Duzu A Le Gyihova Alasevolɛ Neazo Eku Ne?

Neazo Eku ne le Kilisienema ekpunli ekyi bie mɔɔ bɛnyi sunsum nu mɔɔ bɛfa adehilelɛ bɛmaa Gyihova Alasevolɛ mɔɔ wɔ ewiade amuala la. Bɛ gyima ne gua ye ngakyile nwiɔ:

• Bɛnea bɛmaa yɛnyia adehilelɛ mɔɔ gyi Baebolo ne azo mɔɔ wɔ yɛ mbuluku nee vidio ne mɔ anu nee mɔɔ kɔ zo wɔ yɛ ayia yɛɛ Gyihova Alasevolɛ sukulu ngakyile bo la.​​—Luku 12:42.

• Bɛnea Gyihova Alasevolɛ ewiade amuala gyima ne azo na bɛfa adehilelɛ bɛmaa wɔ daselɛlilɛ gyima ne anwo yɛɛ bɛnea bɛmaa bɛfa ninyɛne mɔɔ menli fi bɛ ahonle nu fa maa la bɛdi gyima.

Neazo Eku ne di ɛvoya mɔɔ limoa “ɛzoanvolɛma ne nee mgbanyima ne mɔ mɔɔ wɔ Gyɛlusalɛm” mɔɔ zile kpɔkɛ mɔɔ anwo hyia maanle Kilisiene asafo ne amuala la neazo ne anzi. (Gyima ne 15:2) Kɛ mɔɔ ɛnee ɔde wɔ mrenyia nɔhavoma ɛhye mɔ afoa nu la, Neazo Eku ne anu amra ɛnle yɛ ahyehyɛdeɛ ne adekilevoma. Bɛkpondɛ adehilelɛ bɛfi Baebolo ne anu, na bɛdie bɛto nu kɛ Gyihova Nyamenle ɛkpa Gyisɛse Kelaese kɛ asafo ne Ati.​​—1 Kɔlentema 11:3; Ɛfɛsɛsema 5:​23.

Nwane mɔ a le Neazo Eku ne anu amra a?

Neazo Eku ne anu amra a le Kenneth Cook, Jr., Gage Fleegle, Samuel Herd, Geoffrey Jackson, Jody Jedele, ]Stephen Lett, Gerrit Lösch, Jacob Rumph, Mark Sanderson, David Splane, yɛɛ Jeffrey Winder. Bɛsonle wɔ yɛ ewiade amuala gyima ne ati mɔɔ wɔ Warwick, New York, U.S.A. la.

Kɛzi bɛhyehyɛ Neazo Eku ne ɛ?

Neazo Eku ne lɛ kɔmatii nsia mɔɔ nea yɛ gyima ngakyile ne mɔ azo a, yɛɛ bɛ nuhua ko biala wɔ kɔmatii ko anzɛɛ mɔɔ bo zɔ la anu.

• Ɛzonlenlɛ Kɔmatii: Bɛnea yɛ “Belemgbunlililɛ ne anwo edwɛkpa” ne nolobɔlɛ gyima ne azo.​​—Mateyu 24:14.

• Gyimayɛvoma Kɔmatii: Bɛnea bɛyɛ ngyehyɛleɛ ngakyile bɛmaa Bɛtɛle mbusua ne anu amra.

• Mbulukuhɛlɛlɛ Kɔmatii: Bɛyɛ sunsum nu ngilehilelɛ mɔɔ yɛnyia ye wɔ mbuluku nu nee wɛbsaete ne azo la anwo gyima. Eza bɛnea edwɛkɛbohilelɛ gyima ne azo.

• Mbulukuyɛlɛ Kɔmatii: Bɛnea bɛmaa bɛyɛ mbuluku na bɛfa bɛnwa, eza bɛnea bɛmaa bɛsisi nyianu azua, ɔfese mɔɔ bɛkile edwɛkɛ bo wɔ ɛkɛ la nee Bɛtɛle azua.

• Ngilehilelɛ Kɔmatii: Bɛyɛ sunsum nu aleɛ ngakyile mɔɔ yɛnyia ye wɔ yɛ ayia nee sukulu ngakyile bo la yɛɛ bɛyɛ ɔdio nee vidio gyimalilɛ mɔɔ bɛfa bɛkilehile yɛ la anwo ngyehyɛleɛ.

• Ngitanwodivoma Kɔmatii: Bɛnea mɛla adenle zo edwɛkɛ ngakyile, esiane, dwazotia mɔɔ Gyihova Alasevolɛ yia ɔlua bɛ diedi ne ati yɛɛ bɛdi edwɛkɛ gyɛne mɔɔ hyia ndɛndɛ mɔɔ gyegye Gyihova Alasevolɛ la anwo gyima.

Ɛye gyima mɔɔ bɛyɛ ye wɔ kɔmatii ɛhye mɔ anu la ɛsie ahane a, Neazo Eku ne yia nu dapɛne biala bɛsuzu ahyehyɛdeɛ ne ngyianlɛ nwo. Wɔ ayia ɛhye mɔ abo, Neazo Eku ne anu amra suzu mɔɔ Ngɛlɛlera ne ka la anwo, na bɛmaa Nyamenle sunsum nwuanzanwuanza ne boa bɛ amaa bɛayɛ adwenle ko bɛabɔ kpɔkɛ.​​—Gyima ne 15:25.

Nwane mɔ a le Neazo Eku ne boavolɛma a?

Menli ɛhye mɔ le Kilisienema mɔɔ di nɔhalɛ mɔɔ bɛyɛ gyima bɛboa Neazo Eku ne kɔmatii ngakyile ne mɔ a. (1 Kɔlentema 4:2) Bɛlɛ gyima mɔɔ bɛyɛ la anwo adwenle nee anwubielɛ yɛɛ bɛkɔ kɔmatii mɔɔ bɛwɔ nu la ayia mɔɔ ɔyɛ ye dapɛne biala la bie. Ɔwɔ nuhua kɛ bɛmboka nwo a bɛsi kpɔkɛ a, noko boavolɛma ne fa folɛdulɛ nee gyima ne anwo edwɛkɛ biala mɔɔ baboa bɛ la maa na bɛnea kɛ bɛbava kpɔkɛ mɔɔ kɔmatii ne kɛzi la bɛayɛ gyima. Eza bɛta bɛnea anyuhɔlɛ mɔɔ kpɔkɛzilɛ ɛhye mɔ ɛlɛfa ara la. Ɔyɛ a, Neazo Eku ne anu amra soa bɛ maa bɛkɔkpɔla mediema mɔɔ wɔ ewiade ɛleka ngakyile la anzɛɛ bɛmaa ɛdendɛlɛ ngakyile wɔ ɛvolɛ ɛvolɛ ayia anzɛɛ bɛdabɛ mɔɔ bɛwie Geleade sukulu la ayia ne abo.