Maa Maanle Gyɛne Zo Aneɛ Ɛnyia Anyuhɔlɛ
1. Nwolɛ adenle boni a yɛnyia wɔ mekɛ mɔɔ yɛlɛbɔ edwɛkɛ ne nolo wɔ yɛ azɛlɛsinli ne anu la ɛ?
1 Gyisɛse Kelaese hanle dole ɛkɛ ne kɛ bɛbabɔ edwɛkpa ne nolo “amaa yeayɛ daselɛlilɛ yeamaa aleɛabo amra” amuala. Zɔhane edwɛkɛ ne wɔ awie biala mɔɔ bɔ edwɛkɛ ne nolo na ɔyɛ ngilehilelɛ gyima ne bie la adwenle nu. (Mat. 24:14; 28:19, 20) Mekɛ mɔɔ yɛlɛbɔ edwɛkɛ ne nolo na yɛayɛ menli ɛdoavolɛma la, yɛbahola yɛayia menli mɔɔ vi maanle ngakyile nu mɔɔ ka aneɛ gyɛne (mɔɔ le kɛ Arabic, Fenlanze yɛɛ Chinese) la. Ɔfɛta kɛ menli ɛhye mɔ noko te Belemgbunlililɛ nrɛlaleɛ ne na bɛsi nɔhalɛ ne anwo kpɔkɛ kpundii kolaa na Gyihova kenle ne mɔɔ yɛ ɛzulolɛ la ara. (Mal. 3:18) Kɛ ɔkɛyɛ na yɛamaa maanle gyɛne zo aneɛ mɔɔ wɔ yɛ azɛlɛsinli ne anu la anyia anyuhɔlɛ ɛ?
2. Ndenle boni azo a yɛsukoa Gyihova wɔ mekɛ mɔɔ yɛkɛdendɛ yɛkɛhile menli mɔɔ ka aneɛ gyɛne la ɛ?
2 Suzu Kɛzi Gyihova Bu Menli Mɔɔ Ka Aneɛ Gyɛne La Anwo: Amaa yɛanyɛ nyeyenu na yɛahola yɛala Gyihova anwo ɛlɔlɛ ali yɛahile awie biala mɔɔ wɔ yɛ azɛlɛsinli ne anu la, ɔwɔ kɛ yɛnyia ɛhulolɛ kpole kɛ yɛbaboa menli yɛamaa bɛanyia Gyihova, nɔhalɛ Nyamenle ne anwo nɔhalɛ ndelebɛbo mɔɔ aneɛ mɔɔ bɛka la ɛnvane nwo a. (Edw. 83:18; Gyi. 10:34, 35) Yɛtwe adwenle titile yɛkɔ menli mɔɔ ka aneɛ mɔɔ yɛfa yɛyɛ debiezukoalɛ wɔ asafo ne anu la azo ɛdeɛ, noko ɔwɔ kɛ yɛdwenle menli mɔɔ ka aneɛ gyɛne la ngyianlɛ nwo na yɛka Nyamenle Belemgbunlililɛ nrɛlaleɛ ne yɛkile bɛ. Saa yɛbu yɛ nye yɛgua menli mɔɔ ka aneɛ gyɛne la anwo zo a, ɔ nee Gyihova bodane mɔɔ kile kɛ ɔwɔ kɛ bɛdi aleɛabo amra kɔsɔɔti daselɛ la ɛnrɛyɛ ko. Ɛnee kɛ ɔkɛyɛ na yɛahola yɛaboa menli mɔɔ ka aneɛ gyɛne la ɛ?
3. Buluku mɔɔ boa la boni a bɛyɛ bɛmaa yɛ a, na kɛ ɔkɛyɛ na yɛaziezie yɛ nwo yɛava yɛali gyima ɛ?
3 Fa Good News for People of All Nations Di Gyima: Bɛyɛ buluku ɛhye kɛ yɛva yɛboa menli mɔɔ ka aneɛ gyɛne mɔɔ yɛ nee bɛ kɛyia la. Fa buluku ɛhye wula wɔ baage nu mekɛ biala, nwu nuhua edwɛkɛ ne kpalɛ na siezie ɛ nwo fa di gyima. Amaa yɛayɛ ndɛndɛ la, yɛ aneɛ ngakyile mɔɔ bɛka ye wɔ wɔ azɛlɛsinli ne anu la nzonlɛ. Saa bɛlɛ mbuluku wɔ aneɛ ɛhye mɔ anu a, ɔkɛyɛ kpalɛ kɛ ɛkɛlie ekyi na ɛkɛva ɛkɛmaa ahenle wɔ mekɛ mɔɔ bɛzuzu edwɛkɛ ne mɔɔ wɔ Nations buluku ne anu anwo bɛwie la.
4. Kɛzi yɛbahola yɛava Nations buluku ne yɛali gyima wɔ daselɛlilɛ nu ɛ?
4 Saa ɛyia awie wɔ daselɛlilɛ nu mɔɔ ka aneɛ gyɛne na ɛnze aneɛ mɔɔ ɔka la a, bɔ ɔ bo fa buluku ne azo edwɛkɛ ne kile ye. Fa ɛ sa sie ɛ nwo zo na kile ye maanle mɔɔ ɛvi nuhua la, na maa ɔnwu kɛ ɛkulo kɛ ɛnwu ɛleka mɔɔ ɔvi nee aneɛ mɔɔ ɔka la. Saa ɛnwu aneɛ mɔɔ ɔka la a, nea nuninyɛne ne anu na kpondɛ mukelɛ mɔɔ ɔwɔ la, twe suamenle ne adwenle kɔ edwɛkɛ mɔɔ bɛhɛlɛ ye mgbole mɔɔ wɔ mukelɛ ne ati zo la azo, na akee maa suamenle ne ɛnwu kɛ ɛkulo kɛ ɔkenga edwɛkɛ ne. Saa ɔwie a, fa trate mɔɔ wɔ ye aneɛ ne anu la maa ye, anzɛɛ twe ye adwenle kɔ edwɛkɛ ne mɔɔ bɛyɛ nwolɛ kɛ nzonle mɔɔ ka kɛ ɛkulo kɛ ɛfa buluku mɔɔ wɔ ye aneɛ nu ɛsia ɛbɛlɛ ye la azo. Akee kile ye edwɛkɛ ne mɔɔ se “me duma” mɔɔ bɛyɛ ye mgbole la, na bɔ wɔ duma wienyi kile ye. Fa ɛ sa sie “wɔ duma” mɔɔ bɛyɛ ye mgbole la azo, na kendɛ maa suamenle ne ɛdendɛ. Yɛ sia kɔkpɔla nwo ngyehyɛleɛ to ɛkɛ.
5. Duzu a ɔwɔ kɛ yɛyɛ na yɛahola yɛaboa menli mɔɔ ka aneɛ gyɛne mɔɔ kɛhile edwɛkɛ ne anwo anyelielɛ la ɛ?
5 Yɛ Ngyehyɛleɛ Maa Bɛdoa Zolɛ: Ɔwɔ kɛ yɛbɔ mɔdenle biala yɛkpɔla menli mɔɔ anye die Belemgbunlililɛ nrɛlaleɛ ne anwo la ɔnvane nwolɛ aneɛ mɔɔ bɛka la. Saa yɛnwu kɛ ahenle anye die Nyamenle Edwɛkɛ Baebolo ne anwo a, ɔwɔ kɛ yɛkɛlɛ ɔ nwo edwɛkɛ wɔ Please Follow Up (S-43) kɛlata ne azo ndɛndɛ na yɛfa yɛmaa asafo kɛlɛhɛlɛvolɛ ne yɛmaa ɔfa ɔnwa ɔfese ne amaa ahenle ɛhye mɔɔ anye die edwɛkɛ ne anwo la anyia awie mɔɔ ka ye aneɛ la arakpɔla ye. Ɔfese ne noko bava kɛlata ne ahɔmaa aneɛ ekpunli mɔɔ fɛta la. Saa bɛ sa ka kɛlata ne ala a, bɛbakpondɛ ahenle ne ndɛndɛ. Kɛlɛhɛlɛvolɛ ne bahola ava kɛlata ne kope yeamaa ɛzonlenlɛ gyima zo neavolɛ ne amaa yɛanwu kɛzi aneɛ ekpunli ne ɛlɛdi moalɛ ne anwo gyima la. Ɔwɔ kɛ bɛfa kɛlata ɛhye bɛdi gyima wɔ mekɛ mɔɔ ahenle kɛhile edwɛkɛ ne anwo anyelielɛ la angomekye.
6. Saa yɛyia anyelielɛnli mɔɔ ka aneɛ gyɛne a, gyima boni a ɔwɔ kɛ yɛyɛ ye wɔ nwolɛ a?
6 Ɔvi mekɛ mɔɔ yɛbava S-43 kɛlata ne yeanwa kɔkpula kɛ ahenle mɔɔ hilele edwɛkɛ ne anwo anyelielɛ banyia nolobɔlɛnli mɔɔ ka ye aneɛ arakpɔla ye la bali mekɛ ekyi. Ɛhye ati, amaa ahenle anyelielɛ ne anyia anyuhɔlɛ la, nolobɔlɛnli ne mɔɔ vale S-43 kɛlata ne hɔle la bahola ahɔ zo aboa ye kɔkpula kɛ awie mɔɔ ka ye aneɛ la bara ye ɛkɛ. Saa ɔkɛyɛ boɛ a, bɛbahola bɛ nee ahenle ne ayɛ Baebolo ɛzukoalɛ. Noko akee, wɔ mekɛ ɛhye mɔɔ bɛlɛkpondɛ awie la anu, kɛ ɔkɛyɛ na nolobɔlɛnli bie anyia mbuluku wɔ aneɛ mɔɔ ahenle mɔɔ hilele nwolɛ anyelielɛ la ka la anu ɛ?
7. Nziezielɛ boni a bɛyɛ mɔɔ bamaa yɛanyia mbuluku wɔ menli mɔɔ yɛ nee bɛ kɛyia la aneɛ mɔɔ bɛka la anu ɛ?
7 Aneɛ Gyɛne Mbuluku: Ɔnle kɛ asafo ne mɔ fa aneɛ gyɛne mbuluku dɔɔnwo sie. Noko akee, saa ɛzonlenlɛ gyima zo neavolɛ ne nwu kɛ menli mɔɔ wɔ aneɛ gyɛne ekpunli bie anu la ɛlɛkile nɔhalɛ ne anwo anyelielɛ a, ɔbahola yealie mbuluku wɔ zɔhane aneɛ ne anu yeamaa nolobɔlɛma ava ali gyima. Saa bɛnlɛ mbuluku zɔhane mɔ bie wɔ asafo ne anu a, bɛbahola bɛahɛla bie. Ɔbahola yeahyɛ na bɛanyia aneɛ bie anu mbuluku. Ɛhye ati, bɛyɛ nziezielɛ mɔɔ bamaa yɛahola yɛanyia mbuluku yɛavi www.watchtower.org la. Bɛva mbuluku bie mɔ mɔɔ wɔ aneɛ dɔɔnwo anu la bɛgua ɛkɛ mɔɔ nolobɔlɛnli ne anzɛɛ anyelielɛnli ne bahola agenga bie a. Ɔda ali kɛ nziezielɛ ɛhye baboa wɔ mekɛ mɔɔ yɛlɛmaa menli mɔɔ ka aneɛ gyɛne mɔɔ kɛhile edwɛkɛ ne anwo anyelielɛ anyia anyuhɔlɛ la.
8. Duzu a asafo ne yɛ fa boa menli mɔɔ ka aneɛ gyɛne la maa bɛ anyelielɛ ne nyia anyuhɔlɛ a?
8 Asafo Ne Moalɛ: Ɔdwu mekɛ ne bie a, ɛleka mɔɔ bɛka maanle gyɛne zo aneɛ dɔɔnwo wɔ ɛkɛ la, ɛnee asafo biala ɛmbikye ɛkɛ ne mɔɔ ka zɔhane aneɛ ne a. Ɛhye ati, ɔwɔ kɛ yɛto ɛsalɛ yɛfɛlɛ menli mɔɔ ka aneɛ gyɛne la yɛmaa bɛba yɛ debiezukoalɛ ne bie. Kɛzi yɛbalie bɛ kɛnlɛma na yɛahile bɛ nwo anyelielɛ la bamaa bɛ anwosesebɛ yeamaa bɛara dahuu. Mɔɔ lumua la, bie a bɛnrɛde aneɛ ne nee ninyɛne bie mɔ abo; noko akee, debie biala ɛnzi nɔhalɛ Keleseɛnema ɛlɔlɛ mɔɔ wɔ Gyihova Alasevolɛ ewiade amuala agɔnwolɛvalɛ ne anu la adenle. (Zɛf. 3:9; Dwɔn 13:35) Ɛkola ɛka aneɛ gyɛne bie kpalɛ ɔ? Saa ɔle zɔ na ɛkulo kɛ ɛkpɔla menli mɔɔ ka zɔhane aneɛ ne la a, ka nwolɛ edwɛkɛ kile wɔ asafo nu kɛlɛhɛlɛvolɛ ne amaa yeabɔ ɔfese ne amaneɛ. Ɛhye baboa wɔ mekɛ mɔɔ ɔfese ne ɛlɛkpondɛ nolobɔlɛnli mɔɔ bamaa bɛ anyelielɛ ne anyia anyuhɔlɛ la.
9. Mekɛ boni a ɔbahyia kɛ bɛmaa nolobɔlɛma sukoa aneɛ bie a, na kɛzi bɛyɛ ɛhye ɛ?
9 Aneɛ Ɛzukoalɛ: Saa ɛlɛboa menli mɔɔ ka aneɛ gyɛne la a, ɔle kpalɛ kɛ ɛbamaa bɛ anwosesebɛ kɛ saa ɔkɛyɛ boɛ a, bɛhɔ debiezukoalɛ wɔ asafo mɔɔ bɛka zɔhane aneɛ ne la anu. Noko akee, saa ɔnrɛyɛ boɛ a, nolobɔlɛma bie mɔ bɛahola azi kpɔkɛ kɛ bɛsukoa zɔhane aneɛ ne amaa bɛahola bɛaboa anyelielɛma mɔɔ wɔ nu la. Saa asafo biala ɛmbikye bɛ a, ɔfese ne bazi kpɔkɛ kɛ kɛmɔ menli mɔɔ ka aneɛ ne anzɛɛ menli mɔɔ wɔ ɛkɛ la anwo zonle la ati, ɔwɔ kɛ bɛmaa menli sukoa zɔhane aneɛ ne. Saa ɔba ye zɔ a, ɔfese ne baha ngyianlɛ ne anwo edwɛkɛ ahile asafo mɔɔ bikye la na bɛayɛ ngyehyɛleɛ bɛamaa bɛabɔ nolo kɛ ɔfese ne ɛlɛmaa bɛahile aneɛ bie. Menli mɔɔ bazukoa aneɛ ne la ɔwɔ kɛ nyia adwenle kɛ bɛwie a bɛbahɔ zɔhane ekpunli ne anzɛɛ asafo ne anu na bɛaboa bɛamaa zɔhane aneɛ ne anyia anyuhɔlɛ.
10. Mekɛ boni a bɛbahola bɛade maanle gyɛne zo aneɛ ekpunli bie a, na kɛzi bɛsi ɛhye anwo kpɔkɛ ɛ?
10 Kɛzi Bɛte Ekpunli Bie La: Amaa bɛade aneɛ ekpunli bie la, ɔwɔ kɛ ninyɛne nna bie da ali. (1) Ɔwɔ kɛ bɛnyia anyelielɛma dɔɔnwo wɔ nu na bɛnwu kɛ zɔhane aneɛ ne banyia anyuhɔlɛ. (2) Ɔwɔ kɛ bɛnyia nolobɔlɛma ekyi mɔɔ bɛte anzɛɛ bɛbazukoa aneɛ ne la. (3) Ɔwɔ kɛ bɛnyia asafo nu kpanyinli anzɛɛ sonvolɛ mɔɔ bɔ mɔdenle mɔɔ bali bɛ nyunlu na yeayɛ debiezukoalɛ ko wɔ aneɛ ne anu wɔ dapɛne ne anu la. (4) Ɔwɔ kɛ bɛnyia mgbanyima eku mɔɔ kulo kɛ bɛte aneɛ ekpunli ne la. Saa bɛkola bɛdi ninyɛne ɛhye mɔ anwo gyima kpalɛ a, mgbanyima eku ne bahɛlɛ ɔfese ne na bɛaha ekpunli ne anwo edwɛkɛ bɛahile bɛ na bɛazɛlɛ nwolɛ adenle kɛ asafo zɔhane a ɛlɛnea aneɛ ekpunli zɔhane azo a. (Nea Organized, m. 106-107.) Asafo nu kpanyinli anzɛɛ sonvolɛ mɔɔ bali ekpunli ne anyunlu la bayɛ “ekpunli zo neavolɛ” anzɛɛ “ekpunli zo sonvolɛ” mɔɔ banlea ekpunli ne azo a.
11. Kɛmɔti a ɔle nwolɛ adenle kɛnlɛma kɛ yɛbamaa maanle gyɛne zo aneɛ mɔɔ wɔ yɛ azɛlɛsinli ne anu la anyia anyuhɔlɛ ɛ?
11 Maanle gyɛne zo aneɛ mɔɔ yɛmaa yɛanyia anyuhɔlɛ wɔ yɛ azɛlɛsinli ne anu la le yɛ ewiade amuala nolobɔlɛ gyima ne mɔɔ Gyisɛse Kelaese, mɔɔ yɛle Neazo manle yɛ, vale ziele ɛkɛ la foa mɔɔ hyia a. Edwɛkɛ ɛhye twe adwenle kɔ maanle gyɛne zo aneɛ zo ɛdeɛ, noko yɛbahola yɛava ngyinlazo mɔɔ wɔ nu la yɛali gyima wɔ mekɛ mɔɔ yɛ nee menli mɔɔ ka maanle ye anu aneɛ gyɛne kɛyia la. Bɛmaa yɛbɔ mɔdenle yɛyɛ yɛ afoa nu ɛdeɛ na yɛnlea kɛzi Gyihova bahɔ zo akpusu maanle maanle ne mɔ na yeamaa bɛ anwonyia ne mɔ apɛ arali ye ɛkɛ la. (Hag. 2:7) Nea kɛzi ahunlundwolɛ wɔ nu maa yɛ kɛ yɛkɛboa kpalɛ wɔ ɛhye ɛyɛlɛ nu a! Ɔrɛla ye kɛ Gyihova bayila mɔdenle mɔɔ yɛlɛbɔ yɛamaa maanle gyɛne zo aneɛ mɔɔ wɔ yɛ azɛlɛsinli ne mɔ anu anyia anyuhɔlɛ wɔ mekɛ mɔɔ dahuu yɛkakye kɛ ɔwɔ nuhua kɛ aneɛ ngakyile nwo ngyegyelɛ wɔ ɛkɛ ɛdeɛ, noko Nyamenle kola maa ɔnyi la!—1 Kɔl. 3:6-9.