Mekɛ Mɔɔ Suamenle Ka Aneɛ Gyɛne La
1. Duzu ati a koyɛlɛ nwo hyia kpalɛ wɔ mekɛ mɔɔ yɛlɛyɛ azɛlɛsinli ne anu gyima la ɛ?
1 Belemgbunlililɛ nolobɔlɛma ta yia anyelielɛma mɔɔ ka aneɛ gyɛne la fane dɔɔnwo ne ala. Kɛmɔ bɛkola bɛka aneɛ dɔɔnwo wɔ ɛleka ko la ati, asafo dɔɔnwo mɔɔ ka aneɛ ngakyile la bahola ali daselɛ wɔ azɛlɛsinli ko ne ala anu. Kɛzi asafo ne mɔ bahola ayɛ ko amaa bɛayɛ daselɛlilɛ gyima ne wɔ adenle mɔɔ ɔnle basabasa la azo ɛ?—1 Kɔl. 14:33.
2. (a) Ɔnva nwo azɛlɛsinli mɔɔ yɛyɛ nuhua gyima la, duzu a ɔwɔ kɛ yɛnyia ɛhulolɛ kɛ yɛkɛyɛ a? (b) Saa yɛkɔ sua nu nee sua nu daselɛlilɛ a, kɛzi yɛbahola yɛ nee asafo anzɛɛ ekpunli mɔɔ ka aneɛ gyɛne wɔ ɛkɛ ne la ayɛ ko ɛ?
2 Koyɛlɛ Kpalɛ: Saa nolobɔlɛnli bie ɛlɛdi daselɛ wɔ gua zo anzɛɛ mgbemgbɛnenu a, ɔwɔ kɛ ɔkola ɔka edwɛkɛ ne ɔkile awie biala mɔɔ bɛdabɛ mɔɔ bɛka aneɛ gyɛne boka nwo la, na ɔmaa bɛ mbuluku wɔ aneɛ mɔɔ bɛkulo la anu. Saa nolobɔlɛnli bie kɔ sua nu nee sua nu daselɛlilɛ na ɔkɔto suamenle mɔɔ ɔte ye aneɛ ne a, ɔwɔ kɛ ɔdi ye daselɛ ɔnva nwo kɛ bɛnga zɔhane aneɛ ne wɔ ye asafo ne anu la. Saa asafo mɔɔ ka aneɛ gyɛne la di daselɛ wɔ azɛlɛsinli ko ala anu a, ɔhyia kɛ bɛyɛ sua nu nee sua nu daselɛlilɛ nwo kɛlɛtokɛ kpalɛ amaa yɛangɔ menli ko ne ala ɛkɛ fane dɔɔnwo. Ɔwɔ kɛ ɛzonlenlɛ gyima zo neavolɛma nee bɛ nwo di ngitanwo na bɛyɛ nwolɛ ngyehyɛleɛ ammaa bɛanyɛ azɛlɛsinli ne anu gyima dɔɔnwo somaa.—Mrɛ. 11:14.
3. Saa yɛ nee awie mɔɔ ɛnde aneɛ mɔɔ bɛka wɔ yɛ asafo ne anu kpalɛ la bɔ Baebolo ɛzukoalɛ bo a, duzu a ɔwɔ kɛ yɛnyia ɛhulolɛ kɛ yɛkɛyɛ a, na kɛmɔti ɛ?
3 Ɛlɔlɛ Mɔɔ Angomedi Ɛnle nu Hyia: Ɔdwu mekɛ ne bie a, nolobɔlɛnli bie kola nee awie mɔɔ ɔnde aneɛ mɔɔ bɛka wɔ ye asafo ne anu la bɔ Baebolo ɛzukoalɛ bo. Saa Baebolo ɛzukoalɛ ne kɔ zo na ahenle ne kulo kɛ ɔkɔ debiezukoalɛ a, duzu a ɔwɔ kɛ ɔyɛ a? Ɔyɛ a bie mɔ ɛngulo kɛ bɛkɛmaa awie mɔɔ wɔ asafo mɔɔ ka zɔhane aneɛ ne anu la nee sukoavo ne kɛzukoa. Noko akee, ɔwɔ kɛ sukoavo ne anwo ɛlɔlɛ ka yɛ maa yɛyɛ mɔɔ baboa ye la yɛmaa ye. Ɔwɔ kɛ bɛfa Baebolo ɛzukoalɛ ne bɛwula adiema mɔɔ wɔ asafo mɔɔ ka sukoavo ne aneɛ mɔɔ bahola adoa zo la asa nu. Ɛhye baboa sukoavo ne yeamaa yeanyia nvasoɛ dɔɔnwo yeavi asafo debiezukoalɛ ne anu.
4. Saa yɛ nee nolobɔlɛma mɔɔ vi asafo anzɛɛ ekpunli mɔɔ ka aneɛ gyɛne nu la ɛlɛyɛ gyima wɔ azɛlɛsinli ko ala anu a, kɛzi ɔwɔ kɛ yɛyɛ ɛ?
4 Gyima Ko ne Ala: Saa ɔba ye kɛ nolobɔlɛma mɔɔ vi asafo ngakyile nu la kɔ daselɛlilɛ wɔ azɛlɛsinli ko ne ala anu a, kɛzi ɔwɔ kɛ bɛdi nwolɛ gyima ɛ? Nɔhalɛ nu bɛbava Keleseɛne ɛlɔlɛ bɛalumua bɛadɛla aneɛ mɔɔ bɛka la na bɛazuzu menli mɔɔ wɔ azɛlɛsinli ne anu la sunsum nu ngyianlɛ nwo. (Dwɔn 13:34, 35) Ɛhye ati, menli mɔɔ li bɛ nyunlu la bava ɛlɔlɛ ali gyima na bɛazi kpɔkɛ kɛ saa ɔwɔ kɛ ekpunli ko kɔyɛ gyima wɔ azɛlɛsinli gyɛne nu wɔ mekɛ ekyi anu a.—Gye. 3:17, 18.
5. Ngapezo boni a ɛlɛba nu ɛnɛ a?
5 Baebolo ne hanle dole ɛkɛ ne kɛ menli mɔɔ ka aneɛ ngakyile la bade edwɛkpa ne. (Yek. 14:6, 7) Saa yɛ muala yɛka yɛbɔ nuhua kpalɛ a, ɔnrɛmaa yɛnrɛzɛkye yɛ mekɛ na ɔbamaa yɛaha edwɛkpa ne yɛahile menli dɔɔnwo mɔɔ bɛle fofolɛ, mɔɔ bɛdabɛ mɔɔ bɛka aneɛ gyɛne boka nwo la.—Ɛfɛ. 4:16.