Bɛmaa Bɛ Nwo Anwosesebɛ wɔ Daselɛlilɛ Nu
1 Yɛ muala yɛ nye die kɛ yɛkɛde anwosesebɛmanlɛ “edwɛkɛ mɔɔ bɛkɛha ye wɔ ye adenle zo la.” (Mrɛ. 25:11) Saa yɛ nee mediema kɔ daselɛlilɛ a, kɛzi yɛbahola yɛanlea kɛ yɛ adawubɔlɛ ne bamaa bɛ anwosesebɛ ɛ?
2 Adawubɔlɛ Mɔɔ Maa Anwosesebɛ: Nea kɛzi ɔmaa anwosesebɛ kɛ yɛbava sunsum nu edwɛkɛ yɛaboka yɛ adawubɔlɛ nwo wɔ mekɛ mɔɔ yɛwɔ daselɛlilɛ nu la! (Edw. 37:30) Yɛbahola yɛaha kɛzi yɛbava mbuluku yɛamaa anzɛɛ daselɛlilɛ nu anwubielɛ mɔɔ maa anwosesebɛ mɔɔ yɛnyia ye kenle nsa ye la anwo edwɛkɛ. (Gyi. 15:3) Yɛbahola yɛaha debie mɔɔ yɛ anyelielɛ mɔɔ yɛnwu ye wɔ Baebolo ɛgengalɛ nu, magazine mɔɔ ɛra kenle nsa ye la anu, anzɛɛ asafo debiezukoalɛ bo la anwo edwɛkɛ. Yɛbahola yɛaha bagua nu ɛdendɛlɛ mɔɔ yɛdie ye kenle nsa ye wɔ Belemgbunlililɛ Asalo la noko anwo edwɛkɛ.
3 Saa suamenle bie biza edwɛkɛ bie na yɛangola ɔ nloa ye a, yɛbahola yɛali nwolɛ nyane. Ɔbayɛ nvasoɛ yeamaa yɛ kɛ saa yɛfi sua nu ɛkɛ ne a, yɛkɛva mekɛ ekyi yɛ nee ahenle mɔɔ yɛ nee ye lua la kɛzuzu kɛzi yɛbahola yɛava Reasoning buluku ne yɛali gyinlabelɛ ɛhye anwo gyima wɔ kenle fofolɛ la anwo. Saa yɛ nye liele adenle mɔɔ adiema ne mɔɔ yɛ nee ye hɔle la vale zo dendɛle la anwo a, edwɛkɛ mɔɔ kile anyezɔlɛ mɔɔ yɛbaha wɔ nwolɛ la bamaa ye anwosesebɛ.
4 Yɛ Nwolɛ Debie: Asoo menli bie wɔ yɛ buluku ɛzukoalɛ ekpunli ne anu mɔɔ yɛ nee bɛ ɛtɛkɔle daselɛlilɛ kenle nsa ye ɔ? Saa yɛka yɛkile bɛ kɛ yɛ nee bɛ bahɔ daselɛlilɛ a, “bɛ diedi bamaa yɛ anwosesebɛ, yɛɛ yɛ diedi bamaa bɛ diedi anyi.” (Wulo. 1:12) Dahuu adekpakyelɛma nee adekpakyelɛ boavolɛma anye die kɛ bɛkɛnyia menli mɔɔ nee bɛ kɛhɔ daselɛlilɛ, titile nwonlomɔ ne ala anzɛɛ ɔkɔne nɔsolɛ nu mɔɔ nolobɔlɛma ekyi bie ala a kɔ daselɛlilɛ la. Yɛbahola yɛaboa adekpakyelɛma na yɛ nee bɛ ahɔ daselɛlilɛ. Asoo ɛze nolobɔlɛnli bie mɔɔ ɛnlɛ anwosesebɛ na ɔlua ye kpɔkɛdelɛ ti ɔngola ɔnyɛ dɔɔnwo wɔ daselɛlilɛ nu la ɔ? Saa ɛyɛ ngyehyɛleɛ ɛmaa sonla zɛhae baboka ɛ nwo wɔ mekɛ mɔɔ ɛlɛyɛ Baebolo ɛzukoalɛ la a, ɔbayɛ moalɛ yeamaa bɛ mu nwiɔ.—Mrɛ. 27:17.
5 Nganvolɛ nee edwɛkɛ mɔɔ kile anyezɔlɛ wɔ edwɛkɛ mɔɔ le ekyi bɔbɔ la anwo maa anwosesebɛ dahuu. Saa yɛ nee mediema ɛlɛkɔ daselɛlilɛ a, ɔwɔ kɛ yɛkakye edwɛkɛ ɛhye ɔluakɛ yɛkulo kɛ ‘yɛboa yɛ nwo ngoko na yɛmaa yɛ nwo anwosesebɛ.’—1 Tɛs. 5:11.