Mekɛ Boni A Bɛbagyakyi Konle Ne A?​—⁠Duzu A Baebolo Ne Ka A?

Konle ne mɔɔ ɛlɛkɔ zo wɔ Middle East la bie ala a ɛlɛkɔ zo wɔ ewiade amuala la a.

“Ɔvi Ewiade Konle II ne azo mɔɔ ba la, konle dɔɔnwo ɛlɛkɔ zo wɔ ewiade na menli mgbe mgbe nwiɔ a yeha bɛ a, ɛhye le menli mɔɔ wɔ ewiade amuala la ngyɛnu nna anu ko.”​—United Nations Security Council, January 26, 2023.

Ɛleka mɔɔ bɛlɛko bɛahu menli dɔɔnwo wɔ ɛkɛ la bie mɔ a le Israel, Gaza, Syria, Azerbaijan, Ukraine, Sudan, Ethiopia, Niger, Myanmar, yɛɛ Haiti.a

Mekɛ boni a bɛbagyakyi konle ne a? Asoo ewiade mgbanyima bahola ava anzodwolɛ ara ɔ? Duzu a Baebolo ne ka a?

Ewiade mɔɔ konle ɛlɛkɔ zo wɔ nu

Konle mɔɔ ɛlɛkɔ zo wɔ ewiade ye ɛnɛ la kile kɛ ɔnrɛhyɛ konle kɔsɔɔti bara awieleɛ. Konle ɛhye mɔ ɛlɛmaa Baebolo ngapezo mɔɔ fale mekɛ ɛhye mɔɔ yɛde nu anwo la ara nu. Baebolo ne fɛlɛ ye ‘mekɛ ɛhye awieleɛ.’​—Mateyu 24:3.

• “Bɛbade konle mɔɔ bikye bɛ nee konle mɔɔ wɔ moamoa la anwo amaneɛbɔlɛ. . . . Maanle badwazo atia maanle yɛɛ belemgbunlililɛ badwazo atia belemgbunlililɛ.”​—Mateyu 24:6, 7.

Kenga edwɛkɛ “Duzu A Bahile Kɛ Yɛwɔ ‘Awieleɛ Mekɛ’ Anzɛɛ ‘Ewiade Awieleɛ Ne’ Anu A?” amaa wɔanwu kɛzi konle mɔɔ ɛlɛkɔ zo ɛnɛ ɛlɛmaa Baebolo ngapezo ara nu la.

Konle mɔɔ bamaa konle kɔsɔɔti ara awieleɛ la

Baebolo ne hanle dole ɛkɛ ne kɛ konle kɔsɔɔti bara awieleɛ. Kɛzi ɔbara ye ɛ? Tɛ sonla mɔdenlebɔlɛ ɔ, emomu, Amagɛdɔn, “Nyamenle, Tumivolɛ Bedevinli ne kenle kpole ne anu konle ne” a bava ara a. (Yekile 16:14, 16) Konle ɛhye anzi, Nyamenle bamaa ɛwɔkɛ mɔɔ yebɔ alesama kɛ bɛbanyia anzodwolɛ dahuu la ara nu.​—Edwɛne 37:10, 11, 29.

Amaa wɔazukoa Nyamenle konle mɔɔ bava konle kɔsɔɔti ara awieleɛ anwo ninyɛne dɔɔnwo la, kenga edwɛkɛ “Duzu A Le Amagɛdɔn Konle Ne?”