Yɛkola Yɛfa Debie Yɛmaa Gyihova
1 Asoo ɛze kɛ menli kola fa debie maa Nyamenle? Ebɛle vale ye nyɛmoa mɔɔ sonle bolɛ la bie bɔle afɔle manle Gyihova, na Nowa nee Dwobu bɔle afɔle ko ne ala bie (Mɔl. 4:4; 8:20; Dwo. 1:5) Nɔhalɛ nu, afɔlebɔlɛ ɛhye mɔ ammaa Bɔvolɛ ne annyia ɔ nwo wɔ adenle biala azo, ɔluakɛ ɔdaye a ɔlɛ debie biala a. Noko afɔlebɔlɛ ne mɔ manle bɛnwunle ɛlɔlɛ kpole mɔɔ ɛnee menli ɛhye mɔɔ lɛ maa Nyamenle la. Ɛnɛ, yɛkola yɛfa yɛ mekɛ, yɛ anwosesebɛ, nee mɔɔ yɛlɛ la yɛdi gyima kɛ ‘afɔlebɔlɛ kpalɛ’ yɛmaa Gyihova.—Hib. 13:15.
2 Mekɛ: Nea kɛzi ɔle kpalɛ kɛ yɛnea yɛ ‘nwo boɛ na yɛtɔ mekɛ’ wɔ ninyɛne mɔɔ ɛngyia la anwo amaa yɛayɛ dɔɔnwo wɔ daselɛlilɛ nu la! (Ɛfɛ. 5:15, 16) Bie a yɛbahola yɛayɛ nzenzaleɛ wɔ yɛ ngyehyɛleɛ ne anu amaa yɛahola yɛayɛ adekpakyelɛ boavolɛ wɔ siane ko anzɛɛ dɔɔnwo anu wɔ ɛvolɛ ne anu. Bie a yɛbahola yɛava mekɛ dɔɔnwo yɛahɔ daselɛlilɛ yɛadɛla mɔɔ yɛyɛ ye dɛba ne la. Saa yɛfa mitini 30 yɛboka mekɛ mɔɔ yɛfa yɛkɔ daselɛlilɛ dapɛne biala la anwo a, yɛbanyia dɔnehwele nwiɔ yɛaboka siane biala ɛdeɛ ne mɔɔ yɛkɔ la anwo!
3 Anwosesebɛ: Saa yɛbanyia anwosesebɛ yɛava yɛayɛ yɛ daselɛlilɛ gyima ne a, ɔwɔ kɛ yɛtwe yɛ nwo yɛfi anyelielɛ ninyɛne nee gyima mɔɔ ɔmaa yɛfɛ somaa na ɔmmaa yɛngola yɛnyɛ dɔɔnwo yɛmmaa Gyihova la anwo. Eza ɔnle kɛ yɛdwenledwenle ninyɛne mɔɔ ɔbamaa yɛayɛ “basaa” na yɛazɛkye anwosesebɛ mɔɔ yɛbahola yɛava yɛazonle Nyamenle la anwo. (Mrɛ. 12:25) Saa debie amgba gyegye yɛ a, nea kɛzi ɔle kpalɛ kɛ yɛkɛva ‘yɛ adesoa ne yɛkɛmaa Gyihova la’!—Edw. 55:22; Fel. 4:6, 7.
4 Mɔɔ Yɛlɛ: Yɛbahola noko yɛava yɛ nwonane afoa nu ninyɛne yɛaboa daselɛlilɛ gyima ne. Pɔɔlo manle ɔ gɔnwo mɔ Keleseɛnema anwosesebɛ kɛ ‘bɛde ezukoa mɔɔ bɛnyia ye la bie bɛdo ahane’, amaa dahuu bɛanyia bie bɛaboa menli mɔɔ hyia la. (1 Kɔl. 16:1, 2) Zɔhane ala a yɛbahola yɛade ezukoa yɛado ahane yɛava yɛaboa yɛ asafo ne anu ngyianlɛ nee ewiade amuala gyima ne a. Gyihova anye sɔ debie ekyi bie ala bɔbɔ mɔɔ yɛfi yɛ ahonle nu yɛye la.—Luku 21:1-4.
5 Gyihova ɛmaa yɛ ninyɛne dɔɔnwo. (Gye. 1:17) Saa yɛfi yɛ ahonle nu yɛfa yɛ mekɛ, yɛ anwosesebɛ nee mɔɔ yɛlɛ la yɛsonle ye a, ɔkile kɛ yɛ nye sɔ mɔɔ yeyɛ yemaa yɛ la. Saa yɛyɛ zɔhane a, ɔsɔ Gyihova anye, “ɔluakɛ Nyamenle kulo sonla mɔɔ te ɔ nyunlu kyɛ debie la.”—2 Kɔl. 9:7.