Duzu Ati A Menli Ɛnla Subane Kpalɛ Ali A?​—⁠Duzu A Baebolo Ne Ka A?

Menli subane ɛlɛsɛkye. Wuliravolɛma mɔɔ ɛmbu debie la teɛdea dɔketama nu; menli mɔɔ kɔdi aleɛ wɔ aleɛlilɛleka la ɛmbu gyimayɛvoma mɔɔ wɔ ɛkɛ la; adenduvoma mɔɔ ɛnlɛ subane la nee menli mɔɔ yɛ gyima wɔ alopile nu la ko, ngakula mɔɔ anzo yɛ se la golo kilehilevolɛma anwo, bɛnwunlonwunla bɛ na bɛ nee bɛ ko; yɛɛ maanyɛlɛma bie mɔ yɛ debie mɔɔ ɛnle kpalɛ la, bie mɔ noko bu bɛ nwo kɛ bɛ subane le kpalɛ tɛla awie mɔ.

Baebolo ne ala a maa yɛnwu subane mɔɔ le kpalɛ a. Eza ɔkile deɛmɔti menli ɛnla subane kpalɛ ali ɛnɛ la.

Duzu Ati A Menli Ɛnla Subane Kpalɛ Ali A?

Bɛnwu menli subane mɔɔ ɛlɛsɛkye la wɔ ewiade ɛleka biala.

• Americama bie mɔɔ bɛbizebizale bɛ edwɛkɛ kenlensa ye la hanle kɛ ɛnɛ menli mɔɔ wɔ United States la subane ɛzɛkye ɛdɛla ɛvolɛ 22 mɔɔ ɛze ɛhɔ la.

• Eza menli mɔɔ bo 32,000 mɔɔ bɛbizebizale bɛ edwɛkɛ wɔ maanle 28 anu la anu ɛya ko ngyɛnu 65 hanle kɛ ɛnɛ a le mekɛ mɔɔ bɛnwu kɛ menli ɛnla subane kpalɛ ali a.

Baebolo ne hanle subane mɔɔ menli da ye ali ɛnɛ la anwo edwɛkɛ dole ɛkɛ.

• ‘Wɔ mekɛ mɔɔ li awieleɛ la anu, mekɛ mɔɔ anu yɛ se la bara. Menli bahulo bɛ ngome bɛ nwo, bɛbahulo ezukoa, bɛbayɛ adubɛnwo, anwomemaazo, bɛbaha munzule edwɛkɛ, bɛbayɛ awovolɛ nwo anzosesebɛ, boniayɛma, menli mɔɔ ɛngomo bɛ nwo zo yɛɛ menli mɔɔ anwo yɛ ɛzulolɛ la.’​—2 Timote 3:1-3.

Amaa wɔanwu kɛzi ngapezo ɛhye ɛlɛba nu anwo edwɛkɛ dɔɔnwo la, kenga edwɛkɛ “Did the Bible Predict the Way People Think and Act Today?”

Debie mɔɔ maa yɛnyia subane kpalɛ la

Wɔ ewiade ɛhye mɔɔ menli subane ɛlɛsɛkye wɔ nu la anu, menli mgbe dɔɔnwo ɛnwu kɛ Baebolo ne bahola aboa bɛ yeamaa bɛanyia subane kpalɛ. Nuhua folɛdulɛ ne le mɔɔ “bɛkola bɛfa bɛ nwo bɛto zo mekɛ biala, ɛnɛ nee dahuu” a. (Edwɛne 111:8) Neazo bie mɔ ɛne:

• Mɔɔ Baebolo ne ka la: “Debie biala mɔɔ bɛkulo kɛ menli yɛ maa bɛ la, bɛdabɛ noko bɛyɛ ye zɔhane ala bɛmaa bɛ.”​—Mateyu 7:12.

  Mɔɔ ɔkile: Ɔwɔ kɛ yɛ nee awie mɔ di ye kɛnlɛma na yɛbu bɛ, kɛ mɔɔ yɛkulo kɛ bɛyɛ bɛmaa yɛ la.

• Mɔɔ Baebolo ne ka la: “Kɛkala mɔɔ bɛye adalɛ bɛgua la, bɛ nuhua ko biala ɛha nɔhalɛ ɛhile ɔ gɔnwo.”​—Ɛfɛsɛsema 4:25.

  Mɔɔ ɔkile: Ɔwɔ kɛ yɛka nɔhalɛ na yɛdi nɔhalɛ wɔ debie biala mɔɔ yɛyɛ la anu.

Ɛkpondɛ ɛhye anwo edwɛkɛ dɔɔnwo a, yɛsɛlɛ wɔ kenga:

• Ɛzinzalɛ Arane ne mɔɔ ɔ ti ne se “Right and Wrong​—A Guide You Can Trust.”

• Edwɛkɛ “Kɛzi Baebolo Ne Bahola Aboa Yɛ Yeamaa Yɛabu Adwenle Mɔɔ Awie Mɔ Lɛ La Ɛ?.”