Yɛ Boavolɛ Kpalɛ Wɔ Daselɛlilɛ Nu
1. Yɛ nee awie kɔ daselɛlilɛ a, nvasoɛ boni a yɛnyia yɛfi nu a?
1 Mekɛ bie anu, Gyisɛse zoanle ɛdoavolɛma 70 kɛ bɛhɔli daselɛ, na “ɔzoanle bɛ nwiɔ nwiɔ.” (Luku 10:1) Ɔda ali wienyi kɛ ngyehyɛleɛ ɛhye manle ɛdoavolɛma ne boale bɛ nwo na bɛmanle bɛ nwo anwosesebɛ wɔ mekɛ mɔɔ bɛlɛka edwɛkɛ ne la. Saa yɛ nee nolobɔlɛnli gyɛne kɔ daselɛlilɛ a, kɛ ɔkɛyɛ na yɛaboa ye ɛ?
2. Saa ahenle mɔɔ ɛ nee ye lua la ɛlɛtendɛ a, kɛzi yɛɛ kɛmɔti a ɔwɔ kɛ yɛtie ɛ?
2 Ɔwɔ Kɛ Yɛtie: Saa ahenle mɔɔ ɛ nee ye hɔle la ɛlɛtendɛ a, tie ye boɛ. (Gye. 1:19) Bɛlɛkenga ngɛlɛlera a, buke wɔ Baebolo ne di bɛ nzi. Saa ahenle mɔɔ ɛ nee ye lua anzɛɛ suamenle ne ɛlɛtendɛ a, nea ye. Saa ɛtie adwelielilɛ ne kpalɛ a, ɔbamaa suamenle ne anwosesebɛ yeamaa ɔdaye noko yeadie.
3. Mekɛ boni a ahenle mɔɔ yɛ nee ye lua la anye balie nwo kɛ yɛkɛdendɛ a?
3 Ɔwɔ Kɛ Yɛnwu Mekɛ Mɔɔ Ɔle Kpalɛ Kɛ Yɛtendɛ La: Saa yɛ nee awie lua na ɔlɛdi daselɛ a, ɔwɔ kɛ yɛdi ye eni na yɛmaa ɔnyia adenle ɔtendɛ. (Wulo. 12:10) Ɔnle kɛ yɛfa yɛ nloa yɛwula nu. Saa ɔ rɛle fi edwɛkɛ mɔɔ ɔkulo kɛ ɔka anzɛɛ suamenle ka edwɛkɛ anzɛɛ biza kpuyia bie na ɔsɛlɛ kɛ yɛboa ye a, yɛbɔ mɔdenle kɛ yɛbaha edwɛkɛ mɔɔ ahenle mɔɔ yɛ nee ye lua ɛlɛka la bie yɛava yɛaboa ye tɛla kɛ yɛkɛha edwɛkɛ fofolɛ. (Mrɛ. 16:23; Nolo. 3:1, 7) Saa yɛlɛtendɛ a, ɔwɔ kɛ yɛ edwɛkɛ ne boa daselɛlilɛ ne mɔɔ yɛlɛdi la.—1 Kɔl. 14:8.
4. Duzu a bamaa yɛ nye alie na yɛ ɛzonlenlɛ gyima ne ali munli a?
4 Mekɛ mɔɔ ɛdoavolɛma nwiɔ nwiɔ 35 ne wiele daselɛlilɛ ne la, ‘bɛvale fɛlɛkolilɛ bɛziale.’ (Luku 10:17) Saa yɛdayɛ noko yɛ nee awie kɔ daselɛlilɛ na yɛnwu mekɛ mɔɔ ɔwɔ kɛ yɛtendɛ la a, yɛ nye balie na yɛ ɛzonlenlɛ gyima ne ali munli.