YƐ KILISIENE ƐBƐLABƆLƐ
Kɛzi Yɛka Edwɛkɛ Ne Wɔ Azɛlɛsinli Mɔɔ Bɛka Aneɛ Ngakyile Wɔ Nu Anu La
Saa menli te Belemgbunlililɛ nrɛlaleɛ ne wɔ bɛ sua zo aneɛ nu a, bɛ nye die nwolɛ kpalɛ. Bie a ɛhye ati a wɔ Pɛntekɔso 33 Y.M. Gyihova yɛle ngyehyɛleɛ maanle “Dwuuma mɔɔ vi maanle biala anu” la dele edwɛkpa ne wɔ bɛ “sua zo aneɛ” nu, ɔnva nwo kɛ bie a ɛnee bɛte Hibulu anzɛɛ Giliki aneɛ ne la. (Gyi 2:5, 8) Ɛnɛ, wɔ ɛleka mɔɔ bɛka aneɛ ngakyile la, ɔbahola yeara ye kɛ asafo ngakyile mɔɔ asolo biala aneɛ mɔɔ ɔfa ɔyɛ debiezukoalɛ la bayɛ gyima wɔ azɛlɛsinli ko ne ala anu. Kɛzi nolobɔlɛma mɔɔ bɛwɔ asafo ɛhye mɔ anu la bahola aha abɔ nu ali menli ɛhye mɔ kɔsɔɔti daselɛ na mekɛ ko ne ala bɛangɔ bɛ ɛkɛ ne somaa mɔɔ akee bɛnyia bɛ nzo bɔbɔ ɛ?
Kpondɛ folɛdulɛ (Mrɛ 15:22): Ɔwɔ kɛ ɛzonlenlɛ gyima zo neavolɛma mɔɔ wɔ asafo ngakyile ne mɔ anu la di adwelie amaa bɛanwu adenle kpalɛ mɔɔ saa bɛdua zo bɛbɔ edwɛkpa ne nolo a ɔbaboa asafo ne amuala la. Saa bɛ azɛlɛsinli ne ɛnle kpole a, bie a, asafo mɔɔ fa aneɛ gyɛne di daselɛ la ɛnrɛhulo kɛ wɔ asafo ɛdeɛ ne bahɔ awuke mɔɔ bɛka bɛ aneɛ ne wɔ ɛkɛ la anu. Noko akee, saa bɛngola bɛnyɛ bɛ azɛlɛsinli ne anu gyima bɛnwie ɔluakɛ ɔle kpole la ati a, bɛ nye balie nwo kɛ ɛbahɔ awuke zɔhane mɔ anu na saa awie mɔɔ ka bɛ aneɛ ne bie la kile nwolɛ anyelielɛ a, wɔabɔ bɛ amaneɛ. (od 93 ¶37) Bie a, asafo zɔhane bamaa wɔ asafo ɛdeɛ ne aboa bɛ na bɛakpondɛ menli mɔɔ ka bɛ asafo ne aneɛ la na bɛalie bɛ adelɛse mɔɔ bɛbava bɛakpondɛ bɛ nzinlii la. (km 7 /12 5, ɛlɛka) Kakye kɛ, ɔdwu mekɛ ne bie a menli mɔɔ wɔ awuke ko anu la ka aneɛ ngakyile. Saa bɛlɛyɛ ngyehyɛleɛ mɔɔ bamaa bɛahola bɛayɛ azɛlɛsinli ne amuala anu gyima a, ɔwɔ kɛ ɔ nee mɛla biala mɔɔ fale kɛzi bɛfa maanlema anwo edwɛkɛ bɛdi gyima la yia.
Bɛyɛ ko (Ɛf 4:16): Di adehilelɛ biala mɔɔ wɔ ɛzonlenlɛ gyima zo neavolɛ ne bava amaa wɔ la azo. Ɛ nee awie mɔɔ ɔnga wɔ asafo ne aneɛ la ɛlɛsukoa Baebolo ne ɔ? Saa ɛyɛ ngyehyɛleɛ ɛmaa asafo anzɛɛ ekpunli mɔɔ bikye bɛ na bɛka sukoavo ne aneɛ la nee ye toa debiezukoalɛ ne azo a, bie a ɔbanyia anyuhɔlɛ ndɛndɛ.
Siezie ɛ nwo (Mrɛ 15:28; 16:1): Saa ɛkɔto awie wɔ wɔ azɛlɛsinli nu na ɔka aneɛ gyɛne a, bɔ mɔdenle di ye daselɛ. Saa ɛlɛsiezie ɛ nwo wɔamaa daselɛlilɛ a, dimoa dwenle menli mɔɔ ka aneɛ ngakyile mɔɔ ɛbahola wɔayia bɛ la anwo. Akee twe Baebolo anzɛɛ vidio ngakyile wɔ aneɛ zɔhane mɔ anu gua wɔ moba ne azo. Eza ɛbahola wɔalua JW Language app ne azo wɔazukoa ahyebizalɛ wɔ aneɛ bie mɔ anu.