Yan Zabolotnyi/stock.adobe.com
BƐHƆ ZO BƐZINZA!
Ɛtaneyɛlɛ Ɛzo Ewiade Amuala—Duzu A Baebolo Ne Ka A?
Basabasayɛlɛma ekpunli ngakyile ɛlɛsɛkye ninyɛne wɔ Haiti. Amumuyɛyɛlɛ ɛbu zo wɔ South Africa nee Mexico yɛɛ maanle ngakyile mɔɔ wɔ Latin America la. Ɛleka mɔɔ basabasayɛlɛ ne azo ɛde bɔbɔ la, ninyɛne mɔɔ bɛwua wɔ ɛkɛ la maa menli te nganeɛ kɛ bɛnlɛ banebɔlɛ yɛɛ adwenleadwenle ɛdɔ bɛ nwo.
Duzu a Baebolo ne ka ye wɔ ɛtaneyɛlɛ mɔɔ ɛlɛkɔ zo wɔ ewiade amuala la anwo a?
Mɔɔ Baebolo ne hanle dole ɛkɛ wɔ ɛtaneyɛlɛ nwo la
Baebolo ne hanle dole ɛkɛ ne kɛ ɛtaneyɛlɛ boka sɛkɛlɛneɛ mɔɔ bahile kɛ “mekɛ ɛhye ɛlɛkɔ awieleɛ” la anwo. (Mateyu 24:3) Mekɛ mɔɔ Gyisɛse Kelaese ɛlɛka ninyɛne mɔɔ boka sɛkɛlɛneɛ ne anwo edwɛkɛ la, ɔhanle kɛ:
“Kɛmɔ ɛtaneyɛlɛ bazo la ati, menli dɔɔnwo ɛlɔlɛ baha aze.”—Mateyu 24:12.
Baebolo ne eza hanle dole ɛkɛ ne kɛ “wɔ mekɛ mɔɔ li awieleɛ la anu,” menli subane bahile kɛ bɛle “menli mɔɔ ɛngomo bɛ nwo zo, menli mɔɔ anwo yɛ ɛzulolɛ, menli mɔɔ ɛngulo kpalɛyɛlɛ” la. (2 Timote 3:1-5) Angomedi subane ɛhye mɔ boka nwo bie a yɛnwu kɛ ɛtaneyɛlɛ ɛlɛkɔ zo ɛnɛ la.
Noko anyelazo wɔ ɛkɛ. Baebolo ne ɛbɔ ɛwɔkɛ kɛ ɔnrɛhyɛ ɛtaneyɛlɛ bavi ɛkɛ.
“Ɔnrɛhyɛ biala ɛnee amumuyɛma ɛnle ɛkɛ bieko; ɛbahɔnlea ɛleka mɔɔ ɛnee bɛde la, na ɛnrɛnwu bɛ wɔ ɛkɛ. Noko bɛlɛvoma banyia azɛlɛ ne, na bɛ nye balie kpalɛ wɔ anzodwolɛ dɔɔnwo anu.”—Edwɛne 37:10, 11.
Sukoa anyelazo edwɛkɛ mɔɔ Baebolo ne ka la anwo ninyɛne dɔɔnwo nee deɛmɔti ɛbahola wɔalie wɔali kɛ ninyɛne mɔɔ ɛlɛkɔ zo ɛnɛ la le Baebolo ngapezo mɔɔ ɛlɛba nu la. Suzu edwɛkɛ ɛhye mɔ anwo.
“Ninyɛne Bayɛ Kpalɛ Kenle Bie”
“Duzu A Bahile Kɛ Yɛwɔ ‘Awieleɛ Mekɛ’ Anzɛɛ ‘Ewiade Awieleɛ Ne’ Anu A?”