Middle East Konle Ne​​—⁠Duzu A Baebolo Ne Ka A?

Konle mɔɔ ɛlɛkɔ zo wɔ United States, Israel yɛɛ Iran avinli la gyegye menli dɔɔnwo mɔɔ wɔ ewiade amuala la. Asoo ngyegyelɛ ɛhye bahola ava konle kpole ara ɔ? Asoo arane ne mɔ bahola agyakyi konle na bɛamaa anzodwolɛ ara ewiade ɔ?

Bie a menli mɔɔ ze Baebolo ngapezo la banyia adwenle kɛ Middle East konle ne a bava Amagɛdɔn konle ne mɔɔ Yekile buluku ne ka nwolɛ edwɛkɛ la ara a.

Duzu a Baebolo ne ka a?

Asoo arane ne mɔ bahola amaa bɛagyakyi Middle East konle ne ɔ?

Baebolo ne ka kɛ: “Mmafa ɛ nwo ɛto mgbanyima anzɛɛ sonla dasanli mɔɔ ɛngola ɛmmaa ngoane la anwo zo.”​—Edwɛne 146:3.

Yɛngola yɛnnwu ye saa arane ne mɔ bahola amaa anzodwolɛ ara Middle East a. Noko, Baebolo ne maa yɛnwu kɛ maanyɛlɛma, sonla arane anzɛɛ ekpunli biala ɛnle ɛkɛ mɔɔ ɔbahola yeaye konle yeavi ɛkɛ na yeamaa anzodwolɛ ara ewiade amuala a. Nyamenle angomekye ala a bahola amaa ‘bɛagyakyi konle wɔ azɛlɛ ye kɔsɔɔti azo a.’​—Edwɛne 46:9.

• Saa ɛkulo kɛ ɛnwu nwolɛ edwɛkɛ dɔɔnwo a, kenga Watchtower ne mɔɔ ɔ ti se “An End to War​​—How?” la.

Asoo Middle East konle ne le ngapezo mɔɔ ɛra nu ɔ?

Baebolo ne ka kɛ: “Bɛbade konle mɔɔ bikye bɛ nee konle mɔɔ wɔ moamoa la anwo amaneɛbɔlɛ. . . . Maanle badwazo atia maanle yɛɛ belemgbunlililɛ badwazo atia belemgbunlililɛ.”​—Mateyu 24:6, 7.

Middle East konle ne boka ninyɛne mɔɔ Baebolo ne hanle kɛ “mekɛ ɛhye ɛlɛkɔ awieleɛ a” ɔbasisi la anwo, na ɔle daselɛ mɔɔ kile kɛ yɛde “mekɛ mɔɔ li awieleɛ la” anu. (Mateyu 24:3; 2 Timote 3:1) Ɔti, konle ngakyile mɔɔ ɔlɛkɔ zo ɛnɛ la kile kɛ ɔnrɛhyɛ Nyamenle bamaa bɛagyakyi konle na yeaye debie biala mɔɔ maa alesama nwu amaneɛ la noko yeavi ɛkɛ.

• Saa ɛkulo kɛ ɛnwu nwolɛ edwɛkɛ dɔɔnwo a, kenga edwɛkɛ “Duzu A Bahile Kɛ Yɛwɔ ‘Awieleɛ Mekɛ’ Anzɛɛ ‘Ewiade Awieleɛ Ne’ Anu A?”

Asoo Amagɛdɔn babɔ ɔ bo wɔ Middle East ɔ?

Baebolo ne ka kɛ: “Bɛboɔboale bɛ nloa bɛhɔle ɛleka mɔɔ bɛfɛlɛ ye Hibulu nu Amagɛdɔn la.”​—Yekile 16:16.

Tɛ konle mɔɔ alesama arane ngakyile ɛlɛko wɔ Middle East la a babɔ Amagɛdɔn konle ne abo a. Emomu ɔle konle mɔɔ sonla arane kɔsɔɔti nee Nyamenle baho a.

• Saa ɛkulo kɛ ɛnwu nwolɛ edwɛkɛ dɔɔnwo a, kenga edwɛkɛ “Duzu A Le Amagɛdɔn Konle Ne?”

Duzu a baboa yɛ yeamaa yɛagyinla ngyegyelɛ mekɛ ɛhye mɔ anloa a?

Baebolo ne ka kɛ: “Bɛmmadwenledwenle debie biala anwo, emomu wɔ debie biala anu bɛlua asɔneyɛlɛ nee modolɛ nee moyɛlɛ zo bɛva bɛ nzɛlɛlɛ bɛdo Nyamenle anyunlu.”​—Felepaema 4:6.

Gyihovaa Nyamenle kulo kɛ yɛyɛ asɔne. Kɛmɔ Nyamenle dwenle yɛ nwo la ati, ɔbadie yɛ asɔneyɛlɛ na yeaboa yɛ yeamaa yɛagyinla yɛ adwenleadwenle ne mɔ anloa. (1 Pita 5:7) Adenle ko mɔɔ yelua zo yeyɛ ɛhye la a le kɛ yehile yɛ deɛmɔti konle konle kɔ zo, kɛzi ɔbara ye awieleɛ nee kɛzi ɔbaye nyane nee amaneɛnwunlɛ yeavi ɛkɛ la.​—Yekile 21:3, 4.

• Saa ɛkulo kɛ ɛnwu nwolɛ edwɛkɛ dɔɔnwo a, kenga edwɛkɛ “Asoo Mebahola Meanyia Arɛlekyekyelɛ Edwɛkɛ Wɔ Baebolo Ne Anu?”