2023: Ɛvolɛ Mɔɔ Nuhua Le Ngyegyelɛ​​—⁠Duzu A Baebolo Ne Ka A?

Wɔ 2023 anu, ninyɛne mɔɔ sisile ewiade amuala la maanle ɔlale ali wienyi kɛ yɛde mekɛ mɔɔ Baebolo ne ka kɛ ɔle “mekɛ mɔɔ li awieleɛ” la anu. (2 Timote 3:1) Nea kɛzi ninyɛne mɔɔ ɛlɛsisi ɛnɛ la nee mɔɔ Baebolo ne hanle kɛ ɔbasisi yɛ mekɛ ye azo la le ko la.

Baebolo ne hanle ninyɛne mɔɔ ɛlɛsisi ɛnɛ la dole ɛkɛ

‘Konle mɔɔ bikye nee konle mɔɔ wɔ moamoa la anwo amaneɛbɔlɛ.’​​—Mateyu 24:6.

• “Konle ngakyile ɛlɛsisi wɔ ewiade ɛleka dɔɔnwo.”a

“Azɛlɛkpusulɛ bara ɛleka ngakyile.”​​—Maake 13:8.

• “Ɔvi 2023 mɔlebɛbo, azɛlɛkpusulɛ 13 mɔɔ bo mangnitude 7 la ɛzi wɔ ewiade amuala, na ɛvolɛ ɛhye a azɛlɛkpusulɛ mgbole zɛhae dɔɔnwo ɛsisi a.”b

“Ninyɛne ɛzulolɛ.”​​—Luku 21:11.

• “Akee maanle nu ɛyɛ wuluwulu kpalɛ ɛdɛla mekɛ biala.”​​—António Guterres, UN secretary-general.c

“Ɛhɔne.”​​—Mateyu 24:7.

• “2023: Ɛvolɛ mɔɔ anu yɛle se maanle mbusua bie mɔ kɛ bɛbanyia aleɛ la.”d

‘Mekɛ mɔɔ anu yɛ se la.’​​—2 Timote 3:1.

• “Wɔ ewiade amuala, saa ɛye menli mɔtwɛ a bɛ nuhua ko lɛ adwenle nu ngyegyelɛ.”e

Duzu a bahola azi wɔ 2024 a?

Awie biala ɛnze mɔɔ bazi wɔ 2024 a. Noko mɔɔ ɛlɛkɔ zo wɔ ewiade amuala la maa ɔda ali kɛ ɔnrɛhyɛ Nyamenle Belemgbunlililɛ ne anzɛɛ anwuma arane ne bazɛkye sonla arane na yeaye ninyɛne mɔɔ fa amaneɛnwunlɛ nee adwenleadwenle ba la yeavi ɛkɛ.​​—Daneɛle 2:44; Yekile 21:4.

Noko, kɛkala saa adwenleadwenle tɔ yɛ nwo a, yɛbahola yɛakpondɛ moalɛ yɛavi Nyamenle ɛkɛ. Baebolo ne ka kɛ:

“Saa ɛzulolɛ ka me a, mefa me nwo meto ɛ nwo zo.”​​—Edwɛne 56:3.

Kɛ ɔkɛyɛ na yɛahile kɛ yɛlɛ anwodozo wɔ Nyamenle anu ɛ? Yɛsɛlɛ wɔ, sukoa ɛwɔkɛ mɔɔ Baebolo ne ɛbɔ kɛ amaneɛnwunlɛ bavi ɛkɛ ne la anwo ninyɛne dɔɔnwo. Maa yɛ nee wɔ ɛzukoa Baebolo ne mɔɔ ɛndua ɛhwee a amaa wɔanwu kɛzi ɛ nee wɔ abusua ne banyia Baebolo ne anu ɛwɔkɛ ne mɔ azo nvasoɛ la.