Menli Ɛnlie Maanyɛlɛma Ɛnli Bieko​—⁠Duzu A Baebolo Ne Ka A?

Wɔ ɛvolɛ 2024 anu, bɛbado ɛra wɔ ewiade ɛleka dɔɔnwo badɛla mekɛ biala. Noko, menli dɔɔnwo ɛnlie manyɛlɛma ɛnli bieko.

• Americama dɔɔnwo mɔɔ bɛbizebiza bɛ edwɛkɛ la ka kɛ “maanyɛlɛma dɔɔnwo le angomedi” na bɛndwenle maanlema ne anwo.a​—Pew Research Center, September 19, 2023.

Mgbavolɛ nee mbɛlɛra dɔɔnwo noko ɛnlie maanyɛlɛma ɛnli.

• “Mgbavolɛ nee mbɛlɛra ta dwenle kɛzi bɛbali ngyegyelɛ nwo gyima la anwo, noko bɛbizebiza bɛ edwɛkɛ a bɛka kɛ maanyɛlɛma ɛndwenle mɔɔ hyia bɛ la anwo.”​—The New York Times, January 29, 2024.

• “Neanleanu bie kile kɛ mgbavolɛ nee mbɛlɛra die menli mɔɔ fa ninyɛne gua YouTube zo la di kpalɛ tɛla maanyɛlɛma.”​—The Korea Times, January 22, 2024.

Asoo yɛbahola yɛalie yɛali kɛ maanyɛlɛma bamaa ninyɛne ayɛ kpalɛ kenle bie? Nwane a yɛbahola yɛalie ye yɛali a?

Nea boɛ wɔ awie mɔɔ ɛdie ye ɛdi la anwo

Ɔwɔ kɛ menli nea boɛ wɔ awie mɔɔ bɛdie ye bɛdi la anwo. Baebolo ne ka kɛ “Sonla mɔɔ ye adwenle ɛtɛtinli la die edwɛkɛ biala di, noko mɔɔ anye gyi ɔ ti anwo la dwenle ɔ gyakɛ biala mɔɔ ɔlɛtu la anwo.”​—Mrɛlɛbulɛ 14:15.

• Amaa wɔanwu kɛ edwɛkɛ bie le nɔhalɛ anzɛɛ adalɛ la, kenga edwɛkɛ “Bɔ Ɛ Nwo Bane Fi Adalɛ Edwɛkɛ Nwo.”

Bieko, maanyɛlɛma mɔɔ lɛ adwenle kpalɛ bɔbɔ la ɛngola ɛnyɛ debie biala mɔɔ bɛkulo kɛ bɛyɛ la. Ɔti Baebolo ne bɔ kɔkɔ kɛ:

• “Mmafa ɛ nwo ɛto mgbanyima anzɛɛ sonla dasanli mɔɔ ɛngola ɛmmaa ngoane la anwo zo.”​—Edwɛne 146:3.

Awie mɔɔ ɛbahola wɔalie ye wɔali la

Baebolo ne maa yɛnwu kɛ Nyamenle ɛkpa awie mɔɔ fɛta mɔɔ ɔbahola yeanlea yɛ nwo zo kpalɛ la: Gyisɛse Kelaese. (Luku 1:32, 33) Gyisɛse a le Nyamenle Belemgbunlililɛ ne, arane bie mɔɔ bali tumi wɔ anwuma la azo Belemgbunli a.​—Mateyu 6:10.

• Sukoa deɛmɔti ɛbahola wɔalie Gyisɛse wɔali nee mɔɔ ɔbayɛ yeava yeali yɛ ngyegyelɛ nwo gyima la anwo debie. Kenga edwɛkɛ ɛhye mɔ “Nwane A Di Belemgbunlililɛ Ne Azo A?” nee “Nyamenle Belemgbunlililɛ Ne Bayɛ Duzu?”