BAEBOLO KPUYIA MƆƆ BƐBUA
Duzu ati a anzondwolɛ ɛnle ewiade anu ɛ?
Tumililɛ mɔɔ bahola ahakyi menli subane la a bamaa anzondwolɛ ara ewiade a
Baebolo ne kile kɛ ninyɛne titile nwiɔ bie ati ɔ. Mɔɔ lumua la, alesama ɛhola ɛyɛ ninyɛne ɛzulolɛ dɔɔnwo ɛdeɛ, noko bɛambɔ bɛ kɛ bɛhile bɛ nwo adenle. Mɔɔ tɔ zo nwiɔ, alesama nzuzulɛ anyɛ boɛ ɔluakɛ Seetan ‘Abɔnsam a nea ewiade ɛhye azo a.’ Ɛhye ati alesama mɔdenlebɔlɛ ɛngola ɛmmaa anzondwolɛ ɛmmaa ewiade.—Kenga Gyɛlɛmaya 10:23; 1 Dwɔn 5:19.
Alesama angomedi nee anyebolo noko ɛmmaa yɛnyia anzondwolɛ wɔ ewiade. Ewiade tumililɛ mɔɔ bahola ahilehile menli kɛ bɛhulo kpalɛ na bɛlɔ bɛ nwo la a bamaa anzondwolɛ ara ewiade a.—Kenga Ayezaya 32:17; 48:18, 22.
Nwane a bamaa anzondwolɛ ara azɛlɛ ye azo a?
Tumivolɛ Bedevinli Nyamenle ne ɛbɔ ɛwɔkɛ kɛ ɔbamaa tumililɛ kokye ali alesama kɔsɔɔti anwo zo tumi. Ɔbagyinla dasanli tumililɛ kɔsɔɔti gyakɛ anu. (Daneɛle 2:44) Gyisɛse, Nyamenle Ara ne, bali tumi kɛ Anzondwolɛ Belemgbunli. Ɔbaye ɛtaneyɛlɛ yeavi azɛlɛ ye kɔsɔɔti azo na yeahilehile menli anzondwolɛ adenle.—Kenga Ayezaya 9:6, 7; 11:4, 9.
Kɛkala, wɔ Gyisɛse adehilelɛ bo, menli mgbe dɔɔnwo mɔɔ wɔ ewiade la ɛlɛfa Nyamenle Edwɛkɛ, Baebolo ne ahilehile menli kɛzi bɛ nee awie mɔ badɛnla anzondwolɛ nu la. Ɔnrɛhyɛ anzondwolɛ bara ewiade ye anu.—Kenga Ayezaya 2:3, 4; 54:13.