Bɛkpa Mediema Nwiɔ Bɛboka Neazo Eku Ne Anu Amra Anwo
WƆ MAANLE, January 18, 2023, nolobɔlɛ titili bie vindele jw.org, na ɔhanle kɛ bɛkpa Mediema Gage Fleegle nee Jeffrey Winder bɛboka Gyihova Alasevolɛ Neazo Eku ne anwo. Bɛ mu nwiɔ bɛva mekɛ tendenle bɛzonle Gyihova wɔ nɔhalɛlilɛ nu.
Gage Fleegle nee ɔ ye, Nadia
Adiema Fleegle awovolɛ mɔɔ bɛsulo Nyamenle la a tetele ye wɔ Pennsylvania adɔleɛ, U.S.A. a. Mɔɔ ɔle kakula kpavolɛ la, ye abusua ne dule hɔle sua bie mɔɔ bɛhyia moalɛ kpole la azo. Bɛhɔdwule ɛkɛ ne la, yeangyɛ biala bɛzɔnenle ye wɔ November 20, 1988.
Ɛnee Adiema Fleegle awovolɛ maa ye anwosesebɛ dahuu kɛ ɔva ɔ nwo ɔwula dahuu ɛzonlenlɛ gyima ne anu. Ɛnee bɛta bɛmaa maangyebakyi zo neavolɛma nee Bɛtɛlema basokoɛ bɛ sua nu, na Adiema Fleegle nwunle kɛzi mediema mrenyia nee mraalɛ ɛhye mɔ anye die la. Mɔɔ bɛzɔnenle ye la, yeangyɛ, ɔbɔle dahuu adekpakyelɛ gyima ne abo wɔ September 1, 1989. Ɛvolɛ nwiɔ anzi, ɔdwule bodane bie mɔɔ ɔvale ɔziele ɔ nye zo wɔ mekɛ mɔɔ ɛnee yeli ɛvolɛ 12 la anwo—kɛ ɔbahɔyɛ gyima wɔ Bɛtɛle. Ɔbɔle ye gyimayɛlɛ bo wɔ Brooklyn Bɛtɛle wɔ October 1991.
Mɔɔ Adiema Fleegle hɔdwule Bɛtɛle la, ɔyɛle gyima wɔ ɛleka mɔɔ bɛyɛ mbuluku la too ɛvolɛ mɔtwɛ, nzinlii bɛmaanle ɔhɔyɛle gyima wɔ Ɛzonlenlɛ Nwo Gyimalilɛleka ne. Wɔ mekɛ ɛhye anu, ɔdɛnlanle asafo mɔɔ bɛka Russian la anu wɔ ɛvolɛ ekyii anu. Wɔ 2006, ɔgyale Nadia, na ɔrabokale ɔ nwo wɔ Bɛtɛle. Bɛ mu nwiɔ bɛyɛle edwɛkɛhanlɛ gyima ne wɔ azɛlɛsinli mɔɔ bɛka Portuguese la anu, yɛɛ bɛva ɛvolɛ mɔɔ bo bulu la bɛyɛ gyima wɔ azɛlɛsinli mɔɔ bɛka Spanish la anu. Mɔɔ Adiema Fleegle vale ɛvolɛ dɔɔnwo yɛle gyima wɔ Ɛzonlenlɛ Nwo Gyimalilɛleka ne la, akee bɛmaanle ɔhɔyɛle gyima wɔ Ngilehilelɛ Kɔmatii Ɔfese ne, yɛɛ nzinlii ɔhɔle Ɛzonlenlɛ Kɔmatii Ɔfese ne. Wɔ March 2022, bɛkpale ye kɛ Neazo Eku ne Ɛzonlenlɛ Kɔmatii Ne Boavolɛ.
Jeffrey Winder nee ɔ ye, Angela
Bɛtetele Adiema Winder wɔ Murrieta, California, U.S.A. Ye awovolɛ a tetele ye wɔ nɔhalɛ ne anu a, na bɛzɔnenle ye wɔ March 29, 1986. Wɔ April, ɔzile kpɔkɛ kɛ ɔbayɛ adekpakyelɛ boavolɛ. Ɔ nye liele nwolɛ kpalɛ ɔti ɛnee ɔngulo kɛ ɔgyakyi. Ɔdoale zo ɔyɛle adekpakyelɛ boavolɛ ne, na wɔ October 1, 1986, ɔbɔle dahuu adekpakyelɛ gyima ne abo.
Mɔɔ Adiema Winder le kakula kpavolɛ la, ɔhɔkpɔlale ɔ mediema mrenyia nwiɔ mɔɔ ɛnee bɛyɛ gyima wɔ Bɛtɛle wɔ zɔhane mekɛ ne la. Ɛhye maanle ɔnyianle ɛhulolɛ kɛ saa ɔdaye noko ɔyɛ kpanyinli a, ɔbahɔyɛ gyima wɔ Bɛtɛle. Na wɔ May 1990, bɛvɛlɛle ye kɛ ɔrayɛ gyima wɔ Bɛtɛle asa ngane ne mɔɔ wɔ Wallkill la anu.
Mɔɔ Adiema Winder hɔdwule Bɛtɛle la, ɔyɛle gyima wɔ ɛleka ngakyile dɔɔnwo, bie mɔ a le gyimalilɛleka mɔɔ bɛsiezie Bɛtɛle ɛkɛ, gyimalilɛleka mɔɔ bɛyɛ egyinli yɛɛ Bɛtɛle Ɔfese ɛkɛ. Ɔgyale Angela wɔ 1997, na bɛ mu nwiɔ bɛyɛ gyima wɔ Bɛtɛle too badwu ɛnɛ. Wɔ 2014, bɛyele bɛ bɛhɔle Warwick, na Adiema Winder hɔboale maanle bɛzile ewiade amuala gyima ne ati sua ne. Wɔ 2016, bɛhɔle Ɛzinzalɛ Arane Ndetelɛleka ne mɔɔ wɔ Patterson la, na Adiema Winder yɛle gyima wɔ Ɔdio/Vidio Gyimalilɛleka ne. Ɛvolɛ nna anzi, bɛziale bɛhɔle Warwick, na bɛmaanle Adiema Winder yɛle gyima wɔ Gyimayɛvoma Kɔmatii Ɔfese ne. Wɔ March 2022, bɛkpale ye kɛ Neazo Eku ne Gyimayɛvoma Kɔmatii ne boavolɛ.
Yɛyɛ asɔne kɛ Gyihova ɛyila ‘menli ɛhye mɔɔ yeva bɛ yemaa kɛ ahyɛlɛdeɛ’ la wɔ mekɛ mɔɔ bɛlɛyɛ gyima ɛsesebɛ bɛaboa Belemgbunlililɛ ne la.—Ɛfɛ. 4:8.