Kakye Kɛ Ɛbayɛ Asɔne Wɔamaa Awie Mɔ

1. Kɛzi yɛkola yɛnwu ye kɛ yɛ asɔneyɛlɛ ne mɔ hyia Gyihova ɛ?

ASƆNEYƐLƐ le ahyɛlɛdeɛ mɔɔ yɛ nwanwane. Dwenle nwolɛ nea: Gyihova ɛva gyima bie mɔ ɛwula anwumabɔvolɛ ne mɔ asa. (Edw. 91:11) Eza yeva gyimalilɛ titili bie mɔ yewula ɔ Ra ne asa. (Mat. 28:18) Noko nwane a tie yɛ asɔneyɛlɛ a? Gyihova ɛkpa kɛ ɔ ngomekye a ɔbadie yɛ asɔneyɛlɛ a. Gyihova mɔɔ le “asɔneyɛlɛ Tievolɛ” la mumua ne a tie yɛ asɔneyɛlɛ a.—Edw. 65:2.

2. Neazo boni a ɛzoanvolɛ Pɔɔlo yɛle wɔ awie mɔ mɔɔ yɛyɛ asɔne yɛamaa bɛ la anwo a?

² Yɛbahola yɛaha debie biala mɔɔ gyegye yɛ la anwo edwɛkɛ yɛahile Gyihova ɛdeɛ, noko ɔwɔ kɛ yɛyɛ asɔne yɛmaa awie mɔ. Ɛzoanvolɛ Pɔɔlo yɛle ye zɔ. Kɛ neazo la, ɔhɛlɛle ɔhɔmaanle Ɛfɛsɛse asafo ne kɛ: “Dahuu mebɔ bɛ duma wɔ me asɔneyɛlɛ nu.” (Ɛfɛ. 1:16) Pɔɔlo eza bobɔle menli bie mɔ aluma ngoko yɛle asɔne maanle bɛ. Kɛ neazo la, ɔhanle ɔhilele Timote kɛ: ‘Meyɛ Nyamenle mo kɛ me rɛle ɛnvi wɔ wɔ me modolɛ nu alehyenlɛ nee aledwolɛ la.’ (2 Tim. 1:3) Ɛnee Pɔɔlo mumua ne lɛ ye ngyegyelɛ mɔɔ ɔwɔ kɛ ɔyɛ nwolɛ asɔne a. (2 Kɔl. 11:23; 12:​7, 8) Noko ɔnyianle mekɛ ɔyɛle asɔne ɔmaanle awie mɔ.

3. Duzu ati a bie a yɛ rɛle bavi kɛ yɛbayɛ asɔne yɛamaa awie mɔ a?

³ Ɔyɛ a yɛ rɛle bavi kɛ yɛbayɛ asɔne yɛamaa awie mɔ. Duzu ati ɔ? Adiema raalɛ bie mɔɔ bɛfɛlɛ ye Sabrinaa la hanle deɛmɔti ɔkola ɔba ye zɔ la anu ko. Ɔhanle kɛ: “Ɛnɛ yɛnlɛ alagye fee. Yɛbahola yɛava yɛ adwenle amuala yɛazie ngyegyelɛ mɔɔ yɛdayɛ mumua ne yɛlɛyia la azo somaa na yɛayɛ yemɔ ala anwo asɔne.” Asoo ɛdawɔ noko wɔnwu ye zɔ ɔ? Saa wɔnwu ye zɔ a, ɛnee edwɛkɛ ɛhye baboa wɔ. Edwɛkɛ ɛhye (1) bahilehile deɛmɔti ɔhyia kɛ ɛyɛ asɔne ɛmaa awie mɔ la anu na (2) yeamaa wɔanwu kɛzi ɛbahola wɔayɛ ye la.

DUZU ATI A ƆWƆ KƐ YƐYƐ ASƆNE YƐMAA AWIE MƆ A?

4-5. Duzu ati a asɔne mɔɔ yɛyɛ yɛmaa awie mɔ la lɛ “tumi kpole” a? (Gyemise 5:16)

⁴ Asɔne mɔɔ yɛyɛ yɛmaa awie mɔ la lɛ “tumi kpole.” (Kenga Gyemise 5:16.) Saa yɛyɛ asɔne yɛmaa awie mɔ a, asoo ɔkola ɔkakyi mɔɔ anrɛɛ ɔbado bɛ la ɔ? Ɛhɛe. Ɛnee Gyisɛse ze kɛ ɔnrɛhyɛ ɛzoanvolɛ Pita bakpo ye, ɔti ɔhanle kɛ: “Mezɛlɛ memaa wɔ amaa wɔ diedi amkpo aze.” (Luku 22:32) Ɛnee Pɔɔlo noko ze kɛ asɔneyɛlɛ kola kakyi awie tɛnlabelɛ. Mɔɔ bɛ nee ye anli ye boɛ na bɛdole ye efiade wɔ Wulomu la, ɔhɛlɛle ɔhɔmaanle Faelimɔn kɛ: “Me nye la kɛ ɔlua bɛ asɔneyɛlɛ zo bɛbaye me na meara bɛ nwo lɔ.” (Fae. 22) Na kɛ mɔɔ ɔzile la, yeangyɛ bɛyele Pɔɔlo bɛvile efiade na ɔholale ɔyɛle ye edwɛkɛhanlɛ gyima ne bieko.

⁵ Nɔhalɛ nu, ɛhye ɛngile kɛ saa yɛyɛ asɔne a yɛbahola yɛatinlitinli Gyihova yɛamaa yeayɛ mɔɔ yɛkpondɛ la yeamaa yɛ. Emomu, ɔnwu kɛzi deɛ ne mɔɔ ye azonvolɛ ɛlɛyɛ nwolɛ asɔne dɔɔnwo la hyia bɛ la, na ɔyɛ a ɔbakpa kɛ ɔbayɛ mɔɔ bɛlɛbiza la yeamaa bɛ. Saa yɛnwu ye zɔ a, ɔbaboa yɛ yeamaa yɛayɛ tɛnlabelɛ bie anwo asɔne ɛsesebɛ na yɛagyakyi debie biala anu yɛamaa ye.—Edw. 37:5.

6. Yɛyɛ asɔne yɛmaa awie mɔ a, kɛzi ɔka adwenle mɔɔ yɛlɛ wɔ bɛ nwo la ɛ? (1 Pita 3:8)

⁶ Yɛyɛ asɔne yɛmaa awie mɔ a, ɔboa yɛ ɔmaa yɛnyia “ahunluyelɛyelalɛ.” (Kenga 1 Pita 3:8.) Ahunluyelɛyelalɛ kile kɛ ɛmaa wɔ adwenle ahɔ ngyegyelɛ mɔɔ awie ɛlɛyia la azo na wɔanyia ɛhulolɛ kɛ ɛbayɛ debie wɔaboa ye. (Maake 1:​40, 41) Asafo nu kpanyinli bie mɔɔ bɛfɛlɛ ye Michael la hanle kɛ: “Saa meyɛ asɔne memaa awie mɔ a, ɔmaa me adwenle kɔ ngyegyelɛ mɔɔ bɛgyi ɔ nloa la azo kpalɛ na yemɔ maa menyia bɛ nwo ɛlɔlɛ kpole. Ɔmaa mebikye bɛ kpalɛ ɔnva nwo kɛ bie a bɛnrɛnwu ye zɔ la.” Asafo nu kpanyinli bie mɔɔ bɛfɛlɛ ye Richard la hanle nvasoɛ bieko mɔɔ wɔ zolɛ la anwo edwɛkɛ. Ɔse: “Saa yɛyɛ asɔne yɛmaa awie a, ɔmaa yɛnyia ɛhulolɛ kpole kɛ yɛbayɛ debie yɛaboa ye.” Eza ɔhanle kɛ: “Saa yɛyɛ debie yɛboa ahenle mɔɔ yɛyɛle asɔne yɛmaanle ye la a, wɔ adenle bie azo ɛnee yɛlɛboa yɛamaa Gyihova abua asɔne mɔɔ yɛyɛle yɛmaanle ye la.”

7. Saa yɛyɛ asɔne yɛmaa awie mɔ a, kɛzi ɔboa yɛ ɔmaa yɛye yɛ adwenle yɛfi yɛ ngomekye yɛ ngyegyelɛ ne mɔ azo ɛ? (Felepaema 2:​3, 4) (Eza nea nvoninli ne mɔ.)

⁷ Yɛyɛ asɔne yɛmaa awie mɔ a, ɔboa yɛ ɔmaa yɛnyia yɛdayɛ mumua ne yɛ ngyegyelɛ nwo adwenle kpalɛ. (Kenga Felepaema 2:​3, 4.) Kɛmɔ yɛde ewiade ɛhye mɔɔ wɔ Abɔnsam tumi bo la anu la ati, yɛ nuhua ko biala gyi ngyegyelɛ nloa. (1 Dwɔn 5:19; Yek. 12:12) Saa yɛfa yɛyɛ yɛ subane kɛ yɛbayɛ asɔne yɛamaa awie mɔ a, ɔmaa yɛkakye kɛ ‘amaneɛ ko ne ala a yɛ mediema mɔɔ wɔ ewiade amuala la ɛlɛnwu ye a.’ (1 Pita 5:9) Adekpakyelɛnli bie mɔɔ bɛfɛlɛ ye Katherine la hanle kɛ: “Saa meyɛ asɔne memaa awie mɔ a, ɔmaa mekakye kɛ awie mɔ noko gyi ngyegyelɛ nloa. Ɛhye ɛmmaa menva me adwenle menzie ngyegyelɛ mɔɔ medame mumua ne melɛyia la azo somaa.”

BƐHYIA YƐ ASƆNEYƐLƐ

8. Nwane mɔ a yɛbahola yɛayɛ asɔne yɛamaa bɛ a?

⁸ Nwane mɔ a yɛbahola yɛayɛ asɔne yɛamaa bɛ a? Yɛbahola yɛayɛ asɔne yɛamaa menli ekpunli bie mɔ—kɛ neazo la, menli mɔɔ ɛnde kpɔkɛ, ngakula mɔɔ ɛlɛyia agolobɛnwo nee atipɛnema ngyegyelɛ wɔ sukulu anzɛɛ menli mɔɔ ɛrelerayɛlɛ ti bɛlɛnwu amaneɛ la. Yɛ mediema diedima dɔɔnwo ɛlɛyia dwazotia avi bɛ mbusuafoɔ anzɛɛ arane ne ɛkɛ. (Mat. 10:​18, 36; Gyi. 12:5) Ɔwɔ kɛ yɛ mediema dɔɔnwo nriandi fi bɛ azua nu ɔlua konle konle ti. Esiane noko ɛtoto bie mɔ. Bie a yɛtɛyiale mediema ɛhye mɔ ɛlɛ. Noko saa yɛyɛ asɔne yɛmaa bɛ a, ɛnee yɛlɛdi Gyisɛse mɛla mɔɔ se ‘yɛhulo yɛ nwo ngoko’ la azo.—Dwɔn 13:34.

9. Duzu ati a ɔwɔ kɛ yɛyɛ asɔne yɛmaa menli mɔɔ li Gyihova ahyehyɛdeɛ ne anyunlu nee bɛ ye mɔ ɛ?

⁹ Eza yɛbahola yɛayɛ asɔne yɛamaa menli mɔɔ li ahyehyɛdeɛ ne anyunlu la. Menli ɛhye mɔ bie a le Neazo Eku ne nee bɛ boavolɛma, Ɔfese Kɔmatii ne mɔ, bɛtɛle mgbanyima mɔɔ bɛva ɛzonlelilɛ bɛwula bɛ sa, maangyebakyi zo neavolɛma, asafo nu mgbanyima nee asafo nu azonvolɛ. Mediema mrenyia ɛhye mɔ mɔɔ ɛlɛyɛ gyima ɛsesebɛ aboa yɛ la noko lɛ bɛ ngyegyelɛ. (2 Kɔl. 12:15) Kɛ neazo la, maangyebakyi zo neavolɛ bie mɔɔ bɛfɛlɛ Mark la hanle kɛ: “Me ngyegyelɛ kpole a le kɛ, ɛleka mɔɔ me awovolɛ mɔɔ ɛlɛyɛ mrelera la wɔ nee ɛleka mɔɔ mewɔ la wale. Bɛ mu nwiɔ bɛnde kpɔkɛ fee. Me diema raalɛ ne nee ɔ hu ɛlɛnea bɛ ɛdeɛ, noko ɔyɛ me nyane kɛ mengola menyɛ ninyɛne dɔɔnwo memboa bɛ la.” Saa yɛze ngyegyelɛ mɔɔ mediema ɛhye mɔ mɔɔ bɛyɛ gyima ɛsesebɛ la ɛlɛyia la anzɛɛ yɛnze bɔbɔ a, ɔle kpalɛ kɛ yɛbahakye bɛ wɔ yɛ asɔneyɛlɛ nu. (1 Tɛs. 5:​12, 13) Eza yɛbahola yɛayɛ asɔne yɛamaa mediema ɛhye mɔ aye mɔ ɔluakɛ bɛboa bɛ bɛmaa bɛkɔ zo bɛyɛ bɛ gyima ne.

10-11. Saa yɛyɛ asɔne yɛmaa yɛ mediema na yɛambobɔ bɛ aluma fɔɔnwo bɔbɔ a, asoo Gyihova badie? Kilehile nu.

¹⁰ Kɛ mɔɔ yɛlimoa yɛnwu ye la, yɛta yɛyɛ asɔne yɛmaa mediema ekpunli ngakyile. Kɛ neazo la, bie a awie fɔɔnwo bie anwo adwenle ɛnle yɛ ti anu, noko yɛbahola yɛazɛlɛ Gyihova kɛ ɔboa bɛdabɛ mɔɔ bɛgua bɛ efiade la anzɛɛ ɔkyekye bɛdabɛ mɔɔ bɛ alɔvolɛ ɛwu la arɛle. Asafo nu kpanyinli bie mɔɔ bɛfɛlɛ ye Donald la hanle kɛ, “Mediema dɔɔnwo ɛlɛyia ngyegyelɛ ɔti ɔyɛ a yɛyɛ asɔne yɛmaa bɛ.”

¹¹ Asoo Gyihova tie asɔneyɛlɛ ɛhye mɔ? Ɛhɛe! Ɔluakɛ yɛnze ninyɛne fɔɔnwo mɔɔ yɛ mediema diedima kɔsɔɔti hyia nwo la. Ɔti ɔle kpalɛ kɛ yɛbayɛ asɔne yɛamaa yɛ mediema kɛ ekpunli. (Dwɔn 17:20; Ɛfɛ. 6:18) Asɔneyɛlɛ ɛhye mɔ maa ɔda ali kɛ ‘yɛkulo mediema muala.’—1 Pita 2:17.

SAA YƐLƐYƐ ASƆNE YƐAMAA MENLI NGOKO NGOKO A

12. Saa yɛgua yɛ nye aze yɛnea ninyɛne a, kɛzi ɔbaboa yɛ yeamaa yɛayɛ menli fɔɔnwo bie anwo asɔne ɛ?

¹² Gua ɛ nye aze nea ninyɛne. Ɔle kpalɛ kɛ yɛbayɛ asɔne yeamaa yɛ mediema ekpunli ngakyile ɛdeɛ, noko eza ɔle kpalɛ kɛ yɛbabobɔ menli bie mɔ aluma fɔɔnwo na yɛayɛ asɔne yɛamaa bɛ. Asoo awie bie wɔ wɔ asafo ne anu mɔɔ lɛ ewule bie mɔɔ ɔyɛ ye ayile a ɔngɔ ɔ? Asoo kakula bie ɛlɛyia ngyegyelɛ wɔ sukulu ɔti yemaa ɔ rɛle ɛbɔ ɔ? Asoo ɛreladane bie ɛlɛbɔ mɔdenle kpalɛ amaa yeahola yeava “Gyihova folɛdulɛ nee ye ngilehilelɛ” yeatete ɔ ra bie ɔ? (Ɛfɛ. 6:4) Saa yɛgua yɛ nye aze yɛnea ninyɛne a, ɔbamaa yɛade awie mɔ nyane bo na yemɔ bamaa yɛanyia ɛhulolɛ kpole kɛ yɛbayɛ asɔne yɛamaa bɛ.b—Wlo. 12:15.

13. Kɛ ɔkɛyɛ na yɛayɛ asɔne yɛamaa menli mɔɔ yɛtɛyiale bɛ ɛlɛ la ɛ?

¹³ Bobɔ awie mɔ aluma na yɛ asɔne maa bɛ. Yɛbahola yɛayɛ ye zɔ yɛamaa menli mɔɔ yɛtɛyiale bɛ ɛlɛ bɔbɔ la. Fa yɛ mediema mrenyia nee mraalɛ mɔɔ bɛgua bɛ efiade wɔ maanle le kɛ Crimea, Eritrea, Russia yɛɛ Singapore la kɛ neazo. Ɛbanwu menli mɔɔ bɛgua bɛ efiade la aluma wɔ jw.org.c Maangyebakyi zo neavolɛ bie mɔɔ bɛfɛlɛ ye Brian la hanle kɛ: “Menwu ye kɛ saa mekɛlɛ adiema diedinli bie mɔɔ bɛdo ye efiade la duma na mebɔ ye kpole a, ɔboa me ɔmaa mekakye ye wɔ me asɔneyɛlɛ nu.”

14-15. Duzu a baboa yɛ yeamaa yɛayɛ asɔne fɔɔnwo bie yɛamaa yɛ mediema a?

¹⁴ Yɛ ninyɛne fɔɔnwo bie anwo asɔne. Michael mɔɔ yɛlimoa yɛha ɔ nwo edwɛkɛ la hanle kɛ: “Saa melɛkenga mediema mɔɔ bɛgua bɛ efiade la anwo edwɛkɛ wɔ jw.org a, mebɔ mɔdenle kɛ mebanwu kɛzi saa medame a mewɔ bɛ tɛnlabelɛ ne anu a anrɛɛ mebade nganeɛ la. Meze kɛ anrɛɛ mebadwenle me ye anwo yɛɛ me kunlu anu a mebahola meanlea kɛ ɔ sa baha debie biala mɔɔ ɔhyia nwo la. Ɛhye maa menyia debie fɔɔnwo mɔɔ mebahola meaha nwolɛ edwɛkɛ wɔ me asɔneyɛlɛ nu meamaa mediema mrenyia mɔɔ bɛgya mɔɔ bɛgua bɛ efiade la.”—Hib. 13:​3, ɔbdw.

¹⁵ Saa yɛdwenle kɛzi ɛbɛlabɔlɛ bɛayɛ amaa mediema mɔɔ bɛgua bɛ efiade la kenle ko biala la anwo a, eza ɔbamaa yɛanwu ndenle gyɛne mɔɔ yɛbalua zo yɛayɛ asɔne fɔɔnwo yɛamaa bɛ la. Kɛ neazo la, yɛbahola yɛayɛ asɔne kɛ Gyihova ɛmaa menli mɔɔ nea pilizama ne anwo zo la ɛla atiakunlukɛnlɛma ali ɛhile bɛ na ɔmaa arane mgbanyima ɛmaa yɛ mediema ne mɔ adenle bɛmaa bɛzonle Nyamenle. (1 Tim. 2:​1, 2) Yɛbahola yɛayɛ asɔne kɛ Gyihova ɛlua adiema bie mɔɔ bɛdo ye efiade la nɔhalɛlilɛ ne azo ɛmaa asafo ne anwosesebɛ anzɛɛ ɔmaa bɛdabɛ mɔɔ bɛnle diedima la ɛnwu adiema bie mɔɔ bɛdo ye efiade la subane kpalɛ ne na ɔha bɛ ɔmaa bɛdie yɛ edwɛkɛ ne. (1 Pita 2:12) Ngyinlazo ko ne ala bahola aboa yɛ yeamaa yɛayɛ asɔne yɛamaa yɛ mediema mɔɔ bɛlɛyia sɔnea gyɛne la. Saa yɛgua yɛ nye aze yɛnea ninyɛne, yɛbobɔ awie mɔ aluma yɛyɛ asɔne yɛmaa bɛ na yɛyɛ ninyɛne fɔɔnwo bie anwo asɔne yɛmaa bɛ a, yɛbahile kɛ ‘yɛkulo yɛ nwo ngoko yɛmaa ɔbo zo.’—1 Tɛs. 3:12.

NYIA ASƆNEYƐLƐ NWO ADWENLE KPALƐ

16. Kɛ ɔkɛyɛ na yɛanyia yɛ asɔneyɛlɛ ne mɔ anwo adwenle kpalɛ ɛ? (Mateyu 6:8)

¹⁶ Kɛ mɔɔ yɛnwu ye la, bie a yɛ asɔneyɛlɛ kola kakyi tɛnlabelɛ bie. Noko ɔwɔ kɛ yɛnyia yɛ asɔneyɛlɛ ne mɔ anwo adwenle kpalɛ. Saa yɛyɛ asɔne a, ɔngile kɛ yɛlɛka debie bie mɔɔ Gyihova ɛnze la anwo edwɛkɛ yɛahile ye; yɛɛ ɔngile kɛ yɛtu ye folɛ wɔ kɛzi ɔbali tɛnlabelɛ bie anwo gyima kpalɛ la. Gyihova ze mɔɔ ye azonvolɛ hyia nwo la kolaa na bɛdabɛ anzɛɛ yɛdayɛ bɔbɔ yɛanwu ye. (Kenga Mateyu 6:8.) Ɛnee akee duzu ati a ɔwɔ kɛ yɛyɛ asɔne yɛmaa awie mɔ bɔbɔ a? Saa yɛye ninyɛne mɔɔ yɛzuzu nwo la yɛsie ahane a, eza ɔle adenle mɔɔ yɛdua zo yɛkile kɛ yɛdwenle menli nwo a. Ɛlɔlɛ maa yɛyɛ asɔne yɛmaa yɛ nwo ngoko. Na saa Gyihova nwu kɛ ye azonvolɛ ɛlɛsukoa ye ɛlɔlɛ ne a, ɔmaa ɔdi fɛlɛko.

17-18. Duzu a yɛbahola yɛava asɔne mɔɔ yɛyɛ yɛmaa yɛ mediema diedima la yɛatoto nwo a?

¹⁷ Saa yɛ asɔneyɛlɛ angakyi tɛnlabelɛ bie bɔbɔ a, ɔmaa ɔda ali kɛ yɛkulo yɛ mediema yɛɛ Gyihova nwu ye. Maa yɛyɛ ndonwo bie: Fa abusua bie mɔɔ bɛwo ngakula nwiɔ, nrenyia ko yɛɛ raalɛ ko la kɛ neazo. Bɛ ra nrenyia ne anwo dole ye. Bɛ ra raalɛ ne hanle hilele ye papa kɛ: “Mesɛlɛ wɔ, boa me diema ne. Ɔnde kpɔkɛ fee!” Ye papa gua zo ɛlɛyɛ tɛnlabelɛ ne anwo debie; ɔkulo ɔ ra nrenyia ne na ɔlɛyɛ debie yeaboa ye. Noko saa selɛ ne nwu kɛ ɔ ra raalɛ ekyi ne dwenle ɔ diema nrenyia ne anwo kpalɛ ɔti ɔlɛsɛlɛ ye kɛ ɔboa ye a, ɔbamaa selɛ ne anye alie kpalɛ.

¹⁸ Mɔɔ Gyihova maa yɛ anwosesebɛ kɛ yɛyɛ la ɛne—ɔwɔ kɛ yɛdwenle yɛ nwo ngoko na yɛyɛ asɔne yɛmaa yɛ nwo ngoko. Saa yɛyɛ zɔ a, ɔbahile kɛ yɛndwenle yɛ ngomekye yɛ nwo na yɛdwenle yɛ mediema noko anwo na Gyihova nwu ye. (2 Tɛs. 1:3; Hib. 6:10) Eza kɛ mɔɔ yɛzuzu nwo la, ɔdwu mekɛ ne bie a yɛ asɔneyɛlɛ kola kakyi tɛnlabelɛ bie mɔ. Ɔti bɛmaa yɛhakye kɛ yɛbayɛ asɔne yɛamaa yɛ nwo ngoko.