‘Bɛbade Konle Nwo Amaneɛbɔlɛ’

“Membɔle adwelie kɛlɛvolɛ gyima ne abo la kɛyɛ ɛvolɛ 60 ɛne yɛɛ mebɔ konle kɛyɛ 40 mɔɔ hɔle zo wɔ ewiade ɛleka dɔɔnwo la anwo amaneɛ. Menwunle kɛ akɛsakɛsa mɔɔ hɔle zo wɔ United States nee Soviet Union avinli la hɔle ɔ nyunlu kpalɛ noko arɛlevilɛ nu ala debie biala azo pɛle. Noko ninyɛne mɔɔ sisile wɔ 2025 la bo zo yɛɛ ɔhanle me ɛzulolɛ. Deɛmɔti ɔle zɔ la ko a le kɛ konle mgbole dɔɔnwo ɛhɔ zo. Eza mɔɔ ɛvi konle ɛhye mɔ anu ko ɛra la ɛha maanle dɔɔnwo mɔɔ bie ɛtɛsile ɛlɛ a.”—John Simpson, ɔyɛ gyima wɔ BBC, yɛdayɛ a yɛhwe adwenle yɛhɔ edwɛkɛ bie mɔ azo na yɛyɛ bɛ mgbole a.

Konle konle mɔɔ ɛlɛsisi la gyegye menli dɔɔnwo. Bɛngola bɛnnwu ye saa konle konle bavi ɛkɛ a. Boni a Gyisɛse hanle a?

Mɔɔ Gyisɛse hanle la

Gyisɛse hanle ninyɛne mɔɔ ɛlɛsisi ɛnɛ la anwo edwɛkɛ dole ɛkɛ. Ɔbɔle ye ɛdoavolɛma kɔkɔ kɛ: “Bɛbade konle mɔɔ bikye bɛ nee konle mɔɔ wɔ moamoa la anwo amaneɛbɔlɛ.”—Mateyu 24:6.

Konle nee basabasayɛlɛ mɔɔ ɛlɛkɔ zo ɛnɛ la gyegye ɛdeɛ noko yɛbahola yɛanyia anyelazo. Duzu ati ɔ? Ɔluakɛ Gyisɛse hanle kɛ konle mɔɔ basisi ɛleka dɔɔnwo nee ninyɛne gyɛne yɛɛ subane mɔɔ menli bala ye ali la bayɛ “sɛkɛlɛneɛ” mɔɔ kile kɛ “mekɛ ɛhye ɛlɛkɔ awieleɛ” a. (Mateyu 24:3; Luku 21:7) Ɛhye maa yɛnwu kɛ Gyisɛse baye konle konle avi ɛkɛ ne kenle bie. Kɛzi ɔbayɛ ye ɛ?

Mɔɔ Gyisɛse bayɛ la

Ɔnrɛhyɛ Gyisɛse mɔɔ le Nyamenle Belemgbunlililɛ ne azo Belemgbunli la ‘bamaa bɛagyakyi konle wɔ azɛlɛ ye kɔsɔɔti azo.’—Edwɛne 46:9.

Amaa wɔanwu kɛzi anzodwolɛ bara azɛlɛ ye azo kenle bie nee kɛzi ɛbɛlabɔlɛ bayɛ la, kenga edwɛkɛ “How War and Violent Conflict Will End.”