Awie Fofolɛ Mɔɔ Bɛkpa Ye Bɛboka Neazo Eku Ne Anwo

WƆ Maanle nwonlomɔ, January 24, 2018, bɛvale bɛdole United States nee Canada Bɛtɛle mbusua ne mɔ anyunlu kɛ: Bɛkpa Adiema Kenneth Cook, Jr., bɛboka Gyihova Alasevolɛ Neazo Eku ne anwo.

Bɛwole Adiema Cook wɔ Pennsylvania, U.S.A., na ɛkɛ ne a bɛtetele ye a. Ɔzukoale nɔhalɛ ne ɔvile ɔ gɔnwo sukulu kakula bie ɛkɛ wɔ mekɛ mɔɔ ɔka ekyi bɛwie sukunwiɔ la, na bɛzɔnenle ye wɔ June 7, 1980. Ɔbɔle dahuu ɛzonlenlɛ gyima ne abo kɛ dahuu adekpakyelɛnli wɔ September 1, 1982. Ɔyɛle adekpakyelɛ gyima ne ɛvolɛ nwiɔ la anzi, bɛdole ɛsalɛ bɛvɛlɛle ye wɔ Bɛtɛle, na ɔbɔle Bɛtɛle ɛzonlenlɛ bo wɔ Wallkill, New York, wɔ October 12, 1984.

Wɔ ɛvolɛ 25 mɔɔ doale zo la anu, Adiema Cook yɛle gyima ngakyile wɔ ɛleka mɔɔ bɛpenlente mbuluku yɛɛ Bethel Office. Ɔgyale ɔ ye Jamie wɔ 1996, na ɔhɔbokale ɔ nwo wɔ Wallkill Bɛtɛle. Wɔ December 2009, Bɛmaanle Adiema Cook nee ɔ ye hɔyɛle gyima wɔ Ɛzinzalɛ Arane Ndetelɛleka mɔɔ wɔ Patterson, New York la, na bɛmaanle Adiema Cook yɛle gyima wɔ Ngɛlata Ɛhɛlɛlɛ Gyimalilɛleka ne. Wɔ April 2016 mɔɔ bɛmaanle ɔziale ɔhɔle Wallkill Bɛtɛle mekɛ ekyi la anzi, bɛ nee Adiema Cook nee ɔ ye hɔle Brooklyn, New York. Ye siane nnu anzi, bɛ nee bɛ hɔle ewiade amuala gyima ne ati mɔɔ wɔ Warwick, New York la. Wɔ January 2017, bɛkpale Adiema Cook bɛbokale Neazo Eku ne Mbulukuhɛlɛlɛ kɔmatii ne boavolɛma ne anwo.