SUKOA GYISƐSE
Anzodwolɛ Bara Ewiade Amuala
Awie biala kpondɛ ewiade mɔɔ anzodwolɛ wɔ nu la. Wɔ ɛvolɛ dɔɔnwo anu, ewiade tumivolɛma ɛbɔ mɔdenle kɛ bɛye konle konle bɛavi ɛkɛ amaa anzodwolɛ ara. Ɔdwu mekɛ ne bie a, bɛ mɔdenlebɔlɛ ne fa anzodwolɛ ekyi ba. Noko, ɔngyɛ ɛnee bɛlɛko bieko. Asoo anzodwolɛ bara ewiade amuala ɔ? Ɛhɛe! Maa yɛnlea mɔɔ yɛbahola yɛazukoa yɛavi Gyisɛse ɛkɛ ne la.
Mɔɔ Gyisɛse bayɛ la
Baebolo ne ka mɔɔ ɔnrɛhyɛ Gyisɛse bayɛ yeamaa anzodwolɛ ara ewiade amuala la.
“Bɛbavɛlɛ [Gyisɛse] . . . Anzodwolɛ Belemgbunli. Ye tumililɛ ne anu badɛlɛ na anzodwolɛ mɔɔ ɛnlɛ awieleɛ la bara.” (Ayezaya 9:6, 7) Gyisɛse mɔɔ le Nyamenle Belemgbunlililɛ ne azo Belemgbunli la, bamaa anzodwolɛ mɔɔ ɛnlɛ awieleɛ la ara ewiade amuala.
“Ɔbalie ehyianli mɔɔ su kpondɛ moalɛ . . . nee mɔɔ ɛnlɛ boavolɛ la.” (Edwɛne 72:12-14) Gyisɛse banlea kɛ menli bali pɛlepɛle, na yeamaa konle, basabasayɛlɛ ne amaneɛnwunlɛ biala avi ɛkɛ.
“Maanle bie ɛnrɛva konle dadeɛ ɛnrɛra maanle gyɛne nwo zo, yɛɛ bɛnrɛzukoa konle ɛhonlɛ bieko.” (Ayezaya 2:4) Wɔ Gyisɛse tumililɛ ne anu, alesama ɛnrɛzukoa konle ɛhonlɛ bieko, emomu bɛbazukoa ninyɛne mɔɔ fa anzodwolɛ ba la.
Saa ɛkulo kɛ ɛsukoa kɛzi Gyisɛse bamaa anzodwolɛ ara kenle bie nee kɛzi ɛbanyia zolɛ nvasoɛ la anwo edwɛkɛ dɔɔnwo a, nea vidio Duzu A Le Nyamenle Belemgbunlililɛ Ne?
Mɔɔ Gyisɛse hilehilele la
Ɛnɛ bɔbɔ, Gyisɛse ngilehilelɛ ne ɛlɛboa menli mgbe dɔɔnwo yeamaa bɛadɛnla anzodwolɛ nu. Wɔ ye Boka Zo Ɛdendɛlɛ Ne mɔɔ ɛlie duma la anu, Gyisɛse hilehilele ninyɛne bie mɔɔ baboa menli yeamaa bɛadɛnla anzodwolɛ nu la. Maa yɛzuzu nuhua ekyi anwo yɛnlea.
“Anyelielɛ a le bɛdabɛ mɔɔ bɛkpondɛ anzodwolɛ la.” (Mateyu 5:9) Gyisɛse hanle hilele ye ɛdoavolɛma kɛ bɛhwe bɛ nwo bɛvi konle nwo na bɛkpondɛ anzodwolɛ.
“Dimoa ɛ nee ɛ diema ne ɛziezie bɛ avinli na ɛsia ɛba a, akee wɔabɔ wɔ afɔle ne.” (Mateyu 5:23, 24) Gyisɛse dule ye tievolɛma folɛ kɛ saa bɛ nee awie nyia edwɛkɛ a bɛziezie bɛ avinli ndɛndɛ. Ɔhilehilele bɛ kɛ saa yɛ nee Nyamenle banyia agɔnwolɛvalɛ kpalɛ a, ɔwɔ kɛ yɛ nee awie mɔ tɛnla anzodwolɛ nu.
“Bɛgyakyi ndɛnebualɛ na bɛambua bɛ ndɛne.” (Mateyu 7:1) Gyisɛse bɔle yɛ kɔkɔ kɛ ɔnle kɛ yɛtendɛ yɛtia awie mɔ anzɛɛ yɛbua bɛ ndɛne ɔluakɛ ɔkola ɔfa konle ɔba. Emomu, Gyisɛse hilehilele ye ɛdoavolɛma kɛ bɛmmafa bɛ adwenle bɛsie awie mɔ nvonleɛ zo, na ‘bɛhɔ zo bɛva bɛ gɔnwo mɔ ɛtane bɛhyɛ bɛ’.—Luku 6:37.
Menli dɔɔnwo ɛlɛfa Gyisɛse ngilehilelɛ ne ayɛ gyima ɛnɛ. Saa basabasayɛlɛ anzɛɛ mgbakyemgbakye ɛlɛkɔ zo a, bɛsukoa kɛ bɛnrɛva ɛya bɛnrɛli nwolɛ gyima, eza bɛfa ɛtane bɛkyɛ na bɛda ɛlɔlɛ ali saa bɔbɔ awie nee bɛ anli ye boɛ a.
Saa ɛkulo kɛ ɛnwu kɛzi Gyisɛse ngilehilelɛ ne ɛboa ɛmaa menli bie mɔ ɛmaa bɛnyia anzodwolɛ la a, nea edwɛkɛ “Finding Peace Despite War and Violent Conflict.”