Nyamenle Dwenle Anzondiliravolɛma Anwo
Anzondiliravolɛma mgbe kɛyɛ 70 a wɔ ewiade a, yɛɛ bɛ nuhua dɔɔnwo dua mumule aneɛ mɔɔ bo 200 la anu ko azo a di adwelie a. Noko edwɛkɛ mɔɔ doa zo la maa ɔda ali kɛ bɛta bɛsisi anzondiliravolɛma:
“Wɔ ewiade amuala, bɛta bɛbu bɛ nye bɛgua anzondiliravolɛma fanwodi zo.”—National Association of the Deaf (U.S .).
“Anzondiliravolɛma mɔɔ wɔ maanle mɔɔ bɛdi ehyia la azo la boka menli mɔɔ di ehyia kpalɛ la anwo, bɛnnyia sukulu kpalɛ bɛngɔ, bɛnnyia gyima kpalɛ bɛnyɛ yɛɛ bɛnga edwɛkɛ mɔɔ ɔwɔ kɛ bɛte la bɛngile bɛ.”—World Federation of the Deaf.
Kɛzi Nyamenle bu anzondiliravolɛma ɛ? Duzu a Baebolo ne ka ye wɔ anzondiliravolɛma anwo a? Na kɛzi Gyihova Alasevolɛ ɛlɛboa bɛ ɛ?
Kɛzi Nyamenle Bu Anzondiliravolɛma La
Baebolo ne maa ɔda ali kɛ Gyihovaa Nyamenle dwenle anzondiliravolɛma anwo. Ɔngulo kɛ bɛsisi bɛ, emomu ɔkulo kɛ bɛnyia ye ngilehilelɛ ne azo nvasoɛ.
Ngɛlɛlera: “Mmaka munzule edwɛkɛ ɛtia anzondiliravolɛ.”—Lɛvitikɔso 19:14.
Mɔɔ ɔkile: Mɛla mɔɔ Gyihova vale maanle Yizilayɛma la bɔle anzondiliravolɛma anwo bane.
Ngɛlɛlera: “Nyamenle ɛnnea sonla nyunlu.”—Gyima ne 10:34.
Mɔɔ ɔkile: Gyihova dwenle menli kɔsɔɔti anwo ɔnva nwo ɛleka mɔɔ bɛvi, bɛ amaamuo yɛɛ aneɛ mɔɔ bɛka saa bɔbɔ bɛle anzondiliravolɛma a.
Ngɛlɛlera: “Gyisɛse hɔkpɔsale . . . , ɔbɔle Belemgbunlililɛ ne anwo edwɛkpa ne nolo.”—Mateyu 9:35.
Mɔɔ ɔkile: Gyisɛse rale azɛlɛ ye azo kɛ ɔba yeahilehile menli kɔsɔɔti, mɔɔ anzondiliravolɛma boka nwo la Nyamenle Belemgbunlililɛ ne nee mɔɔ ɔbayɛ la anwo debie.—Mateyu 6:10.
Ngɛlɛlera: Gyisɛse maanle ‘anzondiliravolɛ bɔbɔ dele edwɛkɛ na mumule dendɛle.’—Maake 7:37.
Mɔɔ ɔkile: Gyisɛse maanle ɔlale ali kɛ Nyamenle Belemgbunlililɛ ne bamaa anzondiliravolɛma ade edwɛkɛ na bɛadendɛ. Wɔ mekɛ ɛhye anu, Gyisɛse limoale luale sɛkɛlɛneɛ adenle zo nee nrenyia anzondiliravolɛ ne dendɛle kolaa na yeamaa yeahola yeade edwɛkɛ na yeadendɛ.—Maake 7:31-35.
Ngɛlɛlera: “Anzondiliravolɛma bade edwɛkɛ.”—Ayezaya 35:5.
Mɔɔ ɔkile: Gyihova ɛha kɛ anzondiliravolɛma anzo bade edwɛkɛ.—Ayezaya 29:18.
Kɛzi Gyihova Alasevolɛ Ɛlɛboa Anzondiliravolɛma Ɛnɛ La
Gyihova Alasevolɛ ka anyelazo edwɛkɛ mɔɔ Nyamenle ɛha la bie kile anzondiliravolɛma mɔɔ wɔ ewiade amuala la. Duzu a maa yɛkola yɛyɛ ɛhye a? Yɛyɛ Baebolo nee vidio mɔɔ bɛfa bɛsukoa Baebolo ne la wɔ mumule aneɛ mɔɔ bo 100 la anu. Eza yɛ nee anzondiliravolɛma sukoa Baebolo ne na yɛyɛ debiezukoalɛ wɔ mumule aneɛ nu yɛmaa bɛ. Yɛyɛ ɛhye mɔ amuala yɛmaa menli mɔɔ kulo kɛ Nyamenle boa bɛ la mɔɔ bɛndua nwolɛ ezukoa biala a. Duzu ati ɔ? Ɔluakɛ Gyisɛse hanle kɛ: “Bɛnyianle ye mgbane, bɛva bɛmaa mgbane.”—Mateyu 10:8.
Ɛbahola wɔalua ndenle ɛhye mɔ azo wɔanwu ninyɛne ɛhye mɔ bie anzɛɛ wɔahwe bie wɔado wɔ milahyinli zo:
JW.ORG. Tinli aneɛ sɛkɛlɛneɛ ne azo amaa wɔanwu mumule aneɛ mɔɔ ɛkpondɛ la.
JW Library app. Twe app ne mɔɔ bɛndua nwolɛ ɛhwee la na ɛbahola wɔava wɔahwe anzɛɛ wɔanlea vidio wɔ mumule aneɛ mɔɔ bo 100 la anu.
Ninyɛne Mɔɔ Bɛfa Bɛsukoa Baebolo Ne La Boni Mɔ A Yɛyɛ A?
Baebolo mɔɔ bɛhile ɔ bo bɛhɔ mumule aneɛ nu la. Ngɛlɛlera Nwuanzanwuanza—Ewiade Fofolɛ Ngilebɛbo mɔɔ bɛyɛ ye wɔ America Mumule Aneɛ nu la a le Baebolo mɔɔ bɛlimoale bɛhilele ɔ bo bɛhɔle mumule aneɛ nu wɔ ewiade a. Bɛhile Ewiade Fofolɛ Ngilebɛbo ne foa bie anzɛɛ ɔ muala abo bɛhɔ mumule aneɛ dɔɔnwo anu kɛkala, ɛvolɛ biala bɛkile ɔ bo bɛkɔ mumule aneɛ gyɛne nu. (Amaa wɔanwu aneɛ mɔɔ bɛhile Baebolo ne abo bɛhɔ nu anzɛɛ Baebolo ne mɔɔ wɔ Yintanɛte ne azo la, nea ɛlɛka “Ewiade Fofolɛ Ngilebɛbo Baebolo Ne Wɔ Mumule Aneɛ Nu.”)
Saa ɛkulo kɛ ɛkenga Baebolo ne kpalɛ wɔ mumule aneɛ nu a, twe JW Library app ne. App ɛhye baboa wɔ yeamaa wɔagenga ngyehyɛnu fɔɔnwo bie wɔ mumule aneɛ nu.
Dmytro nee Vita le awovolɛ mɔɔ bɛle mumule a, noko bɛ mra ne mɔɔ te edwɛkɛ. Nea kɛzi bɛ abusua ne nyia Baebolo ne mɔɔ bɛnea ye wɔ mumule aneɛ nu dahuu biala la azo nvasoɛ la.
Vidio mɔɔ bɛfa bɛsukoa Baebolo ne la. Gyihova Alasevolɛ ɛyɛ vidio mɔɔ boa menli ɔmaa bɛte Baebolo ne anu folɛdulɛ kpalɛ ne mɔ abo na bɛfa bɛbɔ bɔ ɛbɛla la wɔ mumule aneɛ nu . . .
Baebolo ne mɔɔ bɛ nee awie sukoa la. Maa awie ɛboa wɔ ɔmaa ɛzukoa Baebolo ne wɔ mekɛ nee ɛleka mɔɔ ɛkulo la wɔ mumule aneɛ nu. Biza Baebolo ɛzukoalɛ ɛhye mɔɔ bɛndua nwolɛ ezukoa biala la anwo adenle.
Jeson Senajonon de Philippines. Nea kɛzi Baebolo ne mɔɔ yɛ nee ye zukoale la boale ye maanle ɔ nee Nyamenle nyianle agɔnwolɛvalɛ kpalɛ la.
Ɛnee Mario Antúnez le ɛsɔfo wɔ Honduras. Nea kɛzi ɔnyianle ye Baebolo kpuya bie mɔ anwo mualɛ la wɔ mekɛ mɔ ɔlɛkilehile ye edwɛkɛ nu wɔ edwɛkɛ ne mɔɔ se “Ɛnee Melɛ Kpuya Dɔɔnwo” la anu la.
Debiezukoalɛ nee nyianu ngakyile. Yɛlɛ asafo nee ekpunli dɔɔnwo wɔ mumule aneɛ nu wɔ ewiade amuala, anzondiliravolɛma kɔyia nu wɔ ɛkɛ ne sukoa Baebolo ne na bɛsonle dapɛne biala. Eza yɛyɛ nyianu mgbole ɛvolɛ biala yɛfa yɛsukoa Baebolo ne wɔ mumule aneɛ nu. Wɔ debiezukoalɛ ɛhye mɔ abo, bɛboa mumulema mɔɔ bɛ nye ɛzi la bɛmaa bɛte debie mɔɔ bɛlɛsukoa la abo. Eza yɛyɛ mbuluku wɔ braille nu mɔɔ yɛndɔne bɛ a.
Kpondɛ asafo mɔɔ bikye wɔ la.
Nea yɛ nyianu ngyikyi nee mgbole ne mɔ.
Kɔ Gyisɛse ewule Ngakyelɛlilɛ ne mɔɔ le yɛ ayia titili wɔ ɛvolɛ ne anu la bie.
José Luis Ayala de Mexico. Bɛwole ye anzondiliravolɛ na nzinlii ɔ nye zinle. Nea kɛzi bɛboale ye bɛmaanle ɔrayɛle awie mɔɔ kola kilehile Baebolo ne anu kpalɛ la.
a Nyamenle duma a le Gyihova. (Edwɛne 83:18) Nea edwɛkɛ “Gyihova A Le Nwane?”