Kpondɛ Menli Ne Kolaa Na Wɔaha Edwɛkɛ Ne
1. Duzu ati a ɛleka mɔɔ bɛka aneɛ dɔɔnwo la, bɛnea asafo biala aneɛ mɔɔ ɔka la na bɛamaa ye nwolɛ azɛlɛsinli a?
1 Wɔ Pɛntekɔso ɛvolɛ 33 Y.M., mɔɔ sunsum nwuanzanwuanza ne rale Gyisɛse ɛdoavolɛ ne mɔ anwo zo la anzi, “bɛbɔle ɔ bo kɛ bɛka aneɛ ngakyile” bɛahile bɛdabɛ mɔɔ bɛvi ɛleka ngakyile bɛra ɛkɛ ne la. (Gyi. 2:4) Mɔɔ vi nu rale la a le kɛ, bɛzɔnenle menli kɛyɛ 3,000. Yɛbahola yɛayɛ ye nzonlɛ kɛ, ɔbayɛ kɛ ɛnee nyɛvolɛ ne mɔ anu dɔɔnwo ka aneɛ ko, mɔɔ bie a le Hibulu anzɛɛ Giliki la. Noko Gyihova manle bɛhanle Belemgbunlililɛ ne anwo edwɛkɛ ne bɛhilele bɛ wɔ bɛ aneɛ nu. Adwenle ko mɔɔ ɔti ɔrale ye zɔ la a le kɛ, menli ta tie edwɛkpa ne wɔ bɛdabɛ mumua ne bɛ aneɛ nu. Ɛhye ati, ɛnɛ, wɔ ɛleka mɔɔ bɛka aneɛ dɔɔnwo la, bɛnea aneɛ mɔɔ bɛka la na bɛahyɛ azɛlɛsinli ne. (Organized, m. 107, ɛden. 2-3) Bɛmmaa maanle gyɛne zo aneɛ ekpunli azɛlɛsinli, noko bɛka edwɛkɛ ne wɔ asafo mɔɔ bɛwɔ nu nee asafo gyɛne mɔɔ wɔ ɛkɛ la azɛlɛsinli nu.
2. (a) Kɛzi bɛkpondɛ menli ne ɛ, na nienwu a ɔhyia kɛ bɛyɛ zɔ a? (b) Kɛ ɔkɛyɛ na asafo ne mɔ aboa bɛ nwo na bɛayɛ gyima wɔ azɛlɛsinli mɔɔ bɛka aneɛ dɔɔnwo wɔ nu la anu ɛ? (d) Saa yɛnyia awie bie mɔɔ ka aneɛ gyɛne na ɔ nye die edwɛkɛ ne anwo a, duzu a ɔwɔ kɛ yɛyɛ a?
2 Saa ɛde ɛleka mɔɔ awie biala ka aneɛ ko ne ala mɔɔ ɛte la a, ɔnyɛ se kɛ ɛbaha edwɛkɛ ne wɔ azua nu. Noko akee, saa ɛwɔ suakpole mɔɔ bɛka aneɛ ngakyile wɔ ɛkɛ la azo a ɔnrɛyɛ zɔ. Bie a asafo mɔɔ bɛka aneɛ gyɛne la ka edwɛkɛ ne wɔ sua ko ne ala azo. Bie a asafo ne mɔ bɛaha menli mɔɔ bɛka wɔ aneɛ ne bie mɔɔ bɛkɛnwu bɛ wɔ azɛlɛsinli ne anu la anwo edwɛkɛ bɛahile wɔ ɛdeɛ, noko wɔ asafo ne anzɛɛ ekpunli ne a ɔle ye ɛzonlelilɛ titile kɛ bɛbakpondɛ menli mɔɔ bɛbaha edwɛkɛ ne bɛahile bɛ la a. (Nea ɛlɛka ne mɔɔ se, “Bɛboa Bɛ Nwo” la.) Ɛhye ati, ɔhyia kɛ bɛbɔ mɔdenle bɛkpondɛ menli, na bɛbiza kɛ bɛbanwu menli mɔɔ ka aneɛ ne bie la. Kɛzi yɛbahola yɛakpondɛ menli mɔɔ ka aneɛ ne bie la ɛ?
3. Duzu a bamaa asafo anzɛɛ ekpunli bie anwu ɛleka mɔɔ bɛbakpondɛ menli ne la ɛ, na mekɛ nyɛ a bɛbava bɛayɛ gyima ɛhye a?
3 Kɛzi Bɛyɛ Nwolɛ Ngyehyɛleɛ La: Mekɛ dodo mɔɔ yɛbava yɛakpondɛ menli wɔ ɛleka mɔɔ bɛka aneɛ dɔɔnwo la, bagyinla ɛkɛ ne tɛnlabelɛ ne azo. Kɛ neazo la, menli nyɛ a ka aneɛ ne wɔ ɛkɛ a? Nolobɔlɛma nyɛ a wɔ ɛkɛ a? Menli nyɛ address yɛɛ asafo ne anzɛɛ ekpunli ne lɛ a? Ɔngyia kɛ asafo ne kpondɛ menli wɔ kpalɛ biala azo pɛpɛɛpɛ, noko bie a ɔbahola yeava ye adwenle yeazie ɛleka mɔɔ menli dɔɔnwo wɔ wɔ bɛ azɛlɛsinli ne anu nee ɛleka mɔɔ wɔ moa ekyi la azo. Noko akee, saa yɛyɛ ngyehyɛleɛ kpalɛ a, ɔbaboa yeamaa menli dɔɔnwo anyia nwolɛ adenle abɔ Gyihova duma ne.—Wulo. 10:13, 14.
4. (a) Kɛzi ɔwɔ kɛ bɛyɛ menli mɔɔ bɛkpondɛ bɛ la anwo ngyehyɛleɛ ɛ? (b) Ndenle mɔɔ ɛdua zo a ɛbanwu menli mɔɔ ka wɔ aneɛ ne la bie mɔ a le boni?
4 Amaa bɛangɔ menli ko ne ala ɛkɛ wɔ ɛleka mɔɔ ɔhyia kɛ bɛkpondɛ menli ne la, ɔwɔ kɛ mgbanyima eku ne, titile ɛzonlenlɛ gyima zo neavolɛ ne yɛ ngyehyɛleɛ nea menli ɛkpondɛlɛ gyima ne azo. (1 Kɔl. 9:26) Wɔ ekpunli mɔɔ bɛka aneɛ gyɛne la anu, adiema nrenya mɔɔ fɛta, kpanyinli anzɛɛ sonvolɛ mɔɔ mgbanyima eku mɔɔ nea aneɛ gyɛne ne azo ɛkpa ye la bahola anlea ekpunli ne azo. Asafo nee ekpunli dɔɔnwo yɛ ngyehyɛleɛ kpalɛ na bɛfa bɛyɛ nwolɛ neɛnleanu. Bɛkpɔla menli na bɛdua zo bɛnea ɛleka mɔɔ ɔwɔ kɛ bɛfa bɛboka azɛlɛsinli ne anwo la. Saa ɔkɛyɛ boɛ a, mgbanyima eku mɔɔ wɔ asafo mɔɔ nea ekpunli bie azo la bahola ayɛ ngyehyɛleɛ amaa asafo ne amuala abɔ nu akpondɛ menli ɔvi mekɛ mɔɔ kɔ mekɛ la.—Nea ɛlɛka ne mɔɔ se, “Kɛ Ɔkɛyɛ Na Wɔakpondɛ Menli Mɔɔ Bɛte Wɔ Aneɛ La.”
5. (a) Nzuzulɛ mɔɔ nolobɔlɛma bahola ava akpondɛ menli la bie mɔ a le boni? (b) Yɛlɛkpondɛ menli a duzu a yɛbahola yɛaha a?
5 Ɔwɔ kɛ yɛfa bodane kpalɛ yɛsie yɛ nyunlu wɔ mekɛ biala mɔɔ yɛlɛkpondɛ menli la. Kɛmɔ gyima ɛhye boka yɛ ɛzonlenlɛ gyima ne anwo la ati, ɔwɔ kɛ yɛsiezie yɛ nwo kpalɛ wɔ mekɛ mɔɔ yɛlɛkɔ daselɛlilɛ la. Menli dɔɔnwo ɛnwu kɛ saa bɛbobɔ edwɛkɛ mɔɔ bɛbaha la azo wɔ aneɛ mɔɔ bɛka la anu wɔ mekɛ mɔɔ bɛlɛkpondɛ menli ne la a, ɔmaa bɛ nye die na bɛka aneɛ ne kɛnlɛma. Yɛbahola yɛabu mekɛ mɔɔ yɛfa yɛkpondɛ menli la anwo mgbonda noko yɛnrɛbu mekɛ mɔɔ yɛfa yɛyɛ azɛlɛsinli ne anwo ngyehyɛleɛ la anwo mgbonda. Saa yɛnwu awie mɔɔ ka yɛ aneɛ ne bie la a, ɔwɔ kɛ yɛbɔ mɔdenle yɛka edwɛkpa ne bie yɛkile ye na ndɛndɛ ne ala yɛbɔ ɛzonlenlɛ gyima zo neavolɛ ne anzɛɛ awie mɔɔ yekpa ye la amaneɛ amaa bɛava ɔ nwo edwɛkɛ bɛaboka azɛlɛsinli ne anwo kɛlɛtokɛ ne anwo. Bɛbayɛ ɛhye bɔbɔ wɔ mekɛ mɔɔ ahenle anye anlie nwolɛ la. Ɔwɔ nuhua kɛ ɔhyia kɛ yɛkpondɛ menli ɛdeɛ, noko ɔwɔ kɛ yɛbɔ mɔdenle yɛyɛ ɛzonlenlɛ gyima ne afoa kɔsɔɔti bie.—Nea ɛlɛka ne mɔɔ se, “Mɔɔ Yɛbaha Yɛava Yɛakpondɛ Menli Ne La.”
6. Ngyegyelɛ titile boni mɔ a wɔ mumule sonla ɛkpondɛlɛ nu a?
6 Kɛzi Bɛkpondɛ Menli Mɔɔ Bɛle Mumule La: Mumulema ɛkpondɛlɛ ɛnla aze yɛɛ ɔhyia mɔdenlebɔlɛ kpalɛ. Ɛnrɛhola ɛnrɛgyinla mumule sonla duma, ye subane anzɛɛ ye tɛladeɛ zo ɛnrɛnwu ye. Bieko, abusua ne anu amra nee agɔnwolɛma bahola abɔ ɔ nwo bane, na bie a bɛnrɛhulo kɛ bɛbaha ɔ nwo edwɛkɛ bɛahile nolobɔlɛma mɔɔ babiza ɔ nwo edwɛkɛ la. Nzuzulɛ mɔɔ doɔdoa zo la noko bahola aboa wɔ mekɛ mɔɔ yɛlɛkpondɛ bɛdabɛ mɔɔ bɛkola bɛtendɛ la.
7. (a) Edwɛkɛ boni a bɛbahola bɛabiza bɛava bɛakpondɛ mumule sonla wɔ ɛleka mɔɔ menli dɔɔnwo de la ɛ? (b) Kɛ ɔkɛyɛ na yɛamaa suamenle bie adwenle nu mɔɔ kɛyɛ ye kesee la avi ɛkɛ ɛ?
7 Asafo nee ekpunli mɔɔ mumulema wɔ nu la ɛhola ɛbɔ mɔdenle ɛbizebiza bɛ nwo edwɛkɛ wɔ ɛleka mɔɔ menli dɔɔnwo de la. Bie a ɛnee suamenle ne ɛnwu kɛ ɔ gɔnwo gyimayɛvo, anzɛɛ awie mɔɔ ɔ nee ye kɔ sukulu la le mumule. Bie a yenwu mumule sukulu bie. Ye busuanli bie le mumule. Kakye kɛ bie mɔ adwenle nu bahola ayɛ bɛ kesee wɔ deɛmɔti wɔra kɛ ɛbakpɔla bɛ la anwo. Noko akee, ɛbahola wɔamaa suamenle ne ahonle adɔ ye azule nu, ɔlua agɔnwolɛvalɛ subane mɔɔ ɛbala ye ali, nɔhalɛlilɛ nee ɛbulɛ nu mɔɔ ɛbavi wɔahilehile wɔ edwɛkɛ nu sikalɛ la azo. Debie kpalɛ vi bie mɔ anu ɛra, ɔlua Baebolo ne anzɛɛ DVD mɔɔ bɛfa bɛkile suamenle ne na bɛbiza ye kɛ ɔze awie mɔɔ le mumule la azo. Akee bɛka ye sikalɛ kɛ bɛkulo kɛ bɛ nee ye sukoa Baebolo ne anu anyelazo ne. Saa suamenle ne ɛngulo kɛ ɔbaha mumule sonla ne anwo edwɛkɛ dɔɔnwo a, bie a ɔ nye balie ɛsalɛ mɔɔ bɛbado bɛavɛlɛ ye busuanli anzɛɛ ɔ gɔnwo mumule ne kɛ ɔrɛla debiezukoalɛ la anwo.
8. Kɛzi asafo bie mɔɔ bikye la bahola aboa mumule aneɛ asafo ne ɛ?
8 Mumule aneɛ asafo bie bahola ava kenle ko anzɛɛ kenle nwiɔ wɔ ɛvolɛ ne anu ado ɛsalɛ avɛlɛ asafo mɔɔ bikye bɛ la kɛ bɛboa bɛ bɛmaa bɛkpondɛ menli mɔɔ de azuamgbole mɔɔ wɔ bɛ azɛlɛsinli ne anu la. Mumule aneɛ asafo ne bahola ayɛ daselɛlilɛ nyianu, na bɛava gyima ɛhye anwo adehilelɛ nee yɛkile bɛaboka nwo. Bɛbahola bɛaye nolobɔlɛnli ko mɔɔ wɔ mumule aneɛ asafo nu la bɛamaa yeali ekpunli biala anyunlu na bɛahile ye ɛleka mɔɔ ɔwɔ kɛ bɛkpondɛ menli ne la.
9. Kɛ ɔkɛyɛ na bɛakpondɛ menli wɔ ɛleka mɔɔ mumulema yia dielie bɛ nye anzɛɛ bɛdie moalɛ bɛfi la ɛ?
9 Eza bɛbahola bɛakpondɛ mumulema wɔ ɛleka mɔɔ bɛyia nu kɛ eku na bɛdie bɛ nye anzɛɛ bɛnyia moalɛ bɛfi sua ne azo amra ɛkɛ la. Ɔwɔ kɛ nolobɔlɛma wula tɛladeɛ mɔɔ fɛta la. Bie a ɔbayɛ kpalɛ kɛ bɛ nee sonla ko anzɛɛ menli nwiɔ kɛdendɛ tɛla kɛ bɛ nee menli ne amuala kɛdendɛ la. Saa adwelielilɛ ne kɔ zo kɛnlɛma a, bie a bɛbahola bɛava bɛ nɔma bɛamaa na bɛalie bɛ ɛdeɛ.
10. Kɛzi nolobɔlɛma bahola akpondɛ menli wɔ ɛleka mɔɔ gyima wɔ la ɛ?
10 Yɛbahola noko yɛahɔ ɛleka mɔɔ bɛtɔne patulo, bɛkpuda ninyɛne, bɛkpo ninyɛne, bɛtɔne aleɛ, anzɛɛ bɛyɛ gyima gyɛne bie la. Wɔ gyima gyima zɛhae mɔ anu, yɛbahola yɛabiza saa bɛdabɛ mɔɔ bɛyɛ gyima wɔ ɛkɛ anzɛɛ bɛbatɔ debie la bie le mumule a. Saa mumule sukulu wɔ azɛlɛsinli ne anu a, yɛbahola yɛava yɛ DVD ne bie yɛamaa bɛado bɛ mbulukuzielɛleka ne.
11. Duzu ati a menli ɛkpondɛlɛ le daselɛlilɛ gyima ne foa mɔɔ hyia ɛ?
11 Gyima Mɔɔ Hyia: Suamenle ne mɔ mɔɔ ka wɔ aneɛ ne la ɛkpondɛlɛ bahola ayɛ gyima ɛsesebɛ. Bieko, kɛzi menli tu wɔ kpalɛ bie azo na menli fofolɛ batɛnla ɛkɛ la bahola amaa yeayɛ se kɛ bɛbayɛ azɛlɛsinli ne anwo kɛlɛtokɛ kpalɛ. Noko akee, wɔ ɛleka dɔɔnwo ne ala menli ɛkpondɛlɛ ne le ɛzonlenlɛ gyima ne foa mɔɔ hyia a. Gyihova mɔɔ ɛva daselɛlilɛ gyima ne ɛwula yɛ sa nu la bu menli kɔsɔɔti kɛ bɛsɛ. (Gyi. 10:34) “[Ɔkpondɛ] kɛ menli kɔsɔɔti nwu nɔhalɛ ne na bɛnyia ngoane.” (1 Tem. 2:3, 4) Ɛhye ati, bɛmaa yɛbɔ nu yɛ nee Gyihova ɛyɛ ko kɛ yɛkpondɛ menli mɔɔ ka aneɛ kɔsɔɔti mɔɔ bɛlɛ “ahonle kpalɛ” la.—Luku 8:15.
[Ɛlɛka wɔ mukelɛ 5]
Bɛboa Bɛ Nwo
Saa asafo ne anzɛɛ ekpunli hyia moalɛ na bɛahola bɛakpondɛ menli mɔɔ bɛbaha edwɛkɛ ne bɛahile bɛ a, ɛzonlenlɛ gyima zo neavolɛ bahola anwu mgbanyima mɔɔ wɔ asafo gyɛne mɔɔ bikye anu la. Ɔbayɛ kpalɛ kɛ bɛbanwu asafo mɔɔ bɛnle moa dɔɔnwo anzɛɛ bɛlɛ menli dɔɔnwo mɔɔ ka zɔhane aneɛ ne wɔ bɛ azɛlɛsinli ne anu la. Asafo ne mɔɔ bɛbanwu ye la bahola aha ahile nolobɔlɛma kɛ bɛnwu awie mɔɔ ka zɔhane aneɛ ne la a, bɛhɛlɛ ye address na bɛva bɛmaa ɛzonlenlɛ gyima zo neavolɛ ne bɛmaa ɔva ɔmaa asafo anzɛɛ ekpunli ne mɔɔ ɛlɛkpondɛ moalɛ ne la. Ɛzonlenlɛ gyima zo neavolɛma mɔ wɔ asafo ɛhye mɔ anu la ɔwɔ kɛ bɔ nu yɛ ngyehyɛleɛ na bɛyɛ gyima wɔ azɛlɛsinli mɔɔ bɛka aneɛ ngakyile wɔ nu la na bɛkile anyelielɛma adenle bɛmaa bɛkɔ asafo anzɛɛ ekpunli mɔɔ fɛta la anu.
Saa nolobɔlɛma nwu awie mɔɔ ka aneɛ gyɛne na ɔ nye die edwɛkɛ ne anwo kpalɛ (anzɛɛ awie mɔɔ le mumule la a), ɔwɔ kɛ bɛyɛ ye ndɛ bɛhyehyɛ Please Follow Up (S-43) kɛlata ne na bɛfa bɛmaa asafo ne anu kɛlɛhɛlɛvolɛ ne. Ɛhye bamaa ahenle anyia sunsum nu moalɛ ndɛndɛ.—Nea km 5/11 m. 3.
[Ɛlɛka wɔ mukelɛ 6]
Kɛ Ɔkɛyɛ Na Wɔakpondɛ Menli Mɔɔ Bɛte Wɔ Aneɛ La
• Biza awie mɔ—Baebolo sukoavoma, abusua ne anu amra, gyimayɛvoma nee mɔɔ bokɛboka nwo la.
• Fi nrɛlɛbɛ nu biza ɛleka mɔɔ bɛboa maanlema, mɔɔ bie a le mbulukuzielɛleka, arane ɔfese nee kɔlegyi ne mɔ anu.
• Nea adwelie ngɛlata nu na nwu gyimalilɛ bie mɔɔ aneɛ gyɛne bie bayɛ ye wɔ bagua nu la.
• Kɔ sotɔɔ nee gyima ngakyile mɔɔ yɛ ninyɛne bie mɔ mɔɔ boa aneɛ gyɛne la.
• Sɛlɛ adenle fi menli mɔɔ nea ɛkɛ ne la ɛkɛ, na fa mbuluku gua ɛkponle zo wɔ yunivɛsiti, kale agyinlaleɛ mɔɔ menli mɔɔ ka aneɛ gyɛne ta kɔ ɛkɛ la.
[Ɛlɛka wɔ mukelɛ 7]
Mɔɔ Yɛbaha Yɛava Yɛakpondɛ Menli Ne La
Yɛdua agɔnwolɛvalɛ adenle zo yɛ nee bɛ di adwelie kpalɛ a, ɔbaye adwenle ɛtane biala yeavi ɛkɛ. Saa yɛdumua yɛfa buluku mɔɔ wɔ zɔhane aneɛ ne anu yɛkile awie a ɔboa kpalɛ.
Ɛbiza ɛhye ɛwie a ɛbahola wɔaha kɛ: “Yɛlɛkpondɛ menli mɔɔ ka ․․․․․ aneɛ ne la amaa yɛaha anyelazo mɔɔ wɔ Baebolo ne anu la yɛahile bɛ. Ɛze awie bie zɔhane ɔ?”
Saa yɛlɛkpondɛ mumule sonla a, ɛbahola wɔaha kɛ: “Ahye o. Mekola mekile wɔ debie ɔ? [Fa debie mɔɔ bɛfa bɛye video la na bɔ New World Translation mɔɔ wɔ DVD zo la anu ngyehyɛnu bie kile ye.] Ɛhye boka Baebolo ne mɔɔ wɔ America Mumule Aneɛ nu la anwo. Mɔɔ boka Baebolo ne anwo la, bɛyɛ video dɔɔnwo mɔɔ bɛnlie nwolɛ ezukoa mɔɔ bɛyɛ kɛ bɛfa bɛali menli mɔɔ bɛle mumule la sunsum nu ngyianlɛ nwo gyima a. Ɛze awie mɔɔ le mumule anzɛɛ ɔnde edwɛkɛ kpalɛ la ɔ?” Saa suamenle ne ɛngakye awie biala a, ɔle kpalɛ kɛ ɛmaa ye neazo wɔ ɛleka mɔɔ bie a yenwu mumule sonla, le kɛ gyima nu, sukulu anzɛɛ kpalɛ ne azo la.