Kɔ Zo Fa Wuluwuluyɛlɛ Ka Edwɛkɛ Ne

EDWƐKPA ne nolobɔlɛ a le gyima mɔɔ nwolɛ hyia tɛla biala wɔ ewiade ye anu ɛnɛ a. Ɔle enililɛ kɛ yɛbagyinla Gyihova agyakɛ anu yɛayɛ ngilehilelɛ gyima ɛhye. Noko akee, ɔdwu mekɛ ne bie a ɔyɛ se ɔmaa adekpakyelɛma nee nolobɔlɛma kɛ bɛbava wuluwuluyɛlɛ bɛayɛ daselɛlilɛ gyima ne. Duzu ati ɔ?

Nolobɔlɛma bie mɔ kɔ daselɛlilɛ wɔ azua nu a bɛndo menli dɔɔnwo na bɛ nee bɛ ali adwelie. Yɛɛ saa bɛkɔto menli wɔ bɛ azua nu bɔbɔ a, bɛ nye ɛnlie Belemgbunlililɛ edwɛkɛ ne anwo yemɔti bɛfa bɛ nwo ɛya. Nolobɔlɛma bie mɔ noko lɛ azɛlɛsinli kpole yemɔti ɔmaa bɛte nganeɛ kɛ bɛnrɛhola bɛnrɛwie nuhua gyima yɛ ɛlɛ. Akee bie mɔ noko ɛyɛ daselɛlilɛ gyima ne ɛhyɛ noko ɔluakɛ awieleɛ ne ɛtɛbale la ati, bɛ sa nu ɛdo.

Ngyegyelɛ dɔɔnwo wɔ yɛ daselɛlilɛ gyima ne anu mɔɔ bahola aha yɛ mɔdenlebɔlɛ a. Yɛde “ɛtane ewiade” mɔɔ Seetan Abɔnsam a di zolɛ belemgbunli la anu, yemɔti yɛze kɛ edwɛkɛhanlɛ gyima ne bayɛ se kpalɛ.​—1 Dwɔn 5:19.

Ɔnva nwo ngyegyelɛ biala mɔɔ ɛbayia ye wɔ daselɛlilɛ gyima ne anu la, nyia anwodozo kɛ Gyihova baboa wɔ yeamaa wɔali zolɛ konim. Noko, kɛ ɔkɛyɛ na wɔava wuluwuluyɛlɛ wɔali daselɛ ɛ? Bɛmaa yɛnlea nzuzulɛ bie mɔ.

BOA NOLOBƆLƐMA MƆƆ BƐLE FOFOLƐ

Ɛvolɛ biala, bɛsɔne menli dɔɔnwo wɔ Gyihova ahyehyɛdeɛ ne anu. Saa bɔ zo mɔɔ bɛzɔne wɔ a, ɛlɛ dɔɔnwo ɛsukoa ye wɔ mediema mɔɔ bɛva ɛvolɛ dɔɔnwo bɛyɛ daselɛlilɛ gyima ne la ɛkɛ. Saa wɔva ɛvolɛ dɔɔnwo wɔyɛ gyima ne noko a, ɛbahola wɔaboa wɔamaa bɛatete fofolɛma ɔ? Ɛyɛ zɔ a ɛ nye balie kpole.

Ɛnee Gyisɛse ze kɛ ye ɛdoavolɛma ne hyia adehilelɛ na bɛahola bɛahilehile kpalɛ, yemɔti ɔhilele bɛ kɛzi bɛbaha edwɛkɛ ne la. (Luku 8:1) Ɛnɛ noko, menli mɔɔ bɛle fofolɛ la hyia ndetelɛ na bɛahola bɛayɛ daselɛlilɛ gyima ne kpalɛ.

Ɔnle kɛ yɛdwenle kɛ saa nolobɔlɛnli mɔɔ le fofolɛ la kɔ daselɛlilɛ a ɛnee ɔlɛsukoa kɛzi bɛkilehile la. Ɔwɔ kɛ awie mɔɔ bɔ mɔdenle la fi ɛlɔlɛ nu kilehile ye. Ɔwɔ kɛ nolobɔlɛnli mɔɔ bɔ mɔdenle la kilehile ye maa ɔnwu kɛzi (1) bɛsiezie edwɛkɛ mɔɔ bɛbaha bɛahile suamenle, (2) bɛ nee awie di adwelie, (3) bɛmaa mbuluku, (4) bɛsia bɛkɔkpɔla awie mɔɔ ɔ nye die edwɛkɛ ne anwo, na (5) bɛbɔ Baebolo ɛzukoalɛ bo la. Saa nolobɔlɛnli mɔɔ le fofolɛ la sukoa kɛzi nolobɔlɛnli mɔɔ lɛ anwubielɛ la kilehile la a, ɔbahola yeali daselɛ kɛnlɛma. (Luku 6:40) Nolobɔlɛnli fofolɛ ne banyia anwodozo kɛ saa ɔhyia moalɛ a awie baboa ye. Yɛkanvo nolobɔlɛnli fofolɛ ne na yɛmaa ye nzuzulɛ a ɔdaye noko ɔbaboa ye.​—Nolobɔvo ne 4:9, 10.

Ɛ NEE WƆ BOKAVOLƐ NE ƐLI ADWELIE

Ɔnva nwo mɔdenle biala mɔɔ ɛbabɔ kɛ ɛ nee suamenlema bɛali adwelie la, wɔ mekɛ bie mɔ anu bokavolɛ mɔɔ ɛ nee ye lua daselɛlilɛ nu la a ɛbahola ɛ nee ye ali adwelie kpalɛ a. Kakye kɛ Gyisɛse zoanle ye ɛdoavolɛma ne “nwiɔ nwiɔ” kɛ bɛhɔha edwɛkɛ ne. (Luku 10:1) Mekɛ mɔɔ bɛlua nwo bɛlɛka edwɛkɛ ne la, bɛkola bɛmaa bɛ nwo anwosesebɛ. Saa yɛ nee yɛ mediema mrenya nee mraalɛ kɔ daselɛlilɛ a, ‘bɛ diedi maa yɛ anwosesebɛ, yɛɛ yɛ diedi maa bɛ diedi nyi.’​—Wulomuma 1:12.

Ninyɛne boni mɔ a bɛbahola bɛaha nwolɛ edwɛkɛ a? Bɛ nuhua bie ɛnyia anwubielɛ kɛnlɛma kenlensa ye ɔ? Wɔzukoa debie mɔɔ yɛ anyelielɛ la wɔ bɛtianwo anzɛɛ abusua debiezukoalɛ nu ɔ? Edwɛkɛ bie mɔɔ ɛdele ye wɔ debiezukoalɛ bo la manle wɔ anwosesebɛ ɔ? Ɔdwu mekɛ ne bie a, ɛ nee nolobɔlɛnli mɔɔ ɛnze ye kpalɛ la balua. Bie a ɛbahola wɔabiza ye kɛzi ɔrale nɔhalɛ ne anu la. Duzu a manle ɔliele ɔlile kɛ ahyehyɛdeɛ ɛhye le Gyihova ɛdeɛ a? Nwolɛ adenle anzɛɛ anwubielɛ boni a yenyia a? Bie a ɛbahola wɔaha wɔ anwubielɛ ɛdeɛ wɔahile ye. Ɔnva nwo mɔɔ bɛbayɛ ye wɔ edwɛkɛ ne anwo la, saa ɛ nee awie kɔ daselɛlilɛ a, ɔle adenle kpalɛ mɔɔ bɛdua zo “bɛmaa bɛ nwo anwosesebɛ” a.​—1 Tɛsalonaekama 5:11.

YƐ BƐTIANWO DEBIEZUKOALƐ KPALƐ

Saa yɛbahola yɛava mɔdenlebɔlɛ yɛayɛ yɛ daselɛlilɛ gyima ne a, ɔwɔ kɛ yɛyɛ bɛtianwo debiezukoalɛ kpalɛ. ‘Akɛlɛ nɔhavo nee nrɛlɛbɛvolɛ ne’ ɛziezie edwɛkɛtile ngakyile mɔɔ yɛbahola yɛazukoa la. (Mateyu 24:45) Bɛmaa yɛzuzu debie ko mɔɔ yɛbahola yɛava yɛayɛ bɛtianwo debiezukoalɛ la anwo: Duzu ati a edwɛkɛhanlɛ gyima ne anwo hyia ɛ? Ɛlɛka “Duzu Ati A Ɔwɔ Kɛ Ɛfa Wuluwuluyɛlɛ Ɛka Edwɛkɛ Ne Ɛ?” maa yɛnwu deɛmɔti ɔhyia la.

Saa ɛsuzu ninyɛne mɔɔ bɛhile ye wɔ ɛlɛka ne anu la anwo a, ɔbamaa wɔahɔ zo wɔava wuluwuluyɛlɛ wɔaha edwɛkɛ ne. Sukoa noko kɛ ɛbanwu Ngɛlɛlera bie mɔ mɔɔ bamaa wɔabɔ mɔdenle wɔ daselɛlilɛ nu la. Akee dwenledwenle ninyɛne zɔhane mɔ anwo. Saa ɛyɛ ɛhye a ɔbamaa wɔabɔ mɔdenle kpalɛ wɔ daselɛlilɛ nu.

SƆ NDENLE NGAKYILE NEA

Gyihova ahyehyɛdeɛ ne kɔ zo kile yɛ ndenle mɔɔ bamaa yɛanyia anyuhɔlɛ wɔ daselɛlilɛ nu la. Kɛ neazo la, saa yɛye azua nu gyima ne yɛsie ahane a, yɛkola yɛdua kɛlata ɛhɛlɛlɛ, telefuu, kpalɛ zo anzɛɛ bagua nu daselɛlilɛ zo yɛdi daselɛ. Eza yɛdi menli daselɛ wɔ bɛ gyima nu anzɛɛ wɔ mekɛ mɔɔ yɛnle daselɛlilɛ nu la. Yɛbahola yɛayɛ ngyehyɛleɛ yɛaha edwɛkɛ ne wɔ ɛleka mɔɔ Alasevolɛ ekyi bie a wɔ ɛkɛ anzɛɛ bie ɛnle ɛkɛ la noko.

Ɛkulo kɛ ɛsɔ ndenle ngakyile ɛnea ɔ? Menli dɔɔnwo mɔɔ ɛzɔ ndenle ɛhye mɔ ɛnlea la ɛnwu kɛ ɔboa kpalɛ. Suzu neazo nsa ɛhye mɔ anwo nea.

Adiema raalɛ bie mɔɔ bɛfɛlɛ ye April la vale yɛ Belemgbunlililɛ gyima ne anu nzuzulɛ ko mɔɔ fane kɛzi bɛbɔ Baebolo ɛzukoalɛ bo anwo la lile gyima. Ɔhanle ɔhilele menli nsa mɔɔ ɔ nee bɛ yɛ gyima la kɛ ɔ nee bɛ bazukoa debie. April anye liele kɛ menli nsa ne liele dole nu kɛ bɛbazukoa debie na eza bɛbɔle ɔ bo bɛhɔle debiezukoalɛ la.

Eza bɛmaa yɛ anwosesebɛ kɛ yɛkpondɛ menli mɔɔ anye die edwɛkɛ mɔɔ wɔ yɛ magazine ne bie mɔ anu anwo la. Maangyebakyi zo neavolɛ bie mɔɔ wɔ United States la bɔle mɔdenle kɛ ɔbava Awake! nu edwɛkɛ mɔɔ fane taye nwo la yeamaa menli mɔɔ tɔne taye wɔ ɛleka mɔɔ ɔwɔ la. Ɔ nee ɔ ye eza vale edwɛkɛ bie mɔɔ ɔta ɔba mɔɔ se “Understanding Your Doctor” (Te Wɔ Dɔketa Edwɛkɛ Bo) la manle Dɔketama mɔɔ bo 100 la. Ɔse, ɛkpɔlalɛ ɛhye mɔ ɛboa menli ɛmaa bɛnwu yɛ edwɛkɛhanlɛ gyima ne nee yɛ mbuluku ne mɔ. Kɛmɔ maangyebakyi zo neavolɛ ne nee ɔ ye ɛnwu menli mɔɔ wɔ azɛlɛsinli ne anu la kpalɛ la ati, bɛhola bɛyɛ siakɔkpɔla dɔɔnwo.

Adiema raalɛ bie mɔɔ bɛfɛlɛ ye Judy la hɛlɛle ewiade amuala gyima ne ati ɔluakɛ ɛnee ɔ nye die anwosesebɛ mɔɔ bɛva bɛmaa kɛ bɛyɛ telefuu zo daselɛlilɛ la anwo. Ɔhanle kɛ ye mame mɔɔ yeli ɛvolɛ 86 mɔɔ ɔnde kpɔkɛ la ta di menli daselɛ wɔ telefuu zo. Ɔlua ɛhye ati, ɔholale ɔ nee raalɛ bie mɔɔ yenyia ɛvolɛ 92 la bɔle Baebolo ɛzukoalɛ bo!

Nzuzulɛ mɔɔ wɔ yɛ mbuluku ne mɔ anu la boa kpalɛ. Sɔ nea! Bɛbahola bɛaboa wɔ bɛamaa ɛ nye alie na wɔava wuluwuluyɛlɛ wɔali daselɛ.

NYIA BODANE MƆƆ ƐBADWU NWO LA

Duzu a kile kɛ yɛlɛyɛ edwɛkɛhanlɛ gyima ne kpalɛ a? Tɛ mbuluku dodo mɔɔ yɛfa yɛmaa, Baebolo ɛzukoalɛ dodo mɔɔ yɛyɛ, anzɛɛ menli dodo mɔɔ yɛboa bɛ yɛmaa bɛbayɛ Gyihova Alasevolɛ la ɔ. Suzu Nowa anwo nea. Ɛye ye abusua ne ɛsie ahane a, menli nyɛ a Nowa boale bɛ manle bɛzonlenle Gyihova a? Noko, ɔbɔle mɔdenle ɔhanle edwɛkɛ ne. Mɔɔ hyia la a le kɛ yɛbava nɔhalɛlilɛ yɛazonle Gyihova.​—1 Kɔlentema 4:2.

Nolobɔlɛma dɔɔnwo ɛnwu kɛ saa bɛ nye balie edwɛkɛhanlɛ gyima ne anwo a, ɔwɔ kɛ bɛnyia bodane mɔɔ bɛbadwu nwolɛ la. Bodane ɛhye mɔ bie a le boni? Bɛhile ekyi wɔ ɛlɛka “Nyia Bodane Mɔɔ Ɛbahola Wɔadwu Nwo La” anu.

Sɛlɛ Gyihova kɛ ɔboa wɔ ɔmaa wɔ daselɛlilɛ gyima ne ɛyɛ anyelielɛ. Saa ɛdwu wɔ bodane ne mɔ anwo a, ɛ nye balie kɛ ɛlɛbɔ mɔdenle biala wɔabɔ edwɛkpa ne nolo la.

Ɔle nɔhalɛ kɛ edwɛkpa ne nolobɔlɛ bahola ayɛ se. Noko ninyɛne bie mɔ bamaa wɔava wuluwuluyɛlɛ wɔayɛ daselɛlilɛ gyima ne. Ɛ nee awie kɔ daselɛlilɛ a, bɛli adwelie mɔɔ maa anwosesebɛ, yɛ bɛtianwo debiezukoalɛ mɔɔ yɛ anyelielɛ, sɔ nzuzulɛ mɔɔ akɛlɛ nɔhavo nee nrɛlɛbɛvolɛ ne fa maa la nea, na nyia bodane mɔɔ ɛbadwu nwolɛ la. Mɔɔ hyia kpalɛ la, kakye kɛ Gyihova Nyamenle ɛli wɔ eni kɛ ɛbɔ edwɛkpa ne nolo kɛ ɛle ye Dasevolɛ. (Ayezaya 43:10) Nɔhalɛ nu, ɛbɔ mɔdenle wɔ daselɛlilɛ nu a ɛ nye balie kpole!