Duzu Ati A Kilisiene Asɔne Dɔɔnwo Wɔ Ɛkɛ A?

Baebolo ne bua kɛ

Menli dɔɔnwo ɛgyinla Gyisɛse Kelaese ngilehilelɛ zo ɛhyehyɛ “Kilisiene” asɔne dɔɔnwo. Noko akee, Baebolo ne maa ɔda ali kɛ Kilisiene ɛzonlenlɛ ko pɛ a le nɔhalɛ a. Suzu mɔɔ maa yɛka ye zɔ la anu nsa anwo.

1. Gyisɛse hanle kɛ ɔhilehilele “nɔhalɛ ne,” yɛɛ alimoa Kilisienema hilele kɛ bɛ ɛzonlenlɛ ne a le “nɔhalɛ ne” a. (Dwɔn 8:​32; 2 Pita 2:2; 2 Dwɔn 4; 3 Dwɔn 3) Edwɛkɛ ɛhye mɔ maa ɔda ali kɛ menli mɔɔ bɛ ngilehilelɛ nee mɔɔ Gyisɛse hilehilele la ɛnyia la ɛnle nɔhalɛ Kilisienema.

2. Baebolo ne kilehile kɛ ɔwɔ kɛ Kilisienema ‘anloa sɛ bɛ nwo.’ (1 Kɔlentema 1:​10) Noko akee, Kilisiene asɔne ngakyile anloa ɛnzɛ bɛ nwo wɔ ngilehilelɛ mɔɔ fale mɔɔ kile kɛ awie le Kilisienenli la anwo. Asɔne ɛhye mɔ amuala ɛnrɛhola ɛnrɛyɛ nɔhalɛ.​—1 Pita 2:​21.

3. Gyisɛse hanle kɛ menli dɔɔnwo baha kɛ bɛle Kilisienema noko bɛnrɛli ye mɛla zo ɔti ɔbakpo bɛ. (Mateyu 7:​21-​23; Luku 6:​46) Asɔne nu mgbanyima mɔɔ kpondɛ bɛdabɛ mumua ne bɛ boɛyɛlɛ la bɛlɛbɛla menli. (Mateyu 7:​15) Noko akee, bie mɔ kulo kɛ bɛyɛ Kilisienema ɔluakɛ ɔmaa bɛte ngilehilelɛ mɔɔ bɛkulo la na tɛ mɔɔ Baebolo ne kilehile la.​—2 Timote 4:​3, 4.

Wɔ Gyisɛse hwiiti nee ndile nwo ndonwo ne anu, ɔhanle kɛ menli bade atua kpole (kpɔkyevolɛma) atia nɔhalɛ Kilisiene Ɛzonlenlɛ. (Mateyu 13:24-​30, 36-​43) Bɛnrɛnwu ngakyile mɔɔ wɔ nɔhalɛ Kilisienema nee adalɛ Kilisienema avinli wɔ mekɛ tendenle. Gyisɛse hanle kɛ kpɔkyevolɛma banyia anyunluhɔlɛ wɔ ɛzoanvolɛma ne ewule nzi. (Gyima ne 20:29, 30) Ɔwɔ nu kɛ menli mɔɔ ɛkpɔkye la ngilehilelɛ gua ye ngakyile ɛdeɛ, noko Kilisienema ɛhye mɔ “ɛhwe bɛ nwo ɛvi nɔhalɛ ne anwo.”​—2 Timote 2:​18.

Gyisɛse eza hanle kɛ awieleɛ bɔkɔɔ ne ngakyile mɔɔ wɔ nɔhalɛ nee adalɛ Kilisienema avinli la bala ali wienyi. Ɛhye ɛra nu wɔ yɛ mekɛ ye azo, wɔ “mekɛ ɛhye awieleɛ ne” anu.​—Mateyu 13:30, 39.