Azuyilɛ Mɔɔ Sɛkye Ninyɛne Dɔɔnwo​—Duzu A Baebolo Ne Ka A?

Azule ɛyi ɛva menli na yezɛkye ninyɛne wɔ ewiade ɛleka dɔɔnwo. Yɛ amaneɛbɔlɛ ɛhye mɔ nzonlɛ:

• “Wɔ kenle ekyi mɔɔ ɛpɛ nu la anu, ezule mɔɔ dɔle wɔ China suakpole ne azo la, bie ɛtɛsile ɛlɛ wɔ kɛyɛ ɛvolɛ 140 anu. Ezule mɔɔ dɔle ɔvi Folɛ kɔdwu Maanle la dodo le milimita 744.8 (enkyi 29.3).”​—AP News, August 2, 2023.

• “Kule le kenle mɔɔ tɔ zo nwiɔ mɔɔ ahumuakyima Khanun maanle ezule dɔle kpole na ahumu dule wɔ Japan nyiakɛ na ɔmaanle menli nwiɔ wule a. . . . Bɛ nye la kɛ ahumu ne bamaa ezule mɔɔ ye dodo le mita 0.6 (fuutu 2 ) la adɔ wɔ central Taiwan awoka ne mɔ azo.”​—Deutsche Welle, August 3, 2023.

• “Ezule mɔɔ dɔle dapɛne awieleɛ [wɔ Nova Scotia] mɔɔ wɔ Canada ɛnweazo na ɔmaanle azuyilɛ rale la le kpole tɛla mɔɔ ɛdɔ ɛkɛ wɔ ɛvolɛ 50 anu la.”​—BBC News, July 24, 2023.

Duzu a Baebolo ne ka ye wɔ ninyɛne ɛhye mɔ anwo a?

“Mekɛ mɔɔ li awieleɛ” la anwo sɛkɛlɛneɛ

Baebolo ne maa yɛnwu kɛ yɛde “mekɛ mɔɔ li awieleɛ” la anu. (2 Timote 3:1) Gyisɛse hanle dole ɛkɛ ne kɛ yɛbanwu “ninyɛne ɛzulolɛ” wɔ yɛ mekɛ ye azo. (Luku 21:11) Maanle nu tɛnlabelɛ mɔɔ ɛhakyi la ɛmaa ninyɛne ɛzɛkye yɛɛ ɔmmaa bɛngola bɛnnwu kɛzi maanle nu bayɛ la.

Anyelazo wɔ ɛkɛ

Baebolo ne kile kɛ ninyɛne ɛzulolɛ mɔɔ ɛlɛsisi la maa yɛnyia anyelazo. Duzu ati ɔ? Gyisɛse hanle kɛ: “Saa bɛnwu kɛ ninyɛne ɛhye mɔ ɛlɛsisi a, bɛnwu ye kɛ Nyamenle Belemgbunlililɛ ne ɛbikye.”​—Luku 21:31; Mateyu 24:3.

Ninyɛne ɛhye mɔ mɔɔ ɛlɛsisi la maa yɛnwu kɛ ɔnrɛhyɛ Nyamenle Belemgbunlililɛ ne bamaa azɛlɛ ye azo ninyɛne bie mɔ le kɛ ezule mɔɔ tɔ sɛkye ninyɛne la avi ɛkɛ.​—Dwobu 36:27, 28; Edwɛne 107:29.

Amaa wɔanwu kɛzi Nyamenle Belemgbunlililɛ ne bayɛ azɛlɛ ne boɛ la, kenga edwɛkɛ “Who Will Save the Earth?”