Mraalɛ Nwo Banebɔlɛ—Mɔɔ Baebolo Ne Ka La

“Mekɛ mɔɔ mele kakula la, ɛnee me diema nrenyia kpanyinli bo me na ɔbɔ me aholoba kenle ko biala. Mɔɔ bɛgyale me la, me ase noko yɛle me zɔhane ala. Ɔ nee ɔ hu yɛle me kɛ akɛlɛ bie la. Ɛnee mekulo kɛ meku me nwo.”—Madhu,a India.

Ewiade Amuala Kpɔkɛdelɛ Fane ne bɔ amaneɛ kɛ, “Mraalɛ mɔɔ bɛyɛ bɛ basabasa la ɛbu zo wɔ ewiade amuala.” Ɔka kɛ saa ɛye mraalɛ nsa a asɛɛ bɛyɛ nuhua ko basabasa anzɛɛ bɛkye ye mialera nu bɛ nee ye da.

Saa ɛhye bie ɛdo wɔ ɛlɛ a, bie a ɛlua a wɔ ahonle badu kɛ awie babɔ wɔ aholoba, anzɛɛ ɔbabo wɔ anzɛɛ ɔbahye wɔ mialera nu ɔ nee wɔ ala. Kɛmɔ bɛyɛ mraalɛ basabasa la ati, bie a ɛbanyia adwenle mɔɔ menli dɔɔnwo lɛ la bie kɛ ‘Mraalɛ anwo ɛngyia.’ Noko asoo mraalɛ edwɛkɛ hyia Nyamenle ɔ?

Kɛzi Nyamenle bu mraalɛ ɛ?

Ngɛlɛlera: “[Nyamenle bɔle] bɛ nrenyia nee raalɛ.” —Gyɛnɛsese 1:27.

Mɔɔ ɔkile: Nyamenle bɔle nrenyia nee raalɛ. Ɔbu bɛ kɛ bɛ mu nwiɔ bɛfɛta enililɛ. Eza ɔkulo kɛ kunli “kulo ɔ ye kɛ ɔdaye ɔ nwo la” na ɔnle kɛ ɔbɔ mɔdenle kɛ ɔdi ɔ nwo zo tumi, ɔnle kɛ ɔka edwɛkɛ mɔɔ yɛ nyane la ɔkile ye anzɛɛ ɔyɛ ye basabasa. (Ɛfɛsɛsema 5:33; Kɔlɔsaema 3:19) Ɔda ali kɛ mraalɛ nwo hyia Nyamenle kpalɛ.

“Mele kakula la, ɛnee me mbusuafoɔ bie mɔ nee me da. Mekɛ mɔɔ menyianle ɛvolɛ 17 la, me gyimamenle hanle kɛ saa me nee ye anla a, ɔbaye me ali. Mɔɔ menyɛle kpanyinli la, ɛnee me hu, me awovolɛ nee menli mɔɔ me nee bɛ de la ɛmbu me. Noko nzinlii menzukoale Gyihovab mɔɔ le Bɔvolɛ ne la anwo debie. Ɔbu mraalɛ. Ɛhye maanle menyianle anwodozo kɛ ɔkulo me edwɛkɛ yɛɛ mesonle bolɛ memaa ye.”—Maria, Argentina.

Duzu a baboa wɔ yeamaa wɔagyinla nyanelilɛ ne anloa a?

Ngɛlɛlera: “Agɔnwolɛ ne bie wɔ ɛkɛ a ɔbeta bɛ nwo kyengye ɔtɛla adiema”—Mrɛlɛbulɛ 18:24.

Mɔɔ ɔkile: Agɔnwolɛ kpalɛ baboa wɔ. Saa ɔbayɛ boɛ a, ka kɛzi ɛte nganeɛ la kile awie mɔɔ ɛdie ye ɛdi la.

“Meanga meangile awie biala kɛ awie nee me ɛla too ɔdwule ɛvolɛ 20. Ɔti ɛnee me nye ɛnlie, adwenleadwenle dɔle me nwo yɛɛ me rɛle bɔle. Noko mɔɔ menganle nwolɛ edwɛkɛ mengilele awie mɔɔ lɛ ɛhulolɛ kɛ ɔbadie me la, me nwo dɔle me kpalɛ.”—Elif, Türkiye.

Ngɛlɛlera: “Bɛvuandi bɛ adwenleadwenle muala bɛgua [Nyamenle anwo] zo ɔluakɛ ɔdwenle bɛ nwo.”—1 Pita 5:7.

Mɔɔ ɔkile: Saa ɛyɛ asɔne a Nyamenle tie. (Edwɛne 55:22; 65:2) Kɛmɔ ɔdwenle ɛ nwo la ati, ɔbaboa wɔ yeamaa wɔanwu kɛ ɛsonle bolɛ.

“Gyihova anwo debie mɔɔ menzukoale la boale me maanle mengyinlanle nyane mɔɔ melɛdi la anloa. Kɛkala mekola meka me edwɛkɛ mekile Nyamenle wɔ asɔneyɛlɛ nu. Ɔle kɛ me gɔnwo kpalɛ bie mɔɔ te me edwɛkɛ bo la.”—Ana, Belize.

Asoo Nyamenle bamaa bɛagyakyi mraalɛ amumuyɛyɛlɛ ɔ?

Ngɛlɛlera: ‘Gyihova bali pɛlepɛle amaa nrisa nee bɛdabɛ mɔɔ bɛsisi bɛ la, amaa dasanli mɔɔ de azɛlɛ ɛhye azo la anga bɛ ɛzulolɛ bieko.’—Edwɛne 10:​17, 18.

Mɔɔ ɔkile: Ɔnrɛhyɛ, Nyamenle baye nzisi kɔsɔɔti, mɔɔ bie a le amumuyɛ nee basabasa mɔɔ bɛyɛ mraalɛ la avi ɛkɛ.

“Saa menwu kɛ ɔnrɛhyɛ Gyihova baye amumuyɛ mɔɔ bɛyɛ mraalɛ nee ngakula mraalɛ la avi ɛkɛ a ɔmaa me nwo tɔ me. Yemaa me nzo nu ɛdwo me.”—Roberta, Mexico.

Amaa wɔanwu kɛzi Baebolo ne maa yɛnyia anyelazo, deɛmɔti ɛbahola wɔalie ɛwɔkɛ mɔɔ wɔ nu la wɔali nee kɛzi Gyihova Alasevolɛ fa Baebolo ne anu edwɛkɛ boa awie mɔ ɛnɛ la a, maa ahenle mɔɔ vale kɛlata ɛhye maanle wɔ la nee wɔ ɛzukoa debie mɔɔ ɛdua ɛhwee a.

Twe edwɛkɛ ɛhye mɔɔ bɛkola pelente la bie.