Asoo Ɔhyia Kɛ Ɛboka Ɛzonlenlɛ Bie Anwo Ɔ?

Baebolo ne bua kɛ

Ɛhɛe, ɔluakɛ Nyamenle kulo kɛ menli yia nu sonle. Baebolo ne ka kɛ: “Bɛmaa yɛzuzu yɛ nwo ngoko, yɛmaa yɛ nwo anwosesebɛ yɛhɔ ɛlɔlɛ nee gyima kpalɛ ɛyɛlɛ nu, bɛmmamaa yɛgyakyi kɛ yɛkɛhɔ yɛ nyianu ne mɔ.”​—Hibuluma 10:24, 25.

Mekɛ mɔɔ Gyisɛse hanle kɛ: “Saa bɛkulo bɛ nwo a​—menli kɔsɔɔti banwu kɛ bɛle me ɛdoavolɛma” la, ɛnee ɔlɛkile kɛ ye ɛdoavolɛma baha abɔ nu kɛ menli ekpunli ko. (Dwɔn 13:35) Adenle titili mɔɔ Kelaese ɛdoavolɛma balua zo ala ɛlɔlɛ ɛhye ali la a le kɛ, bɛ nee bɛ mediema diedima babɔ nu azonle. Bɛbahyehyɛ bɛ kɛ asafo la na bɛayia nu dahuu bɛazonle. (1 Kɔlentema 16:19) Bɛbabɔ nu bɛayɛ ewiade amuala mediema.​—1 Pita 2:​17.

Ɛkɔ Ɛzonlenlɛ Bie Anu Ala A, Ɛnee Ɛtɛwiele

Ɔwɔ nuhua kɛ Baebolo ne ka kɛ ɔwɔ kɛ menli yia nu sonle Nyamenle ɛdeɛ, noko ɔnga kɛ saa awie kɔ ɛzonlenlɛ bie anu ala a, Nyamenle anye balie ɔ nwo. Amaa Nyamenle alie awie ado nu la, ɔwɔ kɛ ye ɛzonlenlɛ mɔɔ ɔwɔ nu la nyia ye ɛbɛlabɔlɛ zo tumi. Kɛ neazo la, Baebolo ne ka kɛ: “Ɛzonlenlɛ mɔɔ anwo te na evinli biala ɛnle nwo wɔ yɛ Ze Nyamenle anyunlu la a le ɛhye: kɛ awie banlea nrisa nee ahunlanvolɛ wɔ bɛ anwongyelelɛ nu na yeahwe ɔ nwo yeavi ewiade ngehanleɛ nwo.”​—Gyemise 1:27.