Asoo Asɔne Kɔsɔɔti Le Ko Ɔ? Asoo Nyamenle Die Ɔ Muala To Nu Ɔ?

Baebolo ne bua kɛ

Kyɛkyɛ, asɔne ne amuala ɛnle ko. Asɔne mɔɔ ɛnzɔ Nyamenle anye la anwo neazo dɔɔnwo wɔ Baebolo ne anu. Ɛhye mɔ gua ye ekpunli nwiɔ.

Ekpunli 1: Adalɛ nyamenle mɔɔ bɛsonle bɛ

Baebolo ne fa edwɛkɛ agbɔkɛ ɛhye mɔ ka adalɛ nyamenle mɔɔ bɛsonle bɛ la anwo edwɛkɛ kɛ, “bɛle mgbane,” “adalɛ” yɛɛ “nvasoɛ ɛnle zo.” (Gyɛlɛmaya 10:3-5; 16:19, 20) Gyihovaa Nyamenle maanle Yizilayɛma mɛla kɛ: “Bɛmmasonle nyamenle gyɛne biala kɛ me ngome ala.” (Adendulɛ 20:3, 23; 23:24) Mɔɔ Yizilayɛma zonlenle nyamenle gyɛne la, “[Gyihova] vale bɛ nwo ɛya.”​—Ɛdianlɛ 25:3; Sɛlɛvolɛma 20:2; Maanlebuvolɛma 2:13, 14.

Adwenle ko ne ala a Nyamenle tɛdɛ ye wɔ “nyamenle bie mɔ” mɔɔ bɛsonle bɛ la anwo a. (1 Kɔlentema 8:5, 6; Galeehyeama 4:8) Yeva mɛla yemaa menli mɔɔ kulo kɛ bɛsonle ye la kɛ bɛhwe bɛ nwo bɛvi menli mɔɔ fa bɛ nwo wula adalɛ ɛzonlenlɛ nu la anwo, ɔse: “Bɛgyakyi bɛ na bɛhwe bɛ nwo bɛvi bɛ nwo.” (2 Kɔlentema 6:14-17) Saa asɔne kɔsɔɔti le ko na ɔkile menli adenle ɔmaa bɛba Nyamenle ɛkɛ a, ɛnee duzu ati a ɔvale mɛla ɛhye ɔmaanle a?

Ekpunli 2: Bɛsonle nɔhalɛ Nyamenle ne wɔ adenle mɔɔ ɔnlie ɔndo nu la azo

Ɔdwu mekɛ ne bie a, Yizilayɛma gyinla diedi nee nyɛleɛ mɔɔ bɛzukoale bɛvile adalɛ nyamenle ɛzonlenlɛma ɛkɛ ne la azo bɛzonlenle Nyamenle, noko Gyihova anlie mɔdenle mɔɔ bɛbɔle kɛ bɛfa adalɛ ɛzonlenlɛ bɛaboka nɔhalɛ ɛzonlenlɛ nwo la ando nu. (Adendulɛ 32:8; Mɛla ne 12:2-4) Gyisɛse buale ye mekɛ zo ɛzonlenlɛ nu mgbanyima ne mɔ fɔlɛ ɔlua adenle mɔɔ ɛnee bɛdua zo bɛsonle Nyamenle la anwo; wɔ menli nye zo ɛnee ɔle kɛ asɛɛ bɛlɛsonle, noko bɛ nabalaba nyɛleɛ ti, “bɛbu bɛ nye bɛgua ninyɛne mɔɔ hyia kpalɛ wɔ mɛla ne anu, mɔɔ fane pɛlepɛlelilɛ, anwunvɔnezelɛ, yɛɛ nɔhalɛlilɛ nwo la azo.”​—Mateyu 23:23.

Ɛnɛ noko, asɔne mɔɔ kilehile nɔhalɛ ne la ala a kile menli adenle kɔ Nyamenle ɛkɛ a. Nɔhalɛ ɛhye wɔ Baebolo ne anu. (Dwɔn 4:24; 17:17; 2 Temɔte 3:16, 17) Asɔne mɔɔ bɛ ngilehilelɛ ne ɛngyi Baebolo ne azo la twe menli fi Nyamenle anwo. Bɛnyianle ngilehilelɛ dɔɔnwo mɔɔ menli dwenle kɛ ɔwɔ Baebolo ne anu le kɛ Nsa-ko Nyamenle, ɛkɛla mɔɔ ɛnwu nee dahuu amaneɛnwunlɛ bɛvile bɛdabɛ mɔɔ bɛsonle adalɛ nyamenle la ɛkɛ. Ɛzonlenlɛ mɔɔ kilehile ngilehilelɛ ɛhye mɔ la le “mgbane” anzɛɛ nvasoɛ ɛnle zo, ɔluakɛ bɛfa asɔne nu amaamuo bɛsie mɔɔ Nyamenle kulo kɛ yɛyɛ la agyakɛ anu.​—Maake 7:7, 8.

Nyamenle kyi nabalaba ɛzonlenlɛ. (Taetɛse 1:16) Amaa menli abikye Nyamenle la, ɔwɔ kɛ ɛzonlenlɛ ka yɛ ɛbɛlabɔlɛ kɔsɔɔti na ɔnle kɛ ɔyɛ amaamuo bie anzɛɛ debie mɔɔ yɛyɛ ala la. Kɛ neazo la, Baebolo ne ka kɛ: “Saa awie dwenle kɛ ɔsonle Nyamenle na ɔmmua ɔ nloa azo a, ye Nyamenlezonlenlɛ ne le mgbane, na ɔbɛlɛbɛla ɔdaye ye ɛkɛla. Nyamenlezonlenlɛ kpalɛ mɔɔ evinli biala ɛnle nwolɛ wɔ Nyamenle Selɛ ne anyunlu la a le kɛ ɛkɛkpɔla nrisa nee ahunlanvolɛ wɔ bɛ anwongyelelɛ nu, ɛkɛboa bɛ na ɛkɛzie ɛ nwo gyɛlɛɛnye mɔɔ ewiade amra ɛnnyia ɛ nwo ngehanleɛ biala la.” (Gyemise 1:26, 27) King James Version ne fa edwɛkpɔkɛ “ɛzonlenlɛ mɔɔ anwo te” di gyima wɔ ɛzonlenlɛ mɔɔ anwo te mɔɔ nabalaba biala ɛnle nu la.