Iyẹnrẹn Esiri Luk

9 Ọke oru, Jesu no se awan Ikpereva na koko ji yẹ aye omẹgbanhon rẹ aye ine le ikpodje nẹ oma ihworho, jeghwai simi emiamo sansan. 2 No djerẹ aye ye ghwoghwo kpahen Uvie Osolobrugwẹ ji simi ihworho. 3 Nọ ta rẹn aye: “Are i vwa kpare emru owuorowu lele oma uvuẹn onya na-a, are i vwa kpare ukorọkpọ yanghene ẹkpa emaren yanghene ibrẹdi yanghene igho-o.* Are i vwa ji kpare ewun eva-a. 4 Ọrẹn, koghwa koghwa are i ruoro, are i daji avwaye bọmọke are ine ki nẹ avwaye. 5 Habaye, ekete ephian rẹ ihworho i vwe kwe rhiabọ dede are, are i gbe tue eyẹn nẹ aghwẹ are, no rhiẹ oseri hasuẹ aye ọke are e nẹ amwa ọrana.” 6 Omarana, aye ni ruẹ uvuẹn ekogho erana. Aye ne nẹ ọko owu riẹ ọrọrọ ji ghwoghwo iyẹnrẹn esiri na, jeghwai simi ihworho uvuẹn ekete ephian.

7 Vwana, Hẹrọd* ro suẹn okogho ọrana, no rhon kpahen kemru kemru rọ phia, ẹhẹn yen nọ taghare omamọ fọkime ihworho ezẹko a ta taghene a rhọmọ i Jọn nuhwu ne. 8 Ọrẹn awọrọ a ta taghene Ẹlaijah yọ homaphia, awọrọ a ji ta taghene owuọwan usuẹn emẹraro ọke ahwanren yọ rhọmọ nuhwu. 9 Hẹrọd nọ tare: “Mẹmẹ yi bru urhomu i Jọn nie. Nẹ ọrọmo yẹ ihworho enana a ta kpahan na?” Omarana, nọ damoma rọ nọ mẹrẹn ọravwọ.

10 Ọke inyikọ na a ghwẹrioma rhe, aye ni nẹ iyẹnrẹn rẹn i Jesu kpahen ọsoso oborẹ aye i ruru. Omarana, nọ harẹ aye lele oma, aye ni bẹbẹ riẹ amwa owu re se i Bẹtseda. 11 Ọrẹn, ọke otu na e rhon kpahen ọnana, aye ni ha kpahen i Jesu. Nọ dabu rhiabọ dede aye ji ta rẹn aye kpahen Uvie Osolobrugwẹ, no ji simi ihworho re kpomẹ. 12 Vwana, owuọwọn o te ne. Awan Ikpereva na ni bru i Jesu rhe ji ta riẹn: “Tiobọnu otu na neneyo aye i riẹ emwa ri kẹrẹ aran ọrhẹ ọko sansan ya gwọlọ ekete aye ine jedọn rhọ ọrhẹ oborẹ aye ina riọ, fọkime ọwan i ha ekete kologho.” 13 Ọrẹn, nọ ta rẹn aye: “Are i yẹ aye oborẹ aye ina riọ.” Aye ni ta riẹn: “Ame e vwo emru owuorowu-u, jokpanẹ ibrẹdi isionrin ọrhẹ irhenrin eva. Gbinẹ ame ọvo i nyarhẹn ya dẹ emaren rẹn ọsoso ihworho enana?” 14 Itiọrurhomẹmro, emrẹ ehworhare awan 5,000 yi ha avwaye. Ọrẹn, Jesu nọ ta rẹn idibo yi: “Are i ta rẹn aye nẹ aye i siyẹ ẹkuẹko awan 50.” 15 Aye ni ruẹ oborẹ ọ tare na. Aye ni ta rẹn ihworho na nẹ aye i siyẹ. 16 Ọke rọ ha ibrẹdi isionrin ọrhẹ irhenrin eva na, nọ kparughwaro ni odjuwu ji nẹrhomo. Ọke oru, no bru ibrẹdi na ji ha aye rẹn idibo na nẹ aye i ghaliẹ rẹn otu na. 17 Omarana, aye ephian ni riẹ ephan vuọn. Ọke aye e koko oborẹ aye i re hẹrhẹ, ekalokpọ 12 yi vuọnren.

18 Ọke oru, idibo na ni bru i Jesu rhe ọke ọye ọvo ọ nẹrhomo. Jesu nọ nọren aye: “Ọrọmo yẹ ihworho a ta taghene mi havwọ?” 19 Aye ni ta riẹn: “Jọn ro Brawanrhame na, ọrẹn awọrọ a ta taghene Ẹlaijah, ihworho ezẹko a ji ta taghene wẹwẹ owuọwan usuẹn emẹraro ọke ahwanren rọ rhọmọ nuhwu.” 20 Nọ nọren aye: “Nẹ are vwo? Ọrọmo yẹ omẹmẹ?” Pita nọ kpahenrhọ ye: “Wẹwẹ yi Kristi ọrẹ Osolobrugwẹ.” 21 Omarana, nọ ha orhetio ọgbogbanhon rẹn aye taghene aye i vwa ta rẹn ohworho owuorowu kpahen ọnana-a. 22 Ọrẹn nọ tare: “Ọmọ onyakpọ na ọnọ vi rioja ekwakwa buebun. Ekpako na, ilori irherẹn ọrhẹ eyẹbe na ina tiẹn ji kpe yi hwu. Ọrẹn uvuẹn ẹdẹ ọresa ye, na na rhọmiẹ nuhwu.”

23 Jesu nọ ta rẹn aye ephian: “Orhianẹ o vwo ohworho rọ gwọlọ leli mẹ, jenọ tiẹn omayen, nọ kpare orhan oja* ye kẹdẹkẹdẹ, nẹ ọravwọ orho leli mẹ. 24 Fọkime kohworho kohworho rọ gwọlọ simi arhọ ye, ọnọ va ye obọ. Ọrẹn, kohworho kohworho rẹ arhọ ye ọ variẹ obọ fọkiẹ omẹmẹ, ọnọ rharhumu vwo yi. 25 Itiọrurhomẹmro, erere ọgo yo no te ohworho obọ orhianẹ o vwo ọsoso akpọ na, ọrẹn arhọ ye nọ variẹ obọ yanghene nọ suẹ ẹkuọn rẹn omayen? 26 Fọkime kohworho kohworho rọ zofa fọkiẹ omẹmẹ ọrhẹ ẹmro mẹ, Ọmọ onyakpọ na ọnọ ji zofa fọkiẹ ọravwọ ọke rọ nọ rhiọ uvuẹn odidi ọnẹyen ọrhẹ odidi Ọsẹ ye kugbe odidi emakashe efuanfon na. 27 Itiọrurhomẹmro mia ta rẹn are, o vwo ihworho ezẹko usuẹn eri mevi arana ri ne je hwuo kakaka, jokpanẹ aye i mẹrẹn Uvie Osolobrugwẹ vwẹre.”

28 Itiọrurhomẹmro, emrẹ ẹdọke ẹrẹnren a vrẹn nẹ ọke rọ tẹmro enana, nọ ha i Pita, Jọn ọrhẹ i Jems lele oma riẹ ugbenu owu ya nẹrhomo. 29 Ọke rọ nẹrhomo, ughwaruiẹ no wenerin, ewuien nọ fuan puepue. 30 Nughe! ehworhare awanva ne lelie tẹmro, aye yẹ Mosis ọrhẹ Ẹlaijah. 31 Ehworhare enana ne lo ọke aye a homaphia, aye ne leli Jesu ta kpahen oborẹ ono ru nẹ akpọ na, ro no rugba phẹrẹkpẹ uvuẹn i Jerusalẹm. 32 Vwana, omerhẹn ọ vuọn ikẹro i Pita ọrhẹ ikẹro idibo ereva na. Ọrẹn ọke omerhẹn o nẹ ikẹro aye, aye ni mẹrẹn odidi Jesu ọrhẹ odidi ehworhare awanva ri mevi kẹriẹ na. 33 Ọke ehworhare awanva na a nyaji Jesu vwo, Pita nọ ta riẹn: “Oyono, ọ merhoma taghene ame i ha aran. Omarana, jenẹ ame i ha ibọkpọ esa vi, owu ha wẹn, owu rẹn i Mosis, owu rẹn Ẹlaijah.” Ọrẹn, ọ tobọ rhe oborẹ ọ ta-a. 34 Ọke i Pita ọ tẹmro enana, avwre owu nọ homaphia ji rhurhu aye. Ọke aye a ruẹ uvuẹn avwre na, ofẹn no mwurun aye omamọ. 35 Uphele owu nọ tẹmro nẹ uvuẹn avwre na rhe taghene: “Ọnana Ọmọ mẹ mi djẹha na. Are i kerhọ ye.” 36 Ọke uphele na ọ tẹmro, aye ni mẹrenriẹn taghene i Jesu ọvo yọ havwiẹ. Ọrẹn aye ni fọdu, aye a ji ta rẹn ohworho owuorowu uvuẹn ẹdẹ erana kpahen ekwakwa aye i mẹrẹnre-en.

37 Ọke aye a ruotọre nẹ ugbenu na uvuẹn ẹdẹ ọreva ye, otu buebun ni ghwiẹ bru i Jesu rhe. 38 Nughe! ọhworhare owu no kperi phia uvuẹn otu na taghene: “Oyono, biko mọ ha userhumu rẹn ọmọ mẹ,* fọkime ọye ọvo mi vwiẹre. 39 Kọke kọke okpodje ọrhọ ruẹ omayen, nọ viẹ phia ogege, nọ haye ghwiẹ otọre ji lẹrhiẹ phariẹ gbangbanhon,* ugbunie no gbiphughu. Ọrhọ kuiẹn hin, nọ ki vabu nẹ omayen. 40 Mi rẹ idibo enọ nẹ aye i le okpodje na nẹ omayen, ọrẹn aye a sabu le yi-i.” 41 Jesu nọ tare: “O uvwiẹ ọkon ro vwo vwo esegburhomẹmro, marhẹ ono jiri te mi ne lele are rhirhiẹ ye, ji vwo edirin kpahen are? Kpare ọmọ na vwe mẹ.” 42 Ọke ọmọ na o bruie sa, okpodje na nọ hariẹ ghwiẹ otọre ji ruie nọ phariẹ gbangbanhon. Ọrẹn, Jesu nọ vanghwu okpodje na ji simi ọmọ na, nọ hariẹ rẹn ọsẹ ye. 43 Omẹgbanhon rode Osolobrugwẹ no gbe ihworho na ephian unu.

Ọke ọsoso ekwakwa ri Jesu o ruẹ o gbe ihworho na ephian unu, nọ ta rẹn idibo yi: 44 “Are i dabu kerhọ ji karorhọ ẹmro enana, fọkime ana rhẹ Ọmọ onyakpọ na rẹn ituakpọ.” 45 Ọrẹn, aye e vwẹruọ oborẹ ọ ta-a. Itiọrurhomẹmro, e tirie nu rẹn aye, neneyo aye i je rhe vwẹruọ ye. Ofẹn no ji mwu aye rẹ aye ina nọ yen enọ kpahen ẹmro na.

46 Ọke oru, aye na frẹfro uvwre omoma aye kpahen ohworho rọ maido usuẹn aye. 47 Ọke i Jesu o rhe iroro rọ ha uvuẹn ọmudu aye, no se ibiẹ ọmọvwerhe owu kẹroma. 48 Nọ ta rẹn aye: “Kohworho kohworho ro rhiabọ dede ọmọvwerhe ọnana fọkiẹ odẹ mẹ, o ji rhiabọ dedi mẹ. Kohworho kohworho ro rhiabọ dedi mẹ, o ji rhiabọ dedi Ohworho ro djeri mẹ rhe. Fọkime ohworho rọ ha omayen ruẹ ọrọ mai kamu usuẹn are ephian, yẹ ọrọ maido.”

49 Jọn nọ ta riẹn: “Oyono, ame i mẹrẹn ohworho owu rọ ha odọ le ikpodje nẹ oma ihworho, ame ni damoma rẹ ame ina da ye obọ ji, fọkime o vwo lele ọwa-an.” 50 Ọrẹn, Jesu nọ ta riẹn: “Are i vwa da ye obọ ji-i, fọkime kohworho kohworho rọ vwọ kparehaso are, ọ ha obọrẹ are.”

51 Ọke ẹdẹ ra na ha i Jesu riẹ odjuwu o tiẹkẹrẹ ne,* no brorhiẹn ro no riẹ i Jerusalẹm. 52 Omarana, no dje idibo yi ezẹko kobaro hariẹn. Aye ni nyarhẹn ji ruẹ ọko owu uvuẹn i Sameria ye mwuegbe ekwakwa rhotọre riẹn. 53 Ọrẹn, ihworho na e kwe rhiabọ dedie-e, fọkime o brorhiẹn ro no riẹ i Jerusalẹm.* 54 Ọke i Jems ọrhẹ i Jọn ri rhiẹ idibo yi a mẹrẹn ọnana, aye ni tare: “Ọrovwori, wu gwọlọre nẹ ame i se erhanren nẹ odjuwu rhe nọ ghwọghọ aye?” 55 Ọrẹn, nọ dẹrughwaroghwu aye ji ghwọghwu aye. 56 Omarana, aye ni riẹ ọko ọrọrọ.

57 Vwana, ọke aye a nyarhẹn uvuẹn izede, ohworho owu nọ ta rẹn i Jesu: “Mi ne leluo riẹ ekete wu nyaren ephian.” 58 Ọrẹn, Jesu nọ ta riẹn: “Irhianko i vwo unu aye e rhirhiẹ, efen ra dan uvuẹn ivwrevwrede na i vwo eghwa, ọrẹn Ọmọ onyakpọ na o vwo ekete rọ nọ ha urhomu kpahe-en.” 59 Ọke oru, Jesu nọ ta rẹn ohworho ọrọrọ: “Rhiẹ odibo mẹ.”* Ọhworhare na nọ tare: “Ọrovwori, kwenu mẹ mi nyarhẹn ye siẹn ọsẹ mẹ vwẹre.” 60 Jesu nọ ta riẹn: “Jenẹ irinmi, i siẹn irinmi aye, ọrẹn nyarhẹn ye ghwoghwo Uvie Osolobrugwẹ lele ekete ephian.” 61 Ohworho ọrọrọ nọ ta riẹn: “Ọrovwori, mi ne leluo. Ọrẹn kwenu mẹ vwẹre mi ya mroma ihworho ekrun mẹ.” 62 Jesu nọ ta riẹn: “Kohworho kohworho rọ mọrẹn oborẹ e voro otọre* hin, ro ji nẹ ekwakwa ri ha oberhumu, o mwuovwan Uvie Osolobrugwẹ-ẹ.”