Bɛkpa Mediema Nwiɔ Bɛboka Neazo Eku Ne Anu Amra Anwo

WƆ OCTOBER 5, 2024, bɛbɔle nolo titili bie wɔ ɛvolɛ ɛvolɛ ayia ne abo: Bɛkpale Adiema Jody Jedele nee Adiema Jacob Rumph bɛbokale Gyihova Alasevolɛ Neazo Eku ne anwo. Mediema nwiɔ ɛhye mɔ ɛva nɔhalɛlilɛ ɛzonle Gyihova wɔ ɛvolɛ dɔɔnwo anu.

Bɛwole Adiema Jedele wɔ Missouri, U.S.A. yɛɛ bɛtetele ye wɔ nɔhalɛ ne anu. Ɛnee ye abusua ne de azɛlɛsinli mɔɔ bɛnda bɛnyɛ nuhua gyima la anu. Ɔti ɔyiale mediema dɔɔnwo mɔɔ bɛvi ɛleka ngakyile mɔɔ bɛhɔle ɛkɛ ne kɛ bɛkaboa bɛamaa bɛabɔ edwɛkpa ne nolo la. Ɛlɔlɛ nee koyɛlɛ mɔɔ wɔ bɛ avinli la hanle ye ahonle kpalɛ. Bɛzɔnenle ye wɔ October 15, 1983, wɔ mekɛ mɔɔ ɔle kakula kpavolɛ la. Ɛnee ɔ nye die daselɛlilɛ gyima ne anwo kpalɛ, na mɔɔ ɔwiele sukunwiɔ la, ɔbɔle dahuu adekpakyelɛ gyima ne abo wɔ September 1989.

Mɔɔ Adiema Jedele le kakula la, ɛnee ye awovolɛ fa ɔdaye nee ɔ diema raalɛ ne kɔ Bɛtɛle. Ɛhye maanle ngakula ne mɔ vale yɛle bɛ bodane kɛ bɛbahɔyɛ gyima wɔ Bɛtɛle, na bɛyɛle ye zɔ noko. Adiema Jedele hɔle Wallkill Bɛtɛle wɔ September 1990. Ɔlimoale ɔyɛle gyima wɔ Cleaning Department yɛɛ nzinlii Medical Services.

Mekɛ zɔhane, ɛnee Spanish asafo ne mɔ mɔɔ wɔ ɛkɛ ne la anwo ɛlɛso, na ɛnee bɛhyia mediema mrenyia dɔɔnwo. Ɔti Adiema Jedele hɔle ko anu na ɔbɔle ɔ bo kɛ ɔsukoa Spanish aneɛ ne. Yeangyɛ, ɔnwunle adiema raalɛ Damaris mɔɔ ɛnee ɔlɛyɛ adekpakyelɛ gyima ne bie wɔ maangyebakyi ko ne ala anu la. Nzinlii bɛgyale na bɛ mu nwiɔ bɛyɛle gyima wɔ Bɛtɛle.

Wɔ 2005, bɛvile Bɛtɛle kɛ bɛkanlea bɛ awovolɛ. Bɛyɛle dahuu adekpakyelɛ gyima ne bie wɔ mekɛ mɔɔ bɛlɛnea bɛ awovolɛ la. Adiema Jedele yɛle kilehilevolɛ wɔ Adekpakyelɛ Ɛzonlenlɛ Sukulu ne anu, yɛɛ ɔ nee ɛkɛ ne Asopiti Ngitanwolilɛ Kɔmatii ne yɛɛ Maanzinli Suazilɛ Kɔmatii (Regional Building Committee) ne yɛle gyima.

Wɔ 2013, bɛvɛlɛle Adiema Jedele nee ɔ ye wɔ Bɛtɛle kɛ bɛraboa Warwick suazilɛ gyima ne. Ɔvi zɔhane mekɛ ne, eza bɛyɛ gyima wɔ Patterson nee Wallkill. Adiema Jedele nee Local Design/Construction Department ne yɛɛ Hospital Information Services ne yɛle gyima. Wɔ March 2023, bɛkpale ye kɛ Ɛzonlenlɛ Gyima Kɔmatii ne boavolɛ. Mɔɔ ɔka gyimalilɛ ngakyile mɔɔ ɔyɛle la anwo edwɛkɛ la, ɔhanle kɛ: “Saa bɛmaa wɔ gyimalilɛ fofolɛ biala a, ɔyɛ a ɔmaa wɔ ahonle tu. Noko yemɔ maa ɛkakye kɛ ɛbava ɛ nwo wɔado Gyihova anwo zo ɔluakɛ ɔdaye a ɔmaa yɛkola yɛyɛ debie biala mɔɔ ɔkulo kɛ yɛyɛ la a.”

Bɛwole Adiema Rumph wɔ California, U.S.A. Mekɛ mɔɔ ɔle kakula la, ɛnee ye mame ɛgyakyi debiezukoalɛ nee daselɛlilɛ ɛhɔlɛ noko ɔbɔle mɔdenle ɔhilehilele ye Baebolo nu nɔhalɛ ne. Eza ɛvolɛ biala ɔkɔkpɔla ye nana mɔɔ le Gyihova Dasevolɛ la. Ye nana boale ye maanle ɔ nye liele nɔhalɛ ne anwo bieko, na mɔɔ ɔlile ɛvolɛ 13 la, ɔhanle kɛ bɛ nee ye ɛzukoa Baebolo ne. Bɛzɔnenle ye wɔ September 27, 1992, wɔ mekɛ mɔɔ ɛnee ɔle kakula kpavolɛ la. Anyelielɛ edwɛkɛ ne a le kɛ, ye mame ziale rale nɔhalɛ ne anu na ye awovolɛ nee ɔ mediema ne mɔ amuala bɔle ɔ bo kɛ bɛkɔ debiezukoalɛ nee daselɛlilɛ na bɛzɔnenle bɛ.

Mɔɔ Adiema Rumph le kakula la, ɔnwunle kɛzi adekpakyelɛma anye die la. Ɔti mɔɔ ɔwiele sukunwiɔ la, ɔbɔle ɔ bo kɛ ɔyɛ adekpakyelɛ gyima ne bie wɔ September 1995. Wɔ 2000, ɔdule ɔhɔdɛnlanle ɛleka mɔɔ bɛhyia moalɛ kpole la wɔ Ecuador. Ɛkɛ ne a ɔyiale adiema raalɛ Inga mɔɔ ɛnee ɔle adekpakyelɛnli mɔɔ vi Canada la, na nzinlii bɛgyale. Bɛgyale la, bɛhɔdɛnlanle Ecuador sua bie mɔɔ nolobɔlɛma ekpunli ekyi bie a wɔ zo la azo. Ɛnɛ, bɛ nwo ɛzo na bɛrayɛ asafo kpole bie.

Mekɛ ekyii guale nu la, bɛkpale Adiema Rumph nee ɔ ye kɛ adekpakyelɛ titilima na nzinlii bɛhɔyɛle maangyebakyi zo neavolɛ gyima ne bie. Wɔ 2011, bɛhɔle Geleade sukulu ne mɔɔ tɔ zo 132 la bie. Mɔɔ bɛwiele sukulu ne la, bɛhɔzonlenle wɔ ewiade ɛleka ngakyile na bɛyɛle gyimalilɛ ngakyile, bie a le Bɛtɛle gyima, edwɛkpatɛlɛvolɛ gyima nee maangyebakyi zo neavolɛ gyima ne. Eza Adiema Rumph nyianle nwolɛ adenle yɛle Belemgbunlililɛ Edwɛkpakavolɛma Sukulu ne anu kilehilevolɛ.

Ɔlua COVID-19 ewulenzane ne ati, Adiema Rumph nee ɔ ye ziale hɔle United States. Bɛvɛlɛle bɛ wɔ Wallkill Bɛtɛle, na wɔ ɛkɛ ne, bɛtetele Adiema Rumph wɔ Ɛzonlenlɛ Gyima Gyimalilɛleka ne. Amozii, bɛmaanle bɛziale bɛhɔle Ecuador ɔfese ɛkɛ, na Adiema Rumph nee Ɔfese Kɔmatii ne yɛle gyima. Wɔ 2023, bɛ nee bɛ ziale hɔle Warwick. Wɔ January 2024, bɛkpale Adiema Rumph kɛ Ɛzonlenlɛ Gyima Kɔmatii ne boavolɛ. Ɔka ɛleka ngakyile mɔɔ yehɔzonle la anwo edwɛkɛ la, ɔhanle kɛ, “Tɛ ɛleka mɔɔ ɛbayɛ wɔ ɛzonlenlɛ gyima ne la a hyia a, emomu menli mɔɔ ɛ nee bɛ ɛlɛsonle la a hyia a.”

Yɛ nye sɔ gyima ɛsesebɛ mɔɔ mediema mrenyia ɛhye mɔ yɛ la, na yɛbu “menli mɔɔ le zɛhae la kɛ bɛsonle bolɛ kpalɛ.”—Fel. 2:29.