuẹn ihworho rẹ emẹse i vwiẹ ne, o vwo ọrọ do ghwẹ i Jọni-i. Ọrẹn, ohworho rọ mai kamu uvuẹn Uvie Osolobrugwẹ, ọ do ghwẹ ye.” 29 (Ọke ọsoso ihworho na ọrhẹ ere vwiosa urhomu na e rhon ẹmro ọnana, aye na ta taghene Osolobrugwẹ ọvwata, fọkime i Jọn yo bruru aye rhẹ ame. 30 Ọrẹn, itu i Farisi na ọrhẹ eri dabu rhe Urhi na ni djẹ urhebro* Osolobrugwẹ ọ yẹrẹ aye fughwẹ, fọkime rhi Jọn yo bruru aye rhẹ ame-e.)

31 “Omarana, ayọmo mi na ha ehworhare uvwiẹ ọnana dje, ayọmo yẹ aye i họhọre? 32 Aye i họhọ emọvwerhe ri siyẹ ekete eyi, re se ereva aye ji ta rẹn aye taghene: ‘Ame i kporo iflutu rẹn are, ọrẹn are e gbigbegbe-e. Ame i viẹre gbangbanhon, ọrẹn are a viẹ-ẹ.’ 33 Omaran ọ ji havwọ, Jọn ro Brawanrhame ọ riẹ ibrẹdi yanghene da iwaini-i, ọrẹn are na ta: ‘Okpodje ọ ha omayen.’ 34 Ọke Ọmọ onyakpọ na ọ rhe, ọ riẹ emaren ji da, ọrẹn are na ta: ‘Nughe! Ọgbọre ọrhẹ ọdinyo yo ruẹ, jeghwai igbehian ere vwiosa urhomu ọrhẹ iruedandan!’ 35 O vwo ẹmro-o, e dje ẹghwanren rhiẹ ọvwata* nyoma ewian yen ephian.”*

36 Vwana, owuọwan usuẹn itu i Farisi na nọ ha use rẹn i Jesu ọgbọ buebun no mo lelie riẹ emaren. Omarana, Jesu nọ ruẹ oghwa onyẹ i Farisi na ji siyẹ ekete imẹdjẹ na. 37 Nughe! ọmase owu re rheri uvuẹn amwa na rhẹ oruọdandan, no rhonrin taghene i Jesu ọ riẹ emaren* uvuẹn oghwa onyẹ i Farisi na. Omarana, ọmase na nọ kpare ololo alabasta ro vwo ichani ro gbon phanphanphan lele oma. 38 Ọmase na no yo sighwẹ rhẹ oberhumu i Jesu, nọ viẹ. Nọ ha amioviẹ ye kpọtọ aghwẹ i Jesu ji ha ẹton urhomie hionrẹn amioviẹ na. Habaye, nọ dabu fiọnfiọn aghwẹ i Jesu ji rhie ichani ro gbon phanphanphan na rhẹ aghwẹ ye. 39 Ọke onyẹ i Farisi rọ ha use rẹn i Jesu ọ mẹrẹn ọnana, nọ ta rẹn omayen: “Orhianẹ ọhworhare ọnana ghini ọmẹraro, manẹ o rhe aruẹ ohworho ọmase ọnana rọ hobọte yi na ọ havwọ, taghene ọye oruọdandan.” 40 Ọrẹn, Jesu nọ ta riẹn: “Saimọn, mi vwo oborẹ mia gwọlọ ta wẹn.” Saimọn nọ tare: “Oyono, mie rhon!”

41 Ehworhare awanva a riosa ọhworhare owu ro momo igho rẹn ihworho. Owu ọ riosa i dinariọs* 500, ọreva ye ọ riosa i dinariọs 50. 42 Fọkime aye e vwo oborẹ aye ina ha kwosa na-a, ọhworhare na nọ kpariroro vrẹn osa aye awanva na. Omarana, ọgo usuẹn aye yọ nọ mai vwo ẹgwọlọ kpahen ọhworhare na?” 43 Saimọn nọ kpahenrhọ ye: “Mie nie taghene ọrẹ osa ye ọ mai bun na.” Nọ ta riẹn: “Ẹkpahenrhọ ọ gbare.” 44 Omarana, Jesu nọ dẹrughwaroghwu ọmase na, nọ ta rẹn i Saimọn: “Wa mẹrẹn ọmase ọnana? Mi ruẹ uvuẹn oghwa ọnọ, ọrẹn wa yẹ mẹ ame mi na ha ghwe aghwẹ mẹ-ẹ. Ọrẹn ọmase ọnana, ọ ha amioviẹ ye kpọtọ aghwẹ mẹ, ji ha ẹtuiẹn hionron aye. 45 Wa fiọnfien mẹ-ẹ, ọrẹn avwọke mia ruẹ uvuẹn oghwa na, ọmase ọnana ọ dobọ aghwẹ mẹ ẹfiọnfiọn ji-i. 46 We rhie emri oliv rhẹ urhomu mẹ-ẹ, ọrẹn ọmase ọnana o rhie ichani ro vwo omamọ ọrhen rhẹ aghwẹ mẹ. 47 Fọkiẹ ọnana, mia ta wẹn taghene dedevwo edandan ọmase na i bunrun, a harhomie ne, fọkime o dje ẹgwọlọ okokodo phia. Ọrẹn, ohworho ra harhomu ibiẹ edandan yen, ibiẹ ẹgwọlọ yo djephia.” 48 Nọ ta rẹn ọmase na: “A harhomu edandan enọ ne.” 49 Ihworho ri lelirie siyẹ ekete imẹdjẹ na, na nọ omoma aye taghene: “Ọrọmo yẹ ọhworhare ọnana rọ tobọ harhomu edandan?” 50 Ọrẹn, Jesu nọ ta rẹn ọmase na: “Esegburhomẹmro ọnọ o simiruon ne, gba nyarhẹn ọrẹ ufuoma.”