Asoo Anzodwolɛ Nwo Mɔdenlebɔlɛ Bahola Ava Anzodwolɛ Ara Ewiade Ɔ?

Konle nee basabasayɛlɛ ɛbu zo wɔ ewiade ye anu. Ɔlua ɛhye ati, United Nations nee eku ngakyile mɔɔ bɔ anzodwolɛ nwo mɔdenle la bɔ nu yɛ gyima na bɛmaa menli kɔ ɛleka mɔɔ basabasayɛlɛ ɛlɛkɔ zo la. Bɛ bodane a le kɛ bɛmaa anzodwolɛ ara ɛleka ɛhye mɔ. UN Secretary-General António Guterres ka kɛ, “Menli ɛhye mɔ mɔɔ United Nations maa bɛkɔ ɛleka ngakyile la a bɛlɛdua bɛ nwo zo bɛamaa anzodwolɛ ara ewiade ye anu a.”

Mɔdenle mɔɔ bɛlɛbɔ bɛakpondɛ anzodwolɛ la ɛmaa anzodwolɛ ɛra ɛleka bie mɔ wɔ ɛvolɛ dɔɔnwo anu. Kɛ neazo la, bɛbɔ maanlema anwo bane, bɛboa tutanema bɛmaa bɛzia bɛhɔ bɛ maanle nu, bɛva aleɛ nee ninyɛne bɛmaa menli yɛɛ bɛboa menli bɛmaa bɛzia bɛsisi bɛ azua bieko. Noko menli mɔɔ bɔ mɔdenle kpondɛ anzodwolɛ la yia ngyegyelɛ bie mɔ mɔɔ ɔmmaa bɛngola bɛnyɛ bɛ gyima ne kpalɛ la. Asoo mekɛ bie ngyegyelɛ kɔsɔɔti bavi ɛkɛ amaa anzodwolɛ ara ewiade amuala ɔ? Duzu a Baebolo ne ka a?

Ngyegyelɛ mɔɔ bɛyia nee mɔɔ Baebolo ne ka la

Mrenyia nwiɔ mɔɔ ɛbɛka bɛ sa na bɛhakyi bɛ nye la anwo nvoninli.

Ngyegyelɛ ne: bɛ adwenle ɛnyia. Ɔnla aze kɛ sogyama nee eku ngakyile mɔɔ bɛvi maanle gyɛne zo la babɔ nu ayɛ gyima. Ɔyɛ a, bɛngola bɛmbɔ nu bɛnyɛ gyima kpalɛ ɔluakɛ bɛ nloa ɛnzɛ bɛ nwo yɛɛ asolo mɔɔ bɛkulo kɛ bɛyɛ la.

Mɔɔ Baebolo ne ka la: ‘Anwuma Nyamenle ne bava belemgbunlililɛ bie azie ɛkɛ. Ɔbabɔ arelemgbunlililɛ ɛhye mɔ amuala, sonla arane ngakyile ne mɔ abo zo, na ɔ ngomekye a ɔbagyinla ɛkɛ ne dahuu a.’—Daneɛle 2:44.

Ɔnrɛhyɛ, Nyamenle bamaa bagyakyi konle biala na yeamaa anzodwolɛ ara ewiade amuala. (Edwɛne 46:8, 9) Ɔbava arane kokye mɔɔ yemɔ a le Nyamenle Belemgbunlililɛ ne la yeazie arane ngakyile mɔɔ wɔ azɛlɛ ye azo la agyakɛ anu. Saa anwuma arane kokye mɔɔ di munli la ɛlɛnea ewiade mɔɔ konle ɛnle nu la azo a, yɛnrɛhyia alesama mɔɔ bɛkpondɛ anzodwolɛ la anwo.

Ɛlɛka mɔɔ ɛhwee ɛnle nu la anwo nvoninli.

Ngyegyelɛ ne: ezukoa nee menli mɔɔ bahola ayɛ gyima ne la anzo. Anzodwolɛ nwo mɔdenlebɔlɛ hyia menli, ezukoa nee ninyɛne gyɛne, kɛmɔ bɛnda bɛnnyia menli nee ezukoa la ati, ɔmmaa bɛngola bɛnyɛ bɛ gyima ne kpalɛ. Eza tɛnlabelɛ mɔɔ bɛkɔdi nwolɛ gyima la bie mɔ anu yɛ se kpalɛ yɛɛ ɔyɛ a ɔfa bɛ ngoane ɔto esiane nu.

Mɔɔ Baebolo ne ka la: ‘Yɛ Awulae Gyisɛse Kelaese Nyamenle ne maanle Gyisɛse dɛnlanle ɔ sa fema zo wɔ anwuma lɔ, ɛleka mɔɔ tɛla arane nee tumivolɛma nee anwosesebɛ biala la.’—Ɛfɛsɛsema 1:17, 20, 21.

Nyamenle Tumivolɛ Bedevinli Gyihovaa ɛva debie biala mɔɔ Gyisɛse hyia nwo amaa yeali tumi la ɛmaa ye. (Daneɛle 7:13, 14 b) Nyamenle ɛva tumi kpole, ndelebɛbo, nrɛlɛbɛ nee nwunu kpole mɔɔ sonla arane anzɛɛ eku biala ɛnlɛ bie la ɛmaa Gyisɛse. (Ayezaya 11:2) Eza Gyisɛse lɛ anwumabɔvolɛma ɛlɔne dɔɔnwo. (Yekile 19:14) Tɛnlabelɛ biala ɛnyɛ se somaa ɛmmaa ye anzɛɛ ɛmbo ɔ nwo zo.

Gyisɛse bava tumi ne mɔɔ Nyamenle ɛva ɛmaa ye la nee anwumabɔvolɛma yeali gyima kpalɛ yeaye konle yeavi ɛkɛ na yeayɛ ninyɛne gyɛne yeaboka nwo. Ɔbamaa awie biala anyia anzodwolɛ nee banebɔlɛ wɔ Nyamenle Belemgbunlililɛ ne anu.—Ayezaya 32:17, 18.

Ngyegyelɛ ne: mɛla nwo edwɛkɛ. Ɔyɛ a menli mɔɔ bɛkpondɛ anzodwolɛ la ɛngola ɛnyɛ bɛ gyima ne kpalɛ ɔluakɛ bɛnnyia adehilelɛ mɔɔ anu la ɛkɛ la anzɛɛ bɛngola bɛngɔ ɛleka bie mɔ. Ɛhye ɛmmaa bɛngola bɛmbɔ menli nwo bane kpalɛ anzɛɛ bɛnyɛ mɔɔ bɛkpondɛ kɛ bɛyɛ la.

Mɔɔ Baebolo ne ka la: “Bɛva tumi muala bɛmaa [Gyisɛse] wɔ anwuma nee azɛlɛ ye azo.”—Mateyu 28:18.

Nyamenle ɛmaa Gyisɛse adehilelɛ mɔɔ anu la ɛkɛ la nee tumi muala kɛ ɔva anzodwolɛ ɔrɛla ewiade amuala. (Dwɔn 5:22) Gyisɛse bava pɛlepɛlelilɛ ayɛ gyima yɛɛ ɔnrɛsisi awie. (Ayezaya 11:3-5) Ɛhye ati, Baebolo ne fɛlɛ Gyisɛse kɛ “Anzodwolɛ Belemgbunli,” mɔɔ ɔbali tumi wɔ “pɛlepɛlelilɛ nee tenleneyɛlɛ” nu la.—Ayezaya 9:6, 7.

Nyamenle Belemgbunlililɛ ne bamaa anzodwolɛ mɔɔ di munli la ara

Menli mɔɔ bɛkpondɛ anzodwolɛ la bahola amaa anzodwolɛ ekyi ara anzɛɛ bie a bɛbamaa basabasayɛlɛ bo apɛ wɔ maanle bie azo. Noko bɛnrɛhola bɛnrɛye menli nwo ɛkpɔlɛ mɔɔ fa basabasayɛlɛ ba la bɛnrɛvi ɛkɛ.

“Nɔhalɛ edwɛkɛ ne a le kɛ anzodwolɛ biala ɛnle ɛkɛ mɔɔ ɔwɔ kɛ bɛbɔ nwolɛ bane a.”—Dennis Jett, ɛnee ɔle U.S. arane ne agyakɛnugyinlavolɛ.

Noko akee, Nyamenle Belemgbunlililɛ ne bamaa anzodwolɛ mɔɔ di munli la ara ɔluakɛ ɔmaa menli ye ɛkpɔlɛ fi bɛ ahonle nu. Kɛ neazo la, mɔɔ Gyisɛse wɔ azɛlɛ ye azo la, ɔluale ye edwɛkɛ nee ye nyɛleɛ zo ɔhilele menli kɛzi bɛbakpondɛ anzodwolɛ na bɛala ɛlɔlɛ ali la:

“Anyelielɛ a le bɛdabɛ mɔɔ bɛkpondɛ anzodwolɛ la.”—Mateyu 5:9.

“Kulo ɛ gɔnwo kɛ ɛ nwo.”—Maake 12:29-31.

“Sia fa wɔ dadeɛ ne wula ɔbo zo ne, ɔluakɛ bɛdabɛ mɔɔ bɛtwe dadeɛ la kɔsɔɔti bawu dadeɛ nloa.”—Mateyu 26:52.

“Mɔɔ bɛbɔ [Gyisɛse] aholoba la, yeambɔ bɛ bie. Mɔɔ ɔnwu amaneɛ la yeanwunlonwunla awie.”—1 Pita 2:23.

Gyisɛse eza hanle kɛ menli banwu Nyamenle Belemgbunlililɛ ne maanlema kɛ bɛkulo awie mɔ. Baebolo ne ka kɛ menli mɔɔ bɛkpɔ awie mɔ la ɛnrɛnyia Nyamenle Belemgbunlililɛ ne:

“Saa bɛkulo bɛ nwo a menli kɔsɔɔti banwu kɛ bɛle me ɛdoavolɛma.”—Dwɔn 13:34, 35.

“Awie biala mɔɔ kpɔ ɔ diema la le kodiawu.”—1 Dwɔn 3:15.

“Awie biala mɔɔ kulo Nyamenle la ɔwɔ kɛ kulo ɔ diema noko.”—1 Dwɔn 4:20, 21.

Gyihova Nyamenle mɔɔ bɔle alesama la angomekye a ze adenle kpalɛ mɔɔ ɔbalua zo yeamaa anzodwolɛ ara ewiade amuala a. Ye Belemgbunlililɛ ne bahola ayɛ ninyɛne mɔɔ alesama, mɔɔ bie a le menli mɔɔ kpondɛ anzodwolɛ angola anyɛ la.

a Nyamenle duma a le Gyihova. (Edwɛne 83:18) Nea edwɛkɛ “Gyihova A Le Nwane?”

b Wɔ Daneɛle 7:13, 14, edwɛkɛkpɔkɛ “sonla ra” gyi ɛkɛ maa Gyisɛse Kelaese.—Mateyu 25:31; 26:63, 64.

Ɛnɛ bɔbɔ, Nyamenle Belemgbunlililɛ ne ɛmaa anzodwolɛ ɛdɛnla menli avinli na bɛyɛ ko

Kenle bie, saa Nyamenle Belemgbunlililɛ ne ɛlɛdi tumi wɔ azɛlɛ ye azo a, alesama amuala bayɛ ko na bɛadɛnla anzodwolɛ nu ɔluakɛ bɛbava Nyamenle mɛla bɛabɔ bɛ ɛbɛla. (Ayezaya 2:4; 11:9) Nyamenle Belemgbunlililɛ ne ɛlɛdi tumi wɔ anwuma, na kɛkala bɔbɔ ye ngilehilelɛ ne ɛlɛboa menli yeamaa bɛadɛnla anzodwolɛ nu na bɛayɛ ko.

Nea vidio Kenlenzu A Ɛhulolɛ Kpundii Bali Ɛkpɔlɛ Nwo Zo Konim A? amaa wɔanwu kɛzi Baebolo ne boale mrenyia nwiɔ maanle bɛyele menli nwo adwenle ɛtane bɛvile bɛ ahonle nu ɔnva nwo kɛ Dwuuma nee Arelabema ɛnga la.

Nea vidio Agbɔvolɛ Mɔɔ Rayɛle Agɔnwolɛma la amaa wɔanwu kɛzi Baebolo ne boale nrenyia bie mɔɔ ɛnee le nwulema kpanyinli la nee kpolisinli bie mɔɔ ɛkpɔlɛ ɛyi ye ahonle la maanle bɛrayɛle agɔnwolɛma la.